(අජිත්ලාල් ශාන්තඋදය)

කලුගඟ ඇතුලු රත්නපුර දිස්ත‍්‍රික්කයේ ප‍්‍රධාන ගංගාවල ජල මට්ටම් පහළ යමින් ගංවතුර තර්ජනය පහව යන තත්වයක් අද (23) දහවල් වනවිට වාර්තා වූ බව රත්නපුර දිස්ත‍්‍රික් ආපදා කළමනාකරණ මධ්‍යස්ථානය පවසයි.

එහෙත් මේ වනවිට රත්නපුර දිස්ත‍්‍රික්කයේ ප‍්‍රාදේශීය ලේකම් කොට්ඨාස 14ක ග‍්‍රාම නිලධාරී වසම් 189ක පවුල් පවුල් 6133ක පුද්ගලයින් 24625ක් අවතැන්ව ඇතිබව රත්නපුර දිස්ත‍්‍රික් ලේකම් මාලනී ලොකුපෝතාගම මහත්මිය පැවසුවාය. 

මෙම පිරිසෙන් පවුල් 1961ක පුද්ගලයින් 7861ක් සිය නෑ ගෙවල්වල රැදී සිටින බව පැවසුවාය. ඊට අමතරව පවුල් 493ක පුද්ගලියන් 1951 දෙනෙක් සුරක්‍ෂිත මධ්‍යස්ථානවල ආරක්‍ෂිතව රඳවා ඇති බව ද දිස්ත‍්‍රික් ලේකම්වරිය පැවසුවාය.

නිවාස හයක් පූර්ණ ලෙස හානි සිදුව ඇති අතර නිවාස 139කට අර්ධ හානි සිදු ඇති බවත් වෙනත් දේපොළ 156කට හානි සිදුව ඇති බවත් දිස්ත‍්‍රික් ලේකම්වරිය සඳහන් කළාය.

මේ අතර අද (23) දහවල් වනවිට කලූගඟේ රත්නපුර, මුවගම ජල මාපකයේ ජල මට්ටම මීටර් 6.4ක් ලෙස සටහන්ව තිබූ බව රත්නපුර වාරිමාර්ග ඉංජිනේරු අරුණ සමරතුංග මහතා කීවේ ය. මෙය පිටාර මට්ටමින් ද පහළ තත්ත්වයකි.

ගංවතුරින් යටව තිබූ බොහෝ පහත්බිම් මාර්ගවල ද ජලය බැසියමින් පැවතුණි. ගං වතුරට යට වූ නිවාස වතුර බැසයාමත් සමඟ පිරිසිදු කිරීමේ කටයුතු නිවැසියන් විසින් සිදුකරනු දැකගත හැකිවිය. සුරක්‍ෂිත මධ්‍යස්ථානවල රඳවා සිටින අයද ගං වතුර බැසයාමත් සමඟ සිය නිවෙස් කරා යමින් සිටිති.