(නාලක සංජීව දහනායක)

ජාත්‍යන්තර කම්කරු දින සැමරුම් උත්සව මහානායක හිමිවරුන්ගේ ඉල්ලීම පරිදි රජය විසින් කල් දැමුවද, කොළඹ නගරය කේන්ද්‍ර කරගනිමින් දේශපාලන පක්‍ෂ හා වෘත්තීය සමිති කිහිපයක් හෙට (1) මැයි දින සැමරුම් පවත්වති.

ඒ අනුව ශ්‍රී ලංකා නිදහස් පක්‍ෂයේ මැයි දින සැමරුම ජනාධිපති මෛත‍්‍රීපාල සිරිසේන මහතාගේ ප‍්‍රධානත්වයෙන් හෙට (1) පස්වරු 2.00ට කොළඹ බණ්ඩාරණායක අනුස්මරණ ජාත්‍යන්තර සම්මන්ත‍්‍රණ ශාලාවේ පැවැත්වීමට නියමිතය.

එහිදි කම්කරු සටන්වලට නායකත්වය දුන් ටී.බී ඉලංගරත්න, භාරත ලක්‍ෂ්මන් පේ‍්‍රමචන්ද්‍ර, අලවි මව්ලානා, ආනන්ද දසනායක, ඞී.සී වීරසේකර වැනි දිවංගත කම්කරු නායකයන්ට ජනාධිපතිවරයා විසින් උපහාර පිදීමට නියමිතය.
       
එමෙන්ම හිටපු ජනාධිපති මහින්ද රාජපක්‍ෂ මහතාගේ ප‍්‍රධානත්වයෙන් කම්කරු සැමරුම් උත්සවයක් හෙට (1) පස්වරු 2.00 නාරාහේන්පිට, අභයාරාමයේ දී පැවැත්වේ. එම විහාරාධිපති මුරුත්තෙට්ටුවේ ආනන්ද හිමියෝ එය සංවිධානය කරති. එහිදි දැනට ජීවත්ව සිටින කම්කරු නායකන්ට උපහාර පිදීමක් සිදුකරන අතර මියගිය කම්කරු නායකයන්ට පිං පැමිණ වීම සිදුකිරීමට නියමිතය.
              
සමාජවාදී ජනතා පෙරමුණ හා රාජ්‍ය සේවා වෘත්තීය සමිති සම්මේලනය විසින් පවත්වනු ලබන මැයි දින රැළිය පස්වරු 3.00ට නාරහේන්පිට, ශාලිකා ශාලාවේදී පැවැවේ. 

ඒකාබද්ධ විපක්‍ෂයේ නායක දිනේෂ් ගුණවර්ධන,ලංකා සම සමාජ පක්‍ෂයේ ප‍්‍රධාන ලේකම් මහාචාර්ය තිස්ස විතාරණ, සමාජවාදී ජනතා පක්‍ෂයේ ප‍්‍රධාන ලේකම් රාජා කොල්ලූරේ, පාර්ලිමේන්තු මන්ත‍්‍රීවරුන්වන සිසිර ජයකොඩි, චන්ද්‍රසිරි ගජධීර ඇතුළු විශාල පිරිසක් මෙහිදී ජනතාව ඇමතීමට නියමිතය.

‘ඇත්ත වෙනසකට වමේ බලයක් ”තේමාව යටතේ පෙරටුගාමි සමාජවාදී පක්‍ෂය මැයි රැළිය පැවැත්වේ. මැයි පෙළපාළිය පස්වරු 11.00ට මරදාන එල්ෆිනිස්ටන් රඟහළ අසලින් ආරම්භ වන අතර මැයි දින රැළිය පස්වරු 2.00ට පැවැත්වේ.

සෞඛ්‍ය වෘත්තීය සමිති සංවිධානය වෘත්තීය සමිති 58ක් ඒකාබද්ධ කරගනිමින්  පවත්වනු ලබන මැයි දින සමුළුව සෞඛ්‍ය අමාත්‍ය රාජිත සේනාරත්න මහතාගේ ප‍්‍රධානත්වයෙන් පෙරවරු 10.00ට කොළඹ, ජේ. ආර් ජයවර්ධන කේන්ද්‍රයේදී පැවැත්වේ.

එහිදී සෞඛ්‍ය ක්‍ෂේත‍්‍රයට හා පොදුවේ කම්කරු පංතියට අදාළව යෝජනා 08ක් ඉදිරිපත් කිරීමට නියමිත අතර, සෞඛ්‍ය වෘත්තීය සමිති නායකයන්ද අදහස් දැක්වීමට නියමිතය.