බිඟුන් මේනක ගමගේ
 
ජාතික ළමා ආරක්ෂක අධිකාරියට නව අධ්‍යක්ෂ මණ්ඩලයක් පත්කිරීම මාස හතරක් තිස්සේ පමාවීමෙන් එහි පරිපාලනමය කටයුතුවලට දැඩි බාධා පැමිණ ඇතැයි අභ්‍යන්තර ආරංචි මාර්ග ප්‍රකාශ කරයි.
 
අධිකාරියේ හිටපු සභාපතිනි නීතිඥ මරිනි ද ලිවේරා මහත්මියගේ ප්‍රධානත්වයෙන් පැවැති අධ්‍යක්ෂ මණ්ඩලයේ නිල කාලය පසුගිය ජනවාරි මාසයේදී අවසන් වූ නමුත් ඉන්පසු මේ වනතෙක් නව අධ්‍යක්ෂ මණ්ඩලයක් පත්කිරීමට ජනාධිපතිවරයා කටයුතු කර නැත.
 
පැවැති අධ්‍යක්ෂ මණ්ඩලයට ද  ගණ පූර්ණය නොමැතිකමින්  අවස්ථා ගණනාවකදී රැස්වීම් පැවැත්වීමට නොහැකි විය.
 
මෙම තත්ත්වය සම්බන්ධයෙන් ‘ලංකාදීප’ කළ විමසීමේදී ජාතික ළමා ආරක්ෂක අධිකාරියේ සභාපති නීතිඥ එච්.එම් අබේරත්න මහතා අධ්‍යක්ෂ මණ්ඩලයක් පත්කිරීමට කටයුතු කරන්නැයි තමා ළමා හා කාන්තා කටයුතු අමාත්‍යංශ ලේකම්වරියගෙන් ඉල්ලීමක් කළ බව පැවැසීය.