(අමල් වික්‍රමරත්න)

 මහඔය පොලිස් ස්ථානයට අනුයුක්තව පේරවැල්තලාව පොලිස් මුරපොලෙහි රාජකාරි කරමින් සිට අතුරුදහන් වූ ජයසිංහ නමැති පොලිස් නිලධාරියාගේ සැකකටයුතු මරණය සම්බන්ධයෙන්  අත්අඩංගුවට ගත් පොලිස් කොස්තාපල්වරයා ඇතුළු තිදෙනා 26 වැනිදා තෙක් රක්ෂිත බන්ධනාගාරගත කිරීමට දෙහිඅත්තකන්ඩිය මහෙස්ත්‍රාත්වරයා නියෝග කර තිබේ.

  මෙසේ රක්ෂිතබන්ධනාගාරගත කෙරුණේ මහඔය පොලිස් ස්ථානයේම  රාජකාරි කළ පොලිස් කොස්තාපල් තෙන්නකෝන් මුදියන්සේලාගේ වික්‍රමසිංහ (40) මහඔය පොලිසියට අනුයුක්තව සේවයකළ  සිවිල් ආරක්ෂක බළකායේ සෙබළ පිටිගල කපුගේ සුමතිපාල(40) සහ අත්තනායක මුදියන්සේලාගේ පොඩි මහත්තයා(52) නොහොත් පොඩ්ඩේ යන අය තිදෙනායි.

 පොලිස් කොස්තාපල්  ජයසිංහ නිලධාරියාගේ සැක කටයුතු මරණය සම්බන්ධයෙන් වැඩිදුර විමර්ශන පවත්වා තොරතුරු වසන් කිරීම, අසත්‍ය තොරතුරු සැපයීම, අපරික්ෂාකාරී ක්‍රියාවකින් හෝ නොසැලකිලිමත් ක්‍රියාවකින්  මරණය සිදු කිරීම යන චෝදනා යටතේ මෙම සැකකරුවන් තිදෙනා දෙහිඅත්තකන්ඩි මහේස්ත්‍රාත් අධිකරණයට ඉදිරිපත් කිරීමෙන් අනතුරුව 26 දක්වා රක්ෂිත බන්ධනාගාරගත කිරීමට මහෙස්ත්‍රාත්වරයා නියෝග කර තිබේ.