(පුෂ්පකුමාර මල්ලවආරච්චි)

මරණ දඩුවම අහෝසි කිරීම සදහා පාර්ලිමේන්තුවට ඉදිරිපත් කර ඇති පෞද්ගලික මන්තී‍්‍ර යෝජනාව නීත්‍යනුකූල නොවන බවට නීතිපති වාර්තාවක් එවා ඇතැයිද එය තමන්ගේ  සිතට සතුටක්වන්නේයැයි ජනාධිපති මෛතී‍්‍රපාල සිරිසේන මහතා අද(5) දිවුලපිටියේදී පැවසීය.

ජනාධිපතිවරයා මේ බව සදහන් කළේ රට වෙනුවෙන් එකට සිටිමු ගම්පහ දිස්ති‍්‍රක් වැඩ සටහනේ සමාප්තිය හා ප‍්‍රගතිය සමාලෝචනය සදහා පැවති හමුවේදීය. දිවුලපිටිය මහජන කි‍්‍රඩාංගනයේදී මෙම හමුව පැවැත්විණි.

දිවුලපිටිය ශාසනාරක්ෂක බල මණ්ඩල අංක 2 ලේඛකාධිකාරී ගනේවත්ත බෝධිමලූ විහාරාධිපති වරාදල විමල බුද්ධි හිමියෝ පිරිස පංචශීලයේ පිහිටුවූහ. මිනුවන්ගොඩ කෝපිවත්ත පල්ලියේ තුවාන් මුරාජ් නසීර් මෞලවිතුමන්,හල්පේ ශාන්ත පැන්සිස් දෙව් මැදුරේ දොන් මෙරිල් නිශාන්ත පියතුඹා, හා මීගමුව සීනිවිනායගර් කෝවිලේ ශී‍්‍රවාසි කේ. කුගේස්වර කුරුක්කල්තුමන් අනෙකුත් ආගමික වතාවත මෙහෙයවූහ. ගමපහ දිසාපති සනිල් ජයලත් මහතා පිළිගැනීම හා රට වෙනුවෙන් එකට සිටිමු වැඩ සටහනේ ප‍්‍රගතිය වාර්තාව ඉදිරිපත් කළේය.

ජනාධිපති මෛතී‍්‍රපාල සිරිසේන මහතා මෙස්ද කීය.

‘දීප ව්‍යාප්තව ජාතික වශයෙන්   රටේ දියුණුව උදෙසා ගෙන යන වැඩ පිළිවෙල රාශියක් අතරේ රට වෙනුවෙන් එකට සිටිමු වැඩ සටහන කි‍්‍රයාවට නැංවූවා. රට වෙනුවෙන් එකට වැඩ සටහන සදහා අමාත්‍ය මණ්ඩලයේ එකගතාවය ලබාගෙන මෙම වැඩ සටහන හැදුවේ කුමන කාරණයක් නිසාද යන වග දිසාපතිතුමන් ඉදිරිපත් කළ වාර්තාවෙන් කියවුණා. ගතවූ සති දෙක තුළ ව්‍යාපෘති 1500 කට වැඩි ගණනක් ගම්පහ දිසාවේ කි‍්‍රයාත්මක කර තියෙනවා.

ප‍්‍රාදේශීය ලේකම් කාර්යාලයකට කළ නොහැකි තරම් විශාල වැඩ කොටසක් පැවරෙනවා. එසේ තිබියදීත් නිලධාරීන් හැකි පමණින් උපරිම සේවයක් සලසනවා. කළයුතු මග හැරුණු, ප‍්‍රමුඛත්වය දිය  යුතු වැඩ හදුනාගෙන ඉටු කරන්නට මේ නිසා අවසථාව සැලසුණා. 

එකට සිටිය යුත්තේ ඇයි. මෙය දේශපාලනය මුල් කරගත් සංකල්පයක් නොවෙයි. පවුලක් ගත්තාම අම්මා තාත්තා අතරත් දෙමාපියන් දරුවන් අතරත් රජයේ කාර්යාලක් සියලු දෙනා එකට නැහැ. රෝහලක් ගත්තාම වෛද්‍යවරු එක කණ්ඩායමක් ලෙස සම්බන්ධ නැහැ. සමහර තැනක එකට සිටියත් බොහෝ විට වෙන වෙනම වැඩ කරනවා විතරයි. පොදු බව කණ්ඩායම් හැගීම සාමූහිකත්වය අඩුයි. ඒනිසා ඇතැම් වැඩ අමතක වෙනවා. දුර්වල වෙනවා. ප‍්‍රමාද වෙනවා. අකාර්යක්ෂමතාව ඇති වෙනවා.

අපි සියලූ දෙනා එකට ඉන්නවාද කියා හෘදය  සාක්කියට එකගව කල්පනා කර ප‍්‍රශ්න කරන්න. හැන්දෑවට රූපවාහිනිය බලද්දී මේ රටේ සියලූ දෙනා එකට ඉන්නා බව පේනවාද,  මේ එකට සිටිමු වැඩ සටහන කි‍්‍රයාත්මක කළේ රටේ දියුණුවට යහපත් අනාගතයකට කාර්යක්ෂමතාවය සේවය වැඩි කරන්නයි . අද වනවි ට රාජ්‍ය සේවකයන් ලකෂ 16 ක් ඉන්නවා. 2015 අපි බලයට එද්දී රාජ්‍ය සේවකයන් සිටියේ ලක්ෂ 14 යි. ජනගහනය අනුව ජනතාවගෙන් සෑම අට දෙනෙකුටම එක් රාජ්‍ය සේවකයෙක් ඉන්නවා. රටේ සංවර්ධනයේ ප‍්‍රමුඛතම බලකාය රාජ්‍ය සේවකයායි.

රටේ ප‍්‍රධාන ව්‍යවස්ථාපිත ආයතන සියල්ල එකට නොසිටියොත් අවුලක් වෙනවා. රාජ්‍ය නිලධාරීන් අමාරුවේ වැටෙනවා.අපේ‍්‍රල් 21 ප‍්‍රහාරයෙන් පස්සේ ගම රැකුම හදුන්වා දන්නා. ඒ වැඩ පිලිවෙල රටේ සයයට අනූවක අවසන් කර තියෙනවා. මෙයින් ගමේ ආරක්සාව මෙන්ම   ජාතික ආරක්සාවටත් පිටිවහලක් වෙනවා. ජාතික ආරක්සාවේ වගකීම පොලිසිය හුමදාව වනි ආයතන වලට මෙන්ම ජනතාවටත් බෙදී යන්න තියෙනවා.  ජාතික ආරක්සාව විතරක් නොවෙයි. අපරාධ මිනිමැරුම් මත් ද්‍රව්‍ය ළමා අපචාර ආදියත් වලක්වා ගන්න කටයතු කරන්න මෙය ශක්තිමත් කළ යුතුයි.

දරුවා පාසල් යදදී එද්දී වගේම උපකාරක පන්ති යද්දීත් ඇතිවන ප‍්‍රශ්න ගැටළු සම්බන්ධයෙන් දෙමාපියන් රාජ්‍ය නිලධාරීන් පොලිසිය අවධානය යොමු විය යුතුයි. 

අද මත් ද්‍රව්‍ය ප‍්‍රශ්නය දරුණුයි. අද උදේ පුවත්පත් බලද්දී දැන ගන්න ලැබුණා ගම්පහ දිස්ති‍්‍රක්කයේ මීරිගම කසිප්පු බීලා දහයක් මැරිලා කියලා දහතුනක් මැරිලා. නීති විරෝධීමත් ද්‍රව්‍ය රට පුරා පැතිරිලා. බීලා විස වෙලා මැරෙන එක අද ඊයේ කාරණයක්  නොවෙයි.  මෙහෙම කිව්වාට මට බනින්න එපා. එහේම වුණාට කමක් නැහැ. මොකටද ජහ ජරාව බොන්නේ.

ගම රැකුමදී කසිප්පු තිපපොල ගැනත් බලන්න  ඕනෑ. පොලිසියට දන්වන්න. ස්මාර්ට් වැඩ පිළිවෙල තරුණ පිරිසට වැදගත් එය දීප ව්‍යාප්තව රට පුරා සාර්ථකව කී‍්‍රයාවට නංවනවා.  ගම්පහ දිස්ති‍්‍රක්කයේ සහනාධාර ලාභීන් ලක්ෂ දෙකක් ඉන්න බව කියවුනා. ඒ අතරින් විශේෂ අවශ්‍යතා සහිතවූවන් ගැන අනුකම්පා කළ යුතුයි. සංවර්ධිත රටවල වැඩිහිටියන් වෙනුවෙන් විශේෂ වැඩ සටහන් තිබුනත් අපේ අඩුයි.  එකට සිටිමු වැඩ සටහනින් ප‍්‍රශ්න හදුනා ගැනීමට රජයටත් ග‍්‍රාමීය මට්ටමින් වැඩ පිළිවෙළක් අවශ්‍යයි.

ගම්්පහ දිස්ති‍්‍රක්කයේ පරිසර සංරක්ෂනය සතුටුදායක නැහැ. එය ආරක්සා කරගන්න නිලධාරීන්ට මෙන්ම සැමට වගකීමක් පැවරෙනවා. එංගලන්තේ සුද්දන්ගේ කුණුත් දැන් ගෙනවිත් දාන්නේ ගම්පහටයි. මම නම් කියන්නේ නැහැ සමහර නගරවල කැළි කසල ඉවත් කිරීම දුර්වලයි. කැළි කසල මහජන සෞඛ්‍යයට අහිතකර වෙනවා. අද වන ඝනත්වය අඩුම ගම්පහයි. එය වැඩි කරන්න වැඩ කරන්න  ඕනෑ. ඩෙංගු ප‍්‍රශ්නයට මුලත් මෙයයි. මීගමුව, ගම්පහ, රාගම, වතුපිටිවල රෝහල්වල ඩෙංගු රෝඝීන් පීරි ඉතිරෙනවා. 

මුතුරාජවෙල සුන්දරත්වය විනාශ කරන්නේ දේශපාලඥයින් මුල් වෙලා . මේ ආණ්ඩවේ සමහර ඇමතිවරුත් මේවාට සම්බන්ධයි.  මුතුරාජවෙල ගොඩ කරනවා. කූණු දානවා. මම එක් වතාවක් පොලිසිය එක්ක ඇවිත් මේ වැඩ කළ පිරිස් අල්ලා ගත්තා.අපි අපේ වගකීම් යුතුකම් ඉෂ්ට කර ඇද්දැයි කල්පනා කර බලන්න. 

කෙටි දින ගණනකදී මේ වැඩ සටහන සාරථක කරගන්න ලැබුනා මෙය අවසානයක් නොවෙයි. ආරම්භයක් ලෙස සලකන්න. දිගටම ගෙන යන්න රජයේ නිලධාරීීන් කටයුතු කරන්න කියා ඉල්ලනවා. දරුවන් බේරා ගැනීමටත් තරුණයින් ගේ හෙට දවස වෙනුවෙනුත් මත් ද්‍රව්‍ය පිලිබද වැඩ සටහන් ශක්තිමත් කිරීමේ අවශ්‍යතාවය ඔබ දන්නවා. මත් ද්‍රව්‍ය සමාජ ව්‍යසනයට බරපතල ලෙස මුල් වෙලා. කොච්ච්ර හොද දෙයක් කරන්න ගියත් අකුල හෙලන අයත් ඉන්නවා. 

මේ ව්‍යසනය දුරු කරන්න මම මරණ දඩුවම ගේන්න කටයුතු කලා. එයට රජයේ පිරිස් පවා විරුද්ධව කටයුතු කරනවා. මරණ දඩුවම අහෝසි කරන්න පාර්ලිමේන්තුවට පනතක් ගේනනත් කටයුතු කරලා. මිනිමරුවෝ. ස්තී‍්‍ර දූෂකයෝ මෙ නිසා සතුටට පත් වනා. මරණ දඩුවම අහෝසි කිරීමේ පෞද්ගලික මන්තී‍්‍ර යෝජනාව නීත්‍යනුකූල නොවන බවට   නීීතිපති වාර්තාවක් එවා තියෙනවා.එය මගේ සිතට සතුටක්. හිරගෙවල් නිසා රට හදන්න අමාරුයි. පසුගියදා නාවික හමුදාව මත්පෙති මිලියන දහඅටක් සමග මත්කුඩු කිලො 270 ක් අල්ලා ගත්තා ඒ ගැන සොයද්දී හිරගෙවල්වල සම්බනධතා හෙලිවුනා. මේවා ගෙනාවේ අපේ දරුවන්ටයි. එකට එකතු වෙලා හොද යහපත් රටක් ගොඩ නගන්න අත්වැල් බැද ගනිමු.

පරිසර රාජ්‍ය ඇමති අජිත් මාන්ප්පෙරුම.ගම්පහ දිස්ථී‍්‍රක් පාර්ලිමෙන්තු මන්තී‍්‍ර ලසන්ත අලගියවන්න යන මහත්වරුන්ද උත්සව සබාව ඇමතුහ. අත්තනගල්ල ස්වරණහංස කලායනයේ රංග ශෝභාවෙන් උලෙල ඔපවත් කෙරිණි. තිලිණ හා සහතික්පත් බෙදාදීමත් සමද්ධි  නිවාස ආධාර, දිරිය ණය ආධාර, කලායතන සදහා ආධාර, ඉඩම් ඔප්පු බෙදාදීම, පාසල් සිසුන්ට උපකරණ පිරිනැමීම, නිවාස ආධාර, රණවිරු ආධාර, ඇතුල ප්‍රජා සත්කාර ගණනාවකටද ජනාධපතිවරයා මෙහිදී එක්විය.

බස්නාහිර පළාත් ආණ්ඩුකාර එ.ජේ.එම්. මුසම්මිල්, පාර්ලිමේන්තු මන්තී‍්‍ර හර්ෂණ රාජකරුණා, දිවුලපිටිය එක්සත් ජාතික පක්ෂ සංවිධායක ආචාර්ය කිත්සිරි මංචනායක, දිවුලිපිටිය ශී‍්‍ර ලංකා නිදහස් පක්ෂ සංවිධායක චන්දන ජයකොඩි, යන මහත්වරුන් ඇතුල් දේශපාලන නියෝජිතයන්ද දිස්ත්‍රික්කයේ ප‍්‍රාදේශීය ලේකම්වරු ඇතුලු කාර්ය මණ්ඩලද වෙනත රාජ්‍ය ආයතන නිලධාරීහු මේ  අවස්ථාවට එක්වූහ.