(මුදිතා දයානන්ද)

සියලූම උසස් පෙළ සිසුන්ට ලබන වසරේ සිට ටැබ් පරිගණකයක් ලබාදෙන බව අගමැති රනිල් වික‍්‍රමසිංහ මහතා අද(29) කෝට්ටේදී පැවසීය.

පිටකෝට්ටේ ශ්‍රී ජයවර්ධනපුර විද්‍යාලයේ  ‘ස්මාර්ට් ක්ලවුඩ්‘ ඩිජිටල් තාක්ෂණික ඉගෙනුම් පංති කාමරය නිරික්ෂණය කිරීම සඳහා පැමිණි අවස්ථාවේ මේ බව පැවසූ අගමැතිවරයා මෙසේද පැවසීය.

‘‘21වැනි සියවසේ ජීවත් වන්නන් හැටියට අද අපි නවීන තාක්ෂණය අපේ දරුවන්ගේ අධ්‍යාපනයේ දියුණුව සඳහා යොදා ගත යුතුයි. ඒ අනුව තමයි පළමු අත්හදා බැලීම හැටියට ජයවර්ධනපුර විද්‍යාලයේ ඩිජිටල් තාක්ෂණික ඉගෙනුම් පංති කාමරය ඇති කළේ. එහි යහපත් ප‍්‍රතිඵල අපට දකින්න ලැබෙනවා.   අපි දැන් තීරණය කර තිබෙනවා ලබන වසරේ සිට උසස් පෙළ ඉගෙනුම ලබන සිසුන්ට ටැබ්ලට් එකක් ලබාදෙන්න. එයින් සිසුන්ට තමන්ගේ පාඩම් වැඩ කටයුතු පහසුවෙන් කරගන්න, අන්තර්ජාලයට පිවිස නව දැනුම එකතු කරගන්න හැකියාව ලැබෙනවා. අපි මේ තත්වය වෘත්තිය පුහුණුව සඳහාද යොදාගනිමින් දශකයක් තුළදී නව ක‍්‍රමයට අපේ අධ්‍යාපනය රැගෙන යන්න බලාපොරොත්තු වෙනවා‘‘