2022 අගෝස්තු මස 15 වන සඳුදා
මිනිස් ජාවාරමේ යෙදුණේ විදේශ සේවා නියුක්ති කාර්යංශයේ නිලධාරියෙක්ලු
විනීතා එම් ගමගේ
නීති විරෝධී අන්දමින් ශ්‍රී ලාංකිකයන් සිව්දෙනෙකු ඉතාලියට ගෙන යමින් සිටියදී එරට ගුවන් තොටුපොළක දී අත් අඩංගුවට පත් ශ්‍රී ලාංකිකයා ශ්‍රී ලංකා විදේශ සේවා නියුක්ති කාර්යංශයේ නිලධාරියෙකු බව අනාවරණය වී තිබේ.
ශ්‍රී ලංකා විදේශ සේවා නියුක්ති කාර්යංශය ඔහුගේ වැඩ තහනම් කිරීමට කටයුතු කර ඇතැයි කාර්යංශ ආරංචි මාර්ග සඳහන් කරයි.
මෙම තැනැත්තා ලෙබනනයේ හා ජෝර්දානයේ තානාපති කාර්යාලවල සේවය කර ඇති අතර ඉකුත් 07 වැනිදා විදේශ ගත වී ඇත්තේ එසේ විදේශ ගත වීමට අවශ්‍ය පුර්ව අනුමැතියකින් තොරව යැයි ද මේ පිළිබඳව ලංකාදීප කළ විමසුමක දී කාර්යංශයේ ජ්‍යෙෂ්ඨ නිලධාරියෙක් ලංකාදීපයට පැවැසීය.
ඉතාලියේ මිලාන් නුවර ශ්‍රී ලංකා කොන්සල් ජනරාල් කාර්යාලයෙන් විදේශ කටයුතු අමාත්‍යංශයට ඉකුත් 17 දා එවන ලද ෆැක්ස් පණිවුඩය මගින් ශ‍්‍රි ලාංකිකයෙකු එරට ගුවන්තොටුපොළේදී අත්අඩංගුවට ගත් බව දැනුම් දී ඇත. ඔහුගේ ගමන් බලපත‍්‍රය හා රියදුරු බලපත‍්‍රයේ පිටපත් සමග එම දැනුම්දීම කර තිබූ අතර ඒ බව විදේශ කටයුතු අමාත්‍යංශය ශ‍්‍රි ලංකා විදේශ සේවා නියුක්ති කාර්යාංශයටද දැනුම් දී තිබිණි.
මෙසේ අත්අඩංගුවට ගත් කාර්යාංශ නිළධාරියා ජොර්දාන් සහ ලෙබනන් රාජ්‍යයන්හි පිහිටි ශ‍්‍රි ලංකා තානාපති කාර්යාලවල 2012 අගෝස්තු මස සිට 2015 පෙබරවාරි මස දක්වා රාජ්‍යතාන්ත‍්‍රික තනතුරක රාජකාරි කර ඇති අතර, ඒ සඳහා රාජ්‍යතාන්ත‍්‍රික ගමන් බලපත‍්‍ර ඔහුට, ඔහුගේ බිරිඳට හා දරුවන් තිදෙනාටද නිකුත් කොට ඇත.
එම නිළධාරියා 2015 පෙබරවාරි මස දිවයිනට පැමිණි පසු එම රාජ්‍යතාන්ත‍්‍රික ගමන් බලපත‍්‍රය ආගමන හා විගමන දෙපාර්තමේන්තුව මගින් අවලංගු කර ඇති අතර, නැවතත් ඔහු 2015 ජූලි මාසයේ රාජකාරි ගමන් බලපත‍්‍රයක් ලබාගෙන ඇතැයි කාර්යංශ ආරංචි මාර්ග සඳහන් කරයි. ඔහුගේ බිරිඳ සහ දරුවන් තිදෙනාද 2016 වසරේ අගෝස්තු මාසයේදී සාමාන්‍ය ගමන් බලපත‍්‍ර ලබාගෙන ඇති බවට අනාවරණය වී තිබේ.
-
sirimal Thursday, 20 September 2018 01:41 PM
ඒ කාලයේ ලෝකය වටේ සියලුම තානාපති සහ මහකොමසාරිස් කාර්යාලවල උඩ සිට පහල දක්වා සියලුම තනතුරු පිරෙව්වේ දේශපාලන පිරිසගෙන්. සමහරු සේවයෙන් ඉවත් කලත් තවමත් ඒ රටවල නැවතී ඉන්නවා. මේ සියලුම දෙනා වගකිවේ ආණ්ඩුවට හෝ විදේශ කටයුතු අමාත්‍යංශයට නොවේ. තමන්ට රස්සාව ලබාදුන් දේශපාලඥයින්ටයි. ඒගොල්ලන්ගේ මහා පරිමානයේ ගසා කෑම් සහ ගනුදෙනු සම්බන්ධයෙන් දැන් නඩු පවා පැවරී තිබෙනවා.
Reply : 0 11
