(ජේ.එල්.එල්. ජයසිංහ සහ චමිල් රූපසිංහ)

මහනුවර ශ්‍රී දළදා මාලිගාවේ ඇසළ මංගල්‍යයේ අවසන් රන්දෝලි පෙරහර අද (07) නිකිණි පෝදින වීදි සංචාරය කරයි.

අද රාත්‍රි 7.53 ට යෙදෙන සුබ මොහොතින් දකුණ දිශාභිමුඛව දළදා මාලිගාවෙන් පිටත්වෙන පෙරහර දළදා වීදිය කන්දෙ වීදිය (හිල් වීදිය) ඩී.එස්. සේනානායක වීදිය යටිනුවර වීදිය, කන්දේ වීදිය, ඔස්සේ ගමන්ගෙන රජවීදියෙන් ඉහළට විත් ගෙවැදීමට නියමිතය.

ඉන් අනතුරුව හෙට (08)  අලුයම 1.15 ට දකුණු දිශාමුඛව ශ්‍රී දන්තධාතු මන්දිරයෙහි පෙරහර සිවුදේවාල පෙරහරත් සමඟ පිටත්ව දළදා වීදිය ඩී.එස්. සේනානායක වීදිය ඔස්සේ ගොස් දළදා කරඬුව ගෙඩිගේ විහාරයේ (ආදාහන මළුව) සිරිත් පරිදි එහි තැන්පත් කර සිවුදේවාලයන්හි පෙරහර ආපසු දේවාලවලට පැමිණ දේවපූජා පැවැත්වීමෙන් පසුව ගැටඹේ තොටට ගොස් දිය කැපීමේ මංගලෝත්සවය සිදුකොට ආපසු ගණදෙවි කෝවිලට පැමිණ දේව පූජා ඉටු කිරීමට නියමිතය.

ගැටඹේ තොටේ දියකැපීමෙන් අනතුරුව එහි රැස්ව සිටින සියලු දෙනාට මුළුතැන් බත් කිරිබත් ආදියෙන් සංග්‍රහයක් පවත්වනු ලැබේ.

දහවල් පෙරහර හෙට (08) දහවල් 12.40 ට ගණදෙවි කෝවිලෙන් පිටත්වී කටුකැලේ වීදිය, දළදා වීදිය, ඊ.එල්. සේනානායක වීදිය, කන්ද වීදිය, ඔස්සේ ඩී.ඇස්. සේනානායක වීදියේ මංසන්දියට පැමිණ පස්වරු 2.45ට උතුර දිශාභිමුඛව (ආදාහන මලුව) ගෙඩිගේ විහාරයෙන් පිටත්ව ශ්‍රී දන්තධාතු මන්දිරයේ පෙරහර කැටුව ඩී.ඇස්. සේනානායක වීදිය පන්සල පාර ඔස්සේ දේව වීදියෙන් රජ වීදියට හැරී මාලිගා චතුරශ්‍රයේ තෙවිටක් ප්‍රදක්ෂිණාකොට සවස 4.35ට උතුර බලා දළදා මාලිගාවට ගෙවදී.