(යොහාන් භාසුර)

සියලුම සහල් වර්ගවල මිල දරාගත නොහැකි ලෙස ඉහළ ගොස් ඇතැයි පාරිභෝගිකයෝ චෝදනා කරති.

ඇතැම් සහල් වර්ගවල මිල සති දෙකකට පමණ පෙර පැවැති මිලට වඩා රුපියල් 10 ත් 25 ත් අතර ගණනකින් වැඩිවී ඇති බවත් නම ගිය සහල් නිෂ්පාදකයන්ගේ සහල් ඊටත් වඩා වැඩි ගණනකින් ඉහළ දමා ඇති බවත් පාරිභෝගිකයෝ පවසති.

රතු සහ සුදු කැකුළු සහල් කිලෝවක් රුපියල් 120 ත් 128 ක් අතර ද, නාඩු සහල් කිලෝවක් රුපියල් 125 සිට 135 අතර ද, සම්බා සහල් කිලෝවක් රුපියල් 155 සිට 170 අතර ද, කීරි සම්බා කිලෝවක් රුපියල් 220 සිට 230 අතර ද, මිලකට කොළඹ සහ අවට අළෙවි වන බව සිල්ලර වෙළෙන්දෝ පවසති.

පොළොන්නරුවේ ප්‍රධාන සහල් නිෂ්පාදන සමාගම් දෙකකින් අද (16) පස්වරුවේ කළ විමසුමකදී පැවසුවේ සම්බා කිලෝවක් රුපියල් 147 සහ 150 කට ද, නාඩු කිලෝවක් රුපියල් 117 සහ 120 කට ද, කීරි සම්බා කිලෝවක් රුපියල් 220 කට ද, සුදු කැකුළු සහ රතු කැකුළු කිලෝවක් රුපියල් 112 සහ 115 කට තොග නිකුත් කරන බවයි.

එම සහල් නිෂ්පාදන සමාගමක නිලධාරියකු පැවසුවේ රජයේ නියමයන් පරිදි සහල් මල්ලේ රජයේ පාලන මිල සඳහන් කර තිබුණ ද එහි සත්‍ය මිල ඊට වඩා වැඩි බවයි.

ලංකා සතොස උසස් නිලධාරියකුගෙන් කළ විමසුමකදී පැවසුවේ සුදු සහ රතු කැකුළු සහල් කිලෝවක් රුපියල් 93 සහ නාඩු සහල් කිලෝවක් රුපියල් 96 යන රජයේ පාලන මිලට සතොසෙන් මිලදී ගත හැකි බවයි.

සතොසේ සම්බා සහල් නොමැති බවත් සෙසු සහල් වර්ග තුන පමණක් ඇති බවත් එම නිලධාරියා වැඩි දුරටත් පැවසීය.

කෙසේ වෙතත් පාරිභෝගිකයන් පවසන්නේ ඉහත මිලට මිලදීගැනීමට බෙහෝ සතොස වෙළෙඳසල්වල සහල් නොමැති බවයි.