2022 ජුනි මස 28 වන අඟහරුවාදා
(මනෝප්‍රිය ගුණසේකර)
විදුලි සංදේශ නියාමන කොමිසමේ ප්‍රතිපාදන වලට පටහැනි අකාරයට කටයුතු කොට රුපියල් කෝටි 60 ක මුදලක් වැය කරමින් පසුගිය ජනාධිපතිවරණ සමයේදි සිල් රෙදි බේදා දුන් බවට හිටපු ඡනාධිපති ලේකම් ලලිත් වීරතුංග මහතාට සහ විදුලි සංදේශ නියාමන කොමිසමේ හිටපු සභාපති අනුෂ පැල්පිට මහතාට එරෙහිව නීතීපතිවරයා විසින් පොදු දේපළ පණත යටතේ පවරා තිබු නඩුවේ අධිචෝදනා පත්‍රය සංශෝධනය කොට ඔවුන්ට එරෙහිව දණ්ඩ නීතී සංග්‍රහය යටතේ චෝදනා ගොනු කළේය.
පොදු දේපළ පණත යටතේ මෙම නඩුවේ විත්තිකරුවන්ට එරෙහිව නඩු පවරා පැමිණිල්ලේ සාක්කි විභාග කොට අවසන් කිරීමෙන් අනතුරුව විත්තිය වෙනුවෙන් සාක්කි ඉදිරිපත් කරමින් තිබියදී පොදු දේපළ පණත යටතේ ඉදිරිපත් කොට තිබු අධිචෝදනා පත්‍රය සංශෝධනය කොට දණ්ඩ නීතී සංග්‍රහය යටතේ චොදනා ඉදිරිපත් කිරීමට නීතීපතිවරයා මෙලෙස පියවර ගනු ලැබීණි.
මෙම නඩුවේ පැමිණිල්ලේ සාක්කි විභාගය අවසන් වු පසුව හිටපු ඡනාධිපති ලේකම් ලලිත් වීරතුංග මහතා සාක්කි කූඩුවට නැඟ සාක්කි ලබා දුන් අතර විදුලි සංදේශ නියාමන කොමිසමේ හිටපු සභාපති අනුෂ පැල්පිට මහතා විත්ති කූඩුවේ සිට ප්‍රකාශයක් ලබාදුන්නේය.
කොළඹ මහාධිකරණ විනිසුරු ගිහාන් කුලතුංග මහතා හමුවේ මෙම නඩුව විභාග කෙරේ.
