(විමුක්ති එස් රුද්‍රිගු)

සෞදි අරාබියේ නිල සංචාරයක් සිදු කරන්න යැයි ෆයිසාල් බින් ෆර්හාන් බින් අබ්දුල්ලා කුමරු කළ ආරාධනය පිළිගත් බවත් එය තමාගේ ප්‍රථම නිල විදෙස් සංචාරය වනු ඇති බවත් සිරියානු විදේශ කටයුතු අමාත්‍ය අසාද් හසන් අල්-ෂිබානි ප්‍රකාශ කළේය.

සිරියාව නියෝජනය කරමින් සෞදි අරාබියාව නිල සංචාරයක නිරත වීමට හැකිවීම තමා ලද ගෞරවයක් බව විදේශ කටයුතු අමාත්‍ය අසාද් හසන් අල්-ෂිබානි සිය එක්ස් ගිණුමේ සටහනක් තබමින් පැවැසුවේය. නිල සංචාරයේදී සෞදි අරාබියාව සමග උපාය මාර්ගික සබඳතාවක් ගොඩ නගා ගැනීමට අදහස් කරන බවද ඔහු ප්‍රකාශ කළේය.

සිය සෞදි අරාබියානු සංචාරය නව වසරේ පළමු සතියේදී සිදුවනු ඇතැයි කුවේට් විදේශ කටයුතු අමාත්‍ය අබ්දුල්ලා අල්-යාහ්යා සමග ඩමස්කස් නුවරදී පැවැති මාධ්‍ය හමුවකදී විදේශ කටයුතු අමාත්‍ය අසාද් හසන් අල්-ෂිබානි පැවැසුවේය. එහිදී කුවේට් තානාපති කාර්යාලය නැවත විවෘත කර සිරියාව සමග සබඳතා තර කර ගන්නා ලෙසද අල්-ෂිබානි කුවේට් විදේශ කටයුතු අමාත්‍යවරයාගෙන් ඉල්ලා සිටියේය.