(සිතුම් චතුරංග)

කිලිනොච්චිය සිට දඹුල්ලට ලොරි රථයකින් රුපියල් ලක්ෂ විසිපහක් වටිනා කේරළ ගංජා කිලෝ 20කට අධික ප්‍රමාණයක් රැගෙනයමින් සිටි පුද්ගලයකු අද (18) වවුනියාව නව බස්නැවතුම්පොළ අසලදී අත්අඩංගුවටගත් බව වවුනියාව පොලිසිය කියයි.

මත්ද්‍රව්‍ය ජාවාරමක් සම්බන්ධයෙන් වවුනියාව අපරාධ විමර්ශන ඒකකය වෙත ලැබුණ තොරතුරක් මත සිදුකළ වැටලීමකදී සැකකරු අත්අඩංගුවටගත් බව පොලිසිය පැවසීය.

ලොරි රථයේ රහස් කුටියක් තුල සඟවා දීර්ඝ කාලයක සිට සැකකරු කිලිනොච්චිය සිටි කේරළ ගංජා රැගෙනයාම සිදුකොට ඇති බවත් ආරක්ෂක අංශ වෙත සොයාගැනීමට නොහැකිවන ලෙස මෙම රහස්කුටිය නිර්මාණයකොට තිබූ බවද පොලිසිය පැවසීය.

පොලිසිය වැඩිදුරටත් පැවසූයේ සැකකරු දඹුල්ලේ සිට කිලිනොච්චියට එළවළු ප්‍රවාහනය කොට එහි සිටින මත්ද්‍රව්‍ය ජාවාරම්කරුවකුගෙන් කේරළ ගංජා මිළදී ගෙන ඇති බවට තොරතුරු අනාවරණයවූ බවයි.

ලොරි රථයට ආරක්ෂාව සපයමින් ගමන්ගත් සුඛෝපභෝගී මෝටර් රථයක් හා තවත් පුද්ගලයකු සැකපිට අත්අඩංගුවටගෙන ඇති අතර ඔහු මත්ද්‍රව්‍ය ජාවාරමට සම්බන්ධ අයෙකුද යන්න සොයා විමර්ශන සිදුකරන බවද පොලිසිය පැවසීය.

අත්අඩංගුවටගත් සැකකරු පොළොන්නරුව , මනම්පිටිය ප්‍රදේශයේ පදිංචි වයස අවුරුදු 31 පුද්ගලයකු වේ.

සැකකරු වවුනියාව මහෙස්ත්‍රාත් අධිකරණයට ඉදිරිපත් කිරීමට නියමිතය