(හර්ෂණ තුෂාර සිල්වා)
 
නැගෙනහිර, උතුරු මැද සහ සබරගමු යන පළාත්වල පළාත් සභා මැතිවරණය කල් දැමීමට ඇතැම් පිරිස් උත්සාහ කරමින් සිටින බවත් ඊට ඉඩ නොදී නියමිත පරිදි මැතිවරණ පවත්වන්නැයි ඉල්ලමින් ශ්‍රී ලංකා පොදුජන පෙරමුණේ සභාපති හිටපු අමාත්‍ය මහාචාර්ය ජී.එල්. පීරිස් මහතා නීතිඥවරයකුගේ මාර්ගයෙන් මැතිවරණ කොමිෂන් සභාවේ සභාපතිවරයාට ලිපියක් යොමු කර ඇත.
 
මේ වසරේ සැප්තැම්බර් සහ ඔක්තෝබර් මාසවලදී නැගෙනහිර, උතුරු මැද සහ සබරගමු පළාත් සභාවල කාලය ඉකුත් වීමට නියමිත බවත් ඉන් අනතුරුව නිශ්චිත පරිදි මැතිවරණ පැවැත්විය යුතු බවත් මහාචාර්ය ජී.එල්. පීරිස් මහතා නීතිඥවරයා මාර්ගයෙන් මැතිවරණ කොමිෂන් සභාවේ සභාපති මහින්ද දේශප්‍රිය මහතාට දන්වා තිබේ.
 
මැතිවරණ කොමිෂන් සභාවේ සාමාජිකයන් වන ආචාර්ය නලින් අබේසේකර, මහාචාර්ය රත්නජීවන් හූල් යන මහත්වරුන්ට ද එම ලිපියේ පිටපත් යොමු කර තිබේ. 
 
මැතිවරණ කොමිෂම සතුව තිබෙන ව්‍යවස්ථාදායක බලය භාවිත කරමින් නියමිත පරිදි මැතිවරණ පැවැත්වීමට කටයුතු කරමින් රටේ මහජනතාවගේ අයිතිය සුරක්ෂිත කරන්නැයි ද එම ලිපිය පීරිස් මහතා ඉල්ලා ඇත. 
 
මහාචාර්ය ජී.එල් පීරිස් මහතා වෙනුවෙන් දිවුරුම් කොමසාරිස්, සමාගම් ලේකම් නීතිඥ යජීෂ් තෙන්නකෝන් මහතා මෙම ලිපිය යොමු කර තිබේ.