(ආරියරත්න රණබාහු)


රාජ්‍ය දේපළ සොරකම් කිරීමේ චෝදනාවට වරදකරුවන් වන අයට මරණ දඬුවම නියම කිරීම නීති පොතට ඇතුළත් කළ යුතු යැයි ජනාධිපති මෛත්‍රීපාල සිරිසේන මහතා පාර්ලිමේන්තු සංකීර්ණයේ අද (5) පැවති උත්සවයනදී පැවසීය.


තමාගේ පාලන කාලය අවසන් කිරීමට පෙර එම නීතිය ඇතුළත් කළහොත් එක්කෙනෙකුට දෙන්නෙකුට එම දඬුවම ක්‍රියාත්මක කරගත හැකි යැයි ද ජනපතිවරයා පැවසීය.


පාර්ලිමේන්තු සංකීර්ණයේ අද (5) පෙරවරුවේ පැවති රාජ්‍ය ගිණුම් කාරක සභාවේ දෙවැනි සම්මාන ප්‍රදානෝත්සවයේ ප්‍රධාන ආරාධිතයා ලෙස සහභාගී වෙමින් ජනාධිපතිවරයා ඒ බව පැවසීය.


අග්‍රාමාත්‍ය රනිල් වික්‍රමසිංහ සහ කනතානායක කරු ජයසූරිය යන මහත්වරුන්ගේ සහභාගීත්වයෙන් පැවති මෙම සම්මාන ප්‍රදානෝත්සවයේ දී ජනාධිපතිවරයා වැඩිදුරටත් මෙසේ කීය.


මේ රටේ දූෂණය නාස්තිය ගැන කතා කරනවිට පවතින නීතිරීතිවල බොහෝ අඩුපාඩුකම් අප දකිනවා. ඒ අඩුපාඩුකම් නිසා වැරදිකරුවන්ට දඬුවම්දීම ප්‍රමාද වෙනවා. වැරදිකරුවන්ට දඬුවම් දීමේදී ලෝකයේ බොහෝ රටවල් චීනය, සිංගප්පූරුව වගේ රටවල් අවුරුදු ගණන් නඩු අසන්නේ නැහැ. සති දෙකයි තුනයි වැඩේ ඉවර කරනවා. මරණීය දණ්ඩනය තිබෙනවා.


ලංකාව මරණීය දණ්ඩනය තිබෙන වැරදි තමයි මනුෂ්‍ය ඝාතන, සමූහ ස්ත්‍රී දූෂණ, රාජ්‍ය ද්‍රෝහිකම, මත්කුඩු වෙළදාම. නමුත් මේවාට මරණීය දණ්ඩනය තිබුණාට එකක්වත් ක්‍රියාත්මක නැහැ.