(මනෝප්‍රිය ගුණසේකර)

සාමාන්‍ය විදේශ ගමන් බලපත්‍ර හත් ලක්ෂ පනස්දාහක් පෞද්ගලික සමාගම් වලින් මිලදී ගැනීම වළක්වාලමින් පනවා තිබූ අතුරු තහනම් නියෝගය පෙත්සම්කාර පාර්ශවයේ එකඟත්වය ඇතිව සාමාන්‍ය විදේශ ගමන් බලපත්‍ර ආගමන විගමන පාලකවරයාට මිලදී ගැනීමට අවස්ථාව සැලසෙන පරිදි වෙනස් කිරීමට අභියාචනාධිකරණය අද (01) තීරණය කළේය.

මෙම වෙනස් කිරීමෙන් සාමාන්‍ය විදේශ ගමන් බලපත්‍ර මිලදී ගැනීමට ආගමන විගමන පාලකවරයාට අවස්ථාව සැලසෙන නමුත් විද්‍යුත් විදේශ ගමන බලපත්‍ර මිලියන පහක් මිලදී ගැනීම වළක්වාලමින් පනවා තිබූ තහනම් නියෝගය ඉදිරි නඩු දිනය දක්වා දීර්ඝ කිරීමටද අධිකරණය නියෝග කළේය.

එපික් ලංකා සමාගම ගොනු කර තිබූ පෙත්සමක් සලකා බැලූ අභියාචනාධිකරණය අදාළ නියෝග නිකුත් කෙරිණි.

අභියාචනාධිකරණ විනිසුරුවරුන් වන ලපාර් තාහිර් සහ පී. කුමාරන් රත්නම් යන මහත්වරුන්ගෙන් සැදම්ලත් විනිසුරු මඩුල්ලක් හමුවේ මෙම රිට් පෙත්සම සලකා බැලිණි. එපික් ලංකා පුද්ගලික සමාගම ගොනුකර ඇති රිට් පෙත්සමේ වගඋත්තකරුවන් වශයෙන් ආගමන විගමන පාලකවරයා ඇතුළු පිරිසක් නම් කර ඇත.

පිළිගත් ප්‍රසම්පාදන ක්‍රියාවලිය උල්ලංඝණය කරමින් සාමාන්‍ය හා විද්‍යුත් විදේශ ගමන් බලපත්‍ර පෞද්ගලික සමාගම් වලින් මිලදී ගැනීම අත්හිටුවීමේ නියොගයක් නිකුත් කකරන්නැයි ඉල්ලා පෙත්සම්කාර එපික් ලංකා පුද්ගලික සමාගම මෙම පෙත්සම ගොනු කර ඇත.

පෙත්සම කැඳවු අවස්ථාවේදී වගඋත්තරකාර ආගමන විගමන පාලකවරයා වෙනුවෙන් නීතිපතිවරයා නියෝජනය කරමින් පෙනී සිටි අතිරේක සොලිසිටර් ජෙනරල් සුමති ධර්මවර්ධන මහතා කරුණු දක්වමින් අධිකරණය නිකුත් කර ඇති අතුරු තහනම් නියෝගය හේතුවෙන් විදේශ ගමන් බලපත්‍ර නිකුත් කිරීම සම්බන්ධයෙන් දැඩි අර්බුදකාරී තත්ත්වයක් මතුවී ඇතැයි කීය.

ආගමන, විගමන දෙපාර්තමේන්තුව සතුව මේ වනවිට ඇත්තේ හිස් විදේශ ගමන් බලපත්‍ර 13880ක් පමණක් බවත් මෙම විදේශ ගමන් බලපත්‍ර ප්‍රමාණයෙන් වැඩකරන දින 30 කට විදේශ ගමන් බලපත්‍ර නිකුත් කිරීමට පමණක් හැකියාව ලැබෙන බවත් දැනුම් දුන් සුමති ධර්මවර්ධන මහතා දැනට ඇති විදේශ ගමන් බලපත්‍ර ප්‍රමාණය අවසන් වු පසු විදේශ ගමන් බලපත්‍ර නිකුත් කිරීමට නොහැකි තත්ත්වයක් උද්ගත වනු ඇතැයි පෙන්වා දුන්නේය.