(ඉන්දිකා රාමනායක)

කොළඹ පාසලක සිසුන් පිරිසකට කොවිඩ් - 19 ආසාදනය වී ඇති බවට මාධ්‍ය හමුවකදී සිදු කළ ප්‍රකාශයක් සම්බන්ධයෙන් හිටපු පාර්ලිමේන්තු මන්ත්‍රී  රාජිත සේනාරත්න මහතාගෙන් කොළඹ අපරාධ කොට්ඨාසය අද (28)  පැය 4 ට ආසන්න කාලයක් ප‍්‍රශ්න කර ප‍්‍රකාශ සටහන් කරගත් බව පොලිසිය කියයි.

කොළඹ අපරාධ කොට්ඨාසයේ  ප‍්‍රධාන පොලිස් පරීක්ෂවරයකුගේ  ප‍්‍රධානාත්වයෙන් පොලිස් කණ්ඩායමක් රාජිත සේනාරත්න මහතා රඳවා සිටින මීගමුව  පල්ලන්සේන විශෝධන මධ්‍යස්ථානය වෙත ගොස්  මෙම ප‍්‍රශ්න කිරීම සිදුකළ බව උසස් නිලධාරියෙක් පැවසීය.

පොලිස් නිලධාරීන් අද (28) පෙරවරු 10.30 ට පමණ එහි ගොස් සිටි බවත් පස්වරු 2.30 පමණ වන තෙක් ප‍්‍රකාශය සටහන් කරගෙන තිබුණි.

කොළඹ පාසලක සිසුන් පිරිසකට කොවිඩ් - 19 ආසාදනය වී ඇති බවට හිටපු අමාත්‍යවරයා පසුගිය මාර්තු මස 17 වැනිදා මාධ්‍ය හමුවේ සිදුකළ ප‍්‍රකාශයක් සම්බන්ධයෙන්  කොළඹ අපරාධ කොට්ඨාසය හිටපු අමාත්‍ය රාජිත සේනාරත්න මහතාට එරෙහිව මෙම පරීක්ෂණ ආරම්භ කර තිබිණි.

අලුත්කඩේ අංක 04 අධිකරණය මගින් ලබාදී ඇති නියෝගයක් මත  මෙම ප්‍රකාශය ලබා ගෙන තිබිණි.