(තරිඳු ජයවර්ධන සහ එෆ් අස්ලම්)
 
රාජ්‍ය පරිපාලන සේවයේ නොවන නිලධාරියකු ඌව පළාත් ක්‍රීඩා අධ්‍යක්ෂ ධුරයට පත් කරන ලෙසට ලබා දුන්නේයැයි කියන නීති විරෝධී නියෝගයක් ක්‍රියාත්මක නොකිරීම නිසා ඌව පළාත් ක්‍රීඩා හා යෞවන කටයුතු අමාත්‍යංශයේ ලේකම් අබේසිංහ බණ්ඩා මහතා වහාම ක්‍රියාත්මක වන පරිදි එම තනතුරෙන් ඉවත් කර ඇතැයි පළාත් සභාවේ ආරංචි මාර්ග කියයි.
 
කිසිම මූලික විමර්ශනයක් නැතිව ඔහු එම තනතුරෙන් ඉවත් කර දැනට ඔහු  නියෝජ්‍ය ලේකම් පිරිස් හා පුහුණු    තනතුරට පත් කර ඇතැයි ද එම ආරංචි මාර්ග පවසයි.
 
මූලික පරීක්ෂණයක් නැතිව දේශපාලනඥයන්ගේ කීමට තමා ස්ථාන මාරු කිරීම සම්බන්ධයෙන් එම ලේකම්වරයා ආණ්ඩුකාරවරයා දැනුම්වත් කර ඇතැයි ද, මාරුව අවලංගු නොකළහොත් ඊට එරෙහිව මූලික අයිතිවාසිකම් පෙත්සමක් ගොනු කිරීමට එම නිලධාරියා කටයුතු කරමින් යන්නේයැයි ද පළාත් සභාවේ උසස් නිලධාරියෙක් ලංකාදීපයට පැවසීය.
 
ඌව පළාත් ක්‍රීඩා අධ්‍යක්ෂ ලෙස පත් කරන්නැයි දේශපාලනඥයකු විසින් බලපෑම් කරන ලදැයි කියන පුද්ගලයා  ක්‍රීඩා සම්මේලනයක තනතුරක් හොබවන සමයේ සිදුවූ මූල්‍ය අක්‍රමිකතාවක් සම්බන්ධයෙන් චෝදනා පත්‍රයක් ලබා දී ඇති පුද්ගලයකු බව ද ආරංචි මාර්ග පවසයි. ඌව පළාත් ක්‍රීඩා අධ්‍යක්ෂ තනතුර රාජ්‍ය පරිපාලන සේවයේ තනතුරක් බව කළමනාකරණ දෙපාර්තමේන්තුව තහවුරු කර ඇති බවත්, කෙසේ වෙතත් මෙම තනතුරට මීට පෙර ද රාජ්‍ය පරිපාලන සේවයේ නොවන නිලධාරීන් පත් කර ඇති නිසා මොහුද ඒ ආකාරයටම පත් කරන ලෙසත් ලේකම්වරයාට දැනුම් දී ඇතැයි ආරංචි මාර්ග සඳහන් කරයි.

නීතියට පිටින් එම තනතුරට පුද්ගලයකු පත් කළ නොහැකි බව ලේකම්වරයා දැනුම් දීමෙන් පසු මෙම තනතුරින් ඔහු ස්ථාන මාරු කළ බව උසස් නිලධාරියෙක් කීවේය.

මේ සම්බන්ධයෙන් කළ විමසීමේ දී ඌව පළාත් ක්‍රීඩා හා යෞවන කටයුතු අමාත්‍ය සාලිය සුමේධ මහතා පැවසුවේ තමා පැවරූ රාජකාරි කිහිපයක්ම ලේකම්වරයා හරියට ඉටු නොකිරීම නිසා ඔහු ස්ථාන මාරු කළ බවයි. ඒ මහතා මෙසේ ද කිවේය.
 
‘‘අවුරුදු දෙක හමාරක් තිස්සේ ප්‍රතිපත්තිමය කාරනා ටිකක් ක්‍රියාත්මක කරන්න ඔහුට පවරා තිබ්බා. පළාත් සභාවේ වැඩිම විෂයන් තිබෙන අමාත්‍යංශය මෙයයි. ක්‍රීඩා හා මාර්ගස්ථ මගී ප්‍රවාහන ප්‍රඥප්තියක් දැනට තිබෙනවා. කර්මාන්ත සංවර්ධන අධිකරී ප්‍රඥපතිය ඇතුළු ප්‍රඥප්ති කිහිපයක් සම්මත කර ගැනීමට අවශ්‍ය කටයුතු සම්පාදනය කරන ලෙස ලේකම්වරයාට දැනුම් දී තිබුණා. ක්‍රීඩා අධ්‍යක්ෂ ධුරය සිද්ධියත් ගැටලුවක් තමයි. හැබැයි එය ස්ථාන මාරුවට හේතුවක් නෙමෙයි. මේ ගැටලු ගැන සාකච්ඡා කරද්දි ඔහු කිව්වා නියෝජ්‍ය ලේකම් පිරිස් හා පුහුණු තනතුරට ඔහු වඩාත් කැමතියි කියලා. ඒ වෙලාවත් මම කිව්වේ එහෙම නෙමෙයි අපි මේ මාස කීපයේ මේ වැඩ ටික කරලා ඉවර කරමු කියලා. ඒ එක්කම නිර්ණාමික පෙත්සමක් ගිහින් තිබුණා.

ඒ පෙත්සම ගහපු අය කියලා සැක කරය අයගේ ලියැවිලිවලට හිතට එකඟව අත්සන් කරන්නත් නොහැකි බව කියනවා. දිගින් දිගටම වැඩ සිද්ධ වුණේ නැති නිසා ඔහු කැමැති ස්ථානයට යන්න කියලා මම යෝජනා කළා. යන්නම් කියලා පසුව යන්න බෑ කියලා හිටියා. මම මේ සම්බන්ධයෙන් ප්‍රධාන ලේකම්වරයාටත්, ආණ්ඩුකාරවරයාටත් දැනුම් දුන්නා. ක්‍රීඩා අධ්‍යක්ෂ පත් කරන එකේ ගැටලුව තියෙන්නේ කළමනාකරණ දෙපාර්තමේන්තුව මෙය පරිපාලන තනතුරක් ලෙස අනුමත කරලා තියෙන්නේ. අපේ ප්‍රඥප්තියේ තියෙන්නේ මේක ක්ෂේත්‍රයේ ප්‍රවීණයකුට දෙන්නයි.‘‘ යැයි ද ඒ මහතා කීවේය.