(සුජිත් හේවාජුලිගේ සහ අංජුල මහික වීරරත්න )

ත්‍රස්තවාදය වැළැක්වීමේ ( තාවකාලික විධිවිධාන) පනත් කෙටුම්පත යටතේ යම් පුද්ගලයකු රඳවා තබාගත හැකි මාස 18 ක උපරිම කාලය මාස 12ක් දක්වා අඩු කිරීමට රජය තීරණය කර ඇත.

මේ සඳහා සංශෝධන ඇතුළත් ත්‍රස්තවාදය වැළැක්වීමේ තාවකාලික විධිවිධාන( සංශෝධන) පනත් කෙටුම්පත විදේශ කටයුතු අමාත්‍ය මහාචාර්ය ජී එල් පීරිස් මහතා විසින් පාර්ලිමේන්තුවටඅද (10) ඉදිරිපත් කරනු ලැබීය.

මෙම පනත් කෙටුම්පත නුදුරු දිනයක විවාදයට ගැනීමට නියමිතය.

මේ අතර මේ පනත යටතේ රඳවා සිටින පුද්ගලයන් ආරක්ෂා සහිතව සිටිනවාදැයි තහවරු කර ගැනීම සඳහා සඳහා මහෙස්ත්‍රාත්වරයාට අදාල රැඳවුම් ස්ථානයට පැමිණීමටද නව සංශෝධන මඟින් අවස්ථාව සැලසෙනු ඇත.

එසේම රැඳවියකු රඳවා සිටින ස්ථානයකට නීතිඥවරයකුට පැමිණීමට අවස්ථාව සැලසීමටත් රැඳවුම් භාරයේ සිටින තැනැත්තාට සිය ඥාතීන් සමග අදහස් හුවමාරු කර ගැනීම( සන්නිවේදනය) සඳහා හැකියාව ඇති කිරීමටත් නව සංශෝධන පනත මගින් විධිවිධාන සැලසේ.

සැකකරුවන් වධදීමට ලක්ව නොමැති බවට තහවුරු කරගැනීම සඳහා එම ප්‍රඥප්තියේ එකොළොස් වැනි වගන්තිය යටතේ නියමයක් ලබාදීමට පෙර අධිකරණ වෛද්‍ය නිලධාරියකු වෙත ඉදිරිපත් කිරීම සඳහා අවස්ථාව ලබාදීමටද නව සංශෝධන පනත මගින් ප්‍රතිපාදන සැලසෙන බව සඳහන් වේ.

එසේම ආණ්ඩුක්‍රම ව්‍යවස්ථාවේ 120 හෝ 140 වන ව්‍යවස්ථා යටතේ සහතික කරන ලද ප්‍රතිකර්මයක් සඳහා ඉල්ලීම් කිරීමට රැඳවියකුට හැකියාව ලබාදීමටද මෙයින් ප්‍රතිපාදන සැලසෙනු ඇත.

තවද නඩුවේ කටයුතු අප්‍රමාදව හමාර කිරීම තහවුරු කිරීමට දිනපතා නඩු විභාග පැවැත්වීම සඳහා විධිවිධාන සැලැස්වීමට පනත් කෙටුම්පතේ ප්‍රධාන ප්‍රඥප්තියේ පහළොස් වැනි වගන්තියද මින් සංශෝධනය කෙරෙනු ඇත.

එසේම පනත් කෙටුම්පතේ පුවත්පත සහ මුද්‍රණාලය යන අර්ථ නිරූපණය ඉවත් කිරීම සඳහා වධදීම යන අලුත් අර්ථ නිරූපණය ඇතුළත් කිරීම සඳහා ප්‍රධාන ප්‍රඥප්තියේ 31 වැනි වගන්තිය සංශෝධනය කිරීමටද නව වගන්තියක් ඇතුළත් කෙරේ.

මෙම සංශෝධන පනත් කෙටුම්පතට අදාළ ගැසට් නිවේදනය පසුගිය ජනවාරි මස 27 වැනිදා නිකුත් කෙරිණ.