ලංකා ඊ නිව්ස් වෙබ් අඩවිය අද (8) සිට ශ්‍රී ලංකාව තුළදී අන්තර්ජාලය පරිහරණය කරන්නන්ට පිවිසිය නොහැකි අයුරින් අවහිර කර (Block) ඇතැයි වාර්තා වේ.

මීට පෙර පසුගිය රජය යටතේ ලංකා ඊ නිව්ස් වෙබ් අඩවිය තහනම් කෙරුණු අතර වත්මන් රජය බලයට පත්වීමෙන් පසු එය යළි ශ්‍රී ලංකාවේ දී නැරඹීමට හැකි පරිදි අදාළ වාරණය ඉවත් කරන ලදි.

කෙසේ වෙතත් අද (8) පෙරවරුවේ සිට ලංකා ඊ නිව්ස් වෙබ් අඩවියට පිවිසීමට නොහැකි වූ බව වාර්තා විය.

කෙසේ වෙතත් මේ සම්බන්ධයෙන් කළ විමසීමකදී විදුලි සංදේශ නියාමන කොමිසමේ අධ්‍යක්ෂ ජනරාල් පී.ආර්.එස්.පී.ජයතිලක මහතා පැවසුවේ  ලංකා ඊ නිව්ස් වෙබ් අඩවිය සම්බන්ධයෙන් එවැනි වාරණයක් ක්‍රියාත්මක කර නැති බවයි. වෙබ් අඩවියට එරෙහිව පැමිණිල්ලක් හෝ ලැබී නැතැයි ද ඒ මහතා පැවසීය.