(පුත්තලම - ජුඩ් සමන්ත)
යතුරු පැදියක් පා පැදියක ගැටීමෙන් සිදුවී ඇති අනතුරකින් පා පැදිකරු මිය ගොස් ඇති බව ආණමඩුව පොලීසිය කියයි.


පසුගිය 14 වැනිදා රාත්‍රීයේ ආණමඩුව - පුත්තලම මාර්ගයේ කජු වත්ත ප්‍රදේශයේදී මෙම අනතුර සිදුවී ඇත.
අනතුරින් මිය
ගොස් ඇත්තේ කොට්ටුකච්චිය - කජුවත්ත පදිංචිව සිටි මුදියන්සේලාගේ රත්නායක (අවු:64) නම් අයෙකි.


මිය ගොස් ඇති අය පා පැදියකින් පුත්තලම දෙස සිට ආණමඩුව දෙසට ගමන් කරමින් සිට ඇත.පා පැදිය මාර්ගයේ දකුණු පසට හරවන අවස්ථාවේදී පුත්තලම දෙස සිට පැමිණ ඇති යතුරු පැදියක එය ගැටී ඇත.අනතුරින් පා පැදිකරු සහ යතුරු පැදිකරු යන දෙදෙනාම තුවාල ලබා ආණමඩුව දිසා රෝහලට ඇතුළත් කර ඇත.බරපතල තත්ත්වයේ පසුවූ පා පැදිකරු වැඩිදුර ප්‍රතිකාර සදහා පුත්තලම මූලික රෝහලට මාරු කර යැවීමට ආණමඩුව දිසා රෝහලේ වෛද්‍යවරුන් කටයුතු කර ඇත.පුත්තලම මූලික රෝහලේදී පා පැදිකරු මිය ගොස් ඇත.


අනතුරට පත්ව ඇති යතුරු පැදිය පැදවූ මාම්පූරිය - දළුව පදිංචිකරුවෙකු වන අසංක ප්‍රසාද් (අවු:21) යන අය පොලිස් ආරක්ෂාව යටතේ ආණමඩුව දිසා රෝහලේ ප්‍රතිකාර ලබමින් සිටී.


ආණමඩුව පොලීසියේ රථ වාහන අංශය වැඩිදුර විමර්ශණ කටයුතු කරගෙන යයි.