(හබරාදුව නිමල් අල්ගෙවත්ත සහ ගාල්ල අමල් වික්‍රමරත්න)

හබරාදුව සමුපකාරයේ සභාපති සමන් දිලාන් වැලිගමගේ මහතා පැය දෙකක කාලයක් ගාල්ල හීනටිගල ග්‍රාම සංවර්ධන සමිති ගොඩනැගිල්ලේ රඳවා  තබා ගන්නට හබරාදුව විවිධ සේවා සමිතියට අනුයුත්තව පිහිටි හීනටිගල හබරාදුව ග්‍රාමීය බැංකුවේ ගණු දෙනු කරුවන් විසින් අද 20 දහවල් පියවර ගෙන තිබිණි. සභාපතිවරයා එසේ රඳවා ගත්තේ හිනටිගල සමුපකාර ග්‍රාමීය බැංකුවේ ගණුදෙනු කරුවන් 1500 කගේ ගණුදෙනු මාස ගණනාවක් තිස්සේ ලබා දීමට නොහැකි වීම නිසා බව ගණුදෙනු කරුවෝ මෙහි දී කෑකෝ ගසමින් පෙන්වා දුන්හ.

පසුව හබරාදුව පොලිසිය පැමිණ පොලිස් ආරක්ෂාව මැඳ සභාපතිවරයා ශාලාවෙන් ඉවතට ගනු ලැබීය. මෙහිදී පොලිසිය හා ගණුදෙණු කරුවන් අතර අති වුයේ උනුසුම් තත්වයකි. හීනටිගල සමුපකාර ග්‍රාමිය බැංකුවේ ගණුදෙණු කරුවන් දනුවත් කිරීම සඳහා මෙම රැස්විම සභාපතිවරයා අද 20 පෙරවරුවේ කැඳවා තිබිණි.

උදෑසන 11 පමණ වන තෙක් සාකච්ජාව පැවැත්වු අතර ඒ අතර තුර දී බැංකුවේ සභාපතිවරයා පවසන ආකාරයට තම ගණුදෙනු සම්බන්ධයෙන් විස්වාශයක් හෝ ආරක්ෂාවක් හෝ නොමැති බව කියමින් ගණුදෙනු කරුවෝ කෑගැසූහ. ඒ සමඟම සභාපතිවරයා ඇතුළු පිරිස අදාළ ශාලාවේ හිරකර දොරවල් වල ඉබි යතුරු දැමූ ගණුදෙනු කරුවෝ අපි තැන්පත්කළ මුදල් ආපසු දෙන තෙක් යන්න දෙන්නේ නෑ කියමින් කෑකෝ ගසන්නට වුහ.

මේවන විට හබරාදුව සමුපකාර බැංකුවලට අයත් ගණුදෙනු කළ ගණුදෙනු කරුවෝ 14 දෙනෙක් හබරාදුව පොලිසියේ පැමිණිලි ගොනු කර ඇත්තේ තම ගණුදෙනු දිනපතා මාස් පතා ප්‍රමාද කරන බව පවසමිනි.