(ඉන්දිකා රාමනායක)

පිටකොටුව, මැණින් වෙළෙපොළ,  බස් නැවතුම්පොළ සහ දුම්රිය ස්ථානය ඇතුලු ස්ථාන වල කොළඹ නගර සභාවට අයත්  රථගාල් රාත්‍රී කාලයේ අත්පත් කරගෙන එම රථගාල් වල වාහන නවත්වන වෙළෙදුන් ඇතුලු  පුද්ගලයින්ගෙන්  කප්පම් ලබා ගන්නා කල්ලියක පස් දෙනෙක් කොළඹ අපරාධ කොට්ඨාසයේ  නිලධාරීන් කණ්ඩායමක් විසින් අද (25) අත්අඩංගුවට ගත්බව පොලිසිය කියයි.

සංවිධානාත්මක කල්ලියක සාමාජිකයන් මොවුන්ව තැරැව්කරුවන් ලෙස යොදා  මෙම ක්‍රියාව සිදුකරන බවත්  රාත්‍රීයකට රථ ගාලකින් රුපියල් ලක්ෂයක අධික මුදලක් උපයන බවත් එම උසස් පොලිස් නිලධාරියා කියා සිටියේය.

මෙම ක්‍රියාව සම්බන්ධයෙන් පොලිස්පතිවරයාට ලැබුණු තොරතුරුක් මත බස්නාහිර පළාත බාර නියෝජ්‍ය පොලිස්පති  දේශබන්දු තෙන්නකෝන් මහතාගේ අධීක්ෂණය යටතේ මෙම මෙහෙයුම සිදුකර තිබිණි.

පිටකොටුව මැණින් වෙළෙද පොළට, කැලෑ වෙළෙඳ පොලට රාත්‍රී කාලයේ පිට පළාත් වලින්  එළවළු , පලතුරු ඇතුලු භාණ්ඩ රැගෙන එන වෙළෙදුන් රථ  ගාල් කරන්නේ ඉහත  රථගාල් වල බවත් එම වෙළෙදුන්ගෙන් වැඩි වශයෙන් කප්පම් ලබාගෙන ඇති බවත් පොලිසිය කියයි.

සැකකරුවන්ගේ තර්ජන වලට භියෙන්  මෙම වෙළෙදුන් සැකකරුවන් ඉල්ලන ප්‍රමාණයෙන් මුදල් ලබා දෙන බවද පොලිසිය සඳහන් කරයි.

රථගාල්වලින් මුදල් එක් රැස් කරන පිරිස  නිරීක්ෂණ කිරීම සඳහා  තැරැව්කරුවන් අදුරු ප්‍රදේශ වල රැදී සිටින බවත් එක් රැස් වන මුදල් වරින් වර සැකකරුවන්  තැරැව්කරුවන් වෙත බාර දෙන බවත් පොලිසිය කියයි.

වෙළෙදුන් සුරා කන මෙවැනි පිරිස් අත්අඩංගුවට ගැනීමට පොලිසිය දිගින් දිගටම  මෙහෙයුම් කරන බවද  පොලිසිය  සඳහන් කළේය.

කොළඹ අපරාධ කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරි  ජනක් ද සිල්වා මහතාගේ අධීක්ෂණය යටතේ,  සහකාර පොලිස් අධිකාරිවරුන් වන නෙවිල් සිල්වා,  කමල් ගුණරත්න යන මහත්වරුන්ගේ මෙහෙයවීමෙන්, ස්ථානාධිපති ප්‍රධාන පොලිස් පරීක්ෂක  එරංග ප්‍රනාන්දු  මහතාගේ  උපදෙස් මත,  සංවිධානාත්මත  අපරාධප විමර්ශන  ඒකකයේ  ස්ථානාධිපති ප්‍රධන පොලිස් පරීක්ෂක  සුනිමල්  සුසන්ත, පොලිස් සැරයන්වරුන් වරුන් වන (3856) ප්‍රියන්ත, වික්‍රමනායක (84333), කොස්තාපල්වරුන් වන   කුමාර (90242),   ලසන්ත (88139),    චතුරංග (91691),   රාජකරුණා (91791) යන මහත්වරු මෙම වැටලීම සිදුකළහ.

සැකකරුවන් හෙට (26) අධිකරණයට ඉදිරිපත් කිරීමට නියමිතය.