(ඩයනා උදයංගනී)

මාළබේ ‘සයිටම්’ පෞද්ගලික වෛද්‍ය විද්‍යාලයේ පුද්ගලික හිමිකාරීත්වය අහෝසි කර එය රාජ්‍ය හා පෞද්ගලික හවුල් පාලනයක් ඇති ආයතනයක් බවට පත් කළ යුතු යැයි ශ්‍රී ලංකා නිදහස් පක්‍ෂයට අනුබද්ධ ශ්‍රී ලංකා නිදහස් උපාධිධාරී සංගමය පවසයි.

එහි දැනට අධ්‍යාපනය ලබන සිසුන්ගේ තත්ත්වය විශ්ලේෂණය කිරීමට කමිටුවක් පත් කළ යුතු බවත් සීමාවාසික පුහුණු කාලය දෙගුණ කළ යුතු බවත්  එම සංගමයේ ප‍්‍රධාන ලේකම් මනුල පෙරේරා මහතා පවසයි.

වෛද්‍ය සභාවේ ලියාපදිංචිය ලබාගැනීමට එමගින් පවත්වන විභාගයට පෙනී සිටීමට අවස්ථාවක් ලබාදීය යුතු බවත් මෙරට වෛද්‍ය අධ්‍යාපනය හා වෛද්‍ය උපාධිය ලැබීමටත් වෛද්‍යවරයෙකු ලෙස ලියාපදිංචිවීමටත් අවශ්‍ය නිර්දේශ මාස තුනක් ඇතුළත ඉදිරිපත් කිරීමට කමිටුවක් පත් කළ යුතු බවත් ඒ මහතා පවසයි.

ඒ මහතා මේ බව පැවසුවේ කොළඹ 10, ඩාර්ලි පාරේ පිහිටි ශ්‍රී ලංකා නිදහස් පක්‍ෂ මූලස්ථානයේදී අද(06) පැවති මාධ්‍ය හමුවක් අමතමිනි.