(මනෝප‍්‍රිය ගුණසේකර)
 
මීගමු කලපු සංවර්ධනයට මහා භාණ්ඩාගාරයෙන් ලබා දුන් මුදල් අවභාවිතා කරමින් පසුගිය ජනාධිපතිවරණ සමයේදී දිනපොත් මුද්‍රණය කර රජයට රුපියල් මිලියනයකට අධික පාඩුවක් කළ බවට හිටපු ධීවර කටයුතු නියෝජ්‍ය ඇමැති සරත් කුමාර ගුණරත්න මහතා ඇතුළු හය දෙනෙකුට එරෙහි නඩුවේ නීතීපතිවරයාගේ ස්ථාවරය ලබන අගොස්තු 29 වැනි දා අධිකරණයට දැනුම් දෙන ලෙස කොළඹ මහාධිකරණ විනිසුරු සම්පත්  අබේකොන්  මහතා අද (23) නියම කළේය.
 
බරපතල දුෂණ චෝදනා විමර්ශන කොමිසම හමුවේ ඉදිරිපත් වු සාක්කි මෙම නඩුවට අදාළ කරගන්නැයි විත්තියෙන් කළ ඉල්ලීම සම්බන්ධයෙන් මෙම නඩුව කැඳවනු ලැබු අවස්ථාවේදී විත්තිකරුවන් වෙනුවෙන් පෙනී සිටි නීතීඥ සම්පත් මෙන්ඩිස් මහතා කළ ඉල්ලීමක් සළකා බැලූ විනිසුරුවරයා එලෙස නියම කළේය.

මෙම නඩුවෙන් චෝදනා ලැබ සිටින්නේ චන්දන පැල්පිට, පියල් අබේසේකර, හිටපු ධීවර කටයුතු නියෝජ්‍ය ඇමැති සරත් කුමාර ගුණරත්න, ඔහුගේ බෑනා වන උපුල් චමින්ද පෙරේරා කුමාරසිංහ, ධීවර සංස්ථාවේ හිටපු සභාපති උපාලි ලියනගේ සහ ලක්මිණ මුනිදාස නමැත්තන්ටය.

බරපතල සංචා සහ දුෂණ විමර්ශන කොමිසම හමුවේ මුලින්ම මේ පිළිබඳ තොරතුරු හෙළි වු අතර එහි නිර්දේශ මත රහස් පොලිසිය විසින් සිදු කරන ලද විමර්ශනයකින් පසුව නිතීපතිවරයා විසින් විත්තිකරුවන්ට   එරෙහිව   මෙලෙස අධිචෝදනා ගොනු කර ඇත.

මෙම නඩුව කැඳවනු ලැබු අවස්ථාවේදී විත්තිකරුවෝ අධිකරණය හමුවේ පෙනී සිටියහ.

මෙම නඩුව ලබන අගොස්තු 29 වැනි දා යළි කැඳවීමට ද විනිසුරුවරයා නියම කළේය.