(මනෝප‍්‍රිය ගුණසේකර)

සක්විති හවුස් ඇන්ඩ් කන්ස්ට්‍රක්ෂන් පුද්ගලික සමාගමේ ලියාපදිංචි ලිපි ගොනුව සමාගම් රෙජිස්ටාර් කාර්යාලයෙන් අස්ථාන ගත වීම ගැන වහාම පරීක්‍ෂණයක් පවත්වා අධිකරණයට දැනුම් දෙන්නැයි කොළඹ මහාධිකරණ විනිසුරු සම්පත් විජේරත්න මහතා අද (11) රහස් පොලිසියට නියම කළේය.

මහජනතාවගෙන් රුපියල් කෝටි 162 කට අධික මුදලක් ලබාගෙන මුදල් සමාගම් පනතට පටහැනි ආකාරයට මුල්‍ය සමාගමක් පවත්වාගෙන යෑමේ සිද්ධිය සම්බන්ධයෙන් සක්විති රණසිංහ ඇතුළු 11දෙනකුට එරෙහිව පවරා ඇති නඩුව කැඳවනු ලැබු අවස්ථාවේදී ඒ බව දැනුම් දුන් අතර මෙම නඩුව ලබන ඔක්තොම්බර් මස 10වැනිදා විභාග කිරීමටද මහාධිකරණ විනිසුරුවරයා තීරණය කළේය.
 
එම සමාගම ලියාපදිංචි කිරීමට අදාළ ලිපි ගොනුව සමාගම් රෙජිස්ට්‍රාර් කාර්යාලයෙන් අස්ථාන ගත වී ඇතැයි පැමිණිල්ල වෙනුවෙන් පෙනී සිටින නියෝජ්‍ය සොලිසිටර් ජනරාල් දිලීප පිරීස් මහතා කළ දැනුම් දීමක් සළකා බැලූ විනිසුරුවරයා එලෙස නියම කළේය.

2006 නොවැම්බර් මස පළමුවැනිදාත් 2008 සැත්තැම්බර් මස 31 වැනිදාත් අතර කාලය තුළ නුගේගොඩදී මුල්‍ය සමාගමේ කොන්දේසිවලට පටහැනිව සක්විති හවුස් ඇන්ඞ් කන්ස්ට‍්‍රක්ෂන් නමින් මුල්‍ය සමාගමක් පවත්වාගෙන යෑමට කුමන්ත‍්‍රණය කළැයි විත්තිකරුවන්ට එරෙහිව නීතිපතීවරයා විසින් චෝදනා ගොනු කරනු ලැබ ඇත .