(අජන්ත කුමාර අගලකඩ)

ජාතික විගණන පනත් කෙටුම්පත පාර්ලිමේන්තුවට ඉදිරිපත් කිරීමට කැබිනට් අනුමැතිය ලැබී ඇත. ජනාධිපති මෛත‍්‍රීපාල සිරිසේන මහතාගේ ප‍්‍රධානත්වයෙන් ඊයේ (10) උදේ පැවැති කැබිනට් රැස්වීමේදී මෙම අනුමැතිය ලබා දී තිබේ.

අදාළ පනත් කෙටුම්පත කැබිනට් මණ්ඩලයට ඉදිරිපත් කර තිබුණේ විශේෂ ව්‍යාපෘති ඇමැති ආචාර්ය සරත් අමුණුගම මහතා විසිනි.

කලින් සකස් කර තිබූ ජාතික විගණන පනත් කෙටුම්පත සංශෝධන කිහිපයක් සමග ඊයේ ඉදිරිපත් කර තිබූ බව වාර්තා වේ.

විගණකාධිපතිවරයාට පැවරීමට යෝජනා කර තිබූ විගණන වැරදි සම්බන්ධයෙන් වන අධිභාර පැනවීමේ බලය නව පනත් කෙටුම්පතින් ඉවත් කර ඇති බවද දැනගන්නට ඇත.

අධිභාර පැනවීමේ බලය විගණකාධිපතිවරයාට පැවරීමට ශ්‍රී ලංකා පරිපාලන සේවා සංගමය දැඩි විරෝධය පළකර තිබිණි. දහනවවන ආණ්ඩුක‍්‍රම ව්‍යවස්ථා සංශෝධනය යටතේ ජාතික මහජන කොමිෂන් සභාවක් ද පිහිටුවනු ලැබූ අතර විගණන කොමිෂන් සභාව බලාත්මක කිරීම විගණන පනත සම්මත නොකිරීම හේතුවෙන් ප‍්‍රමාද වී තිබිණි.