(ඩයනා උදයංගනී)

            නායයෑමේ අධි අවදානමක් සහිත ප‍්‍රදේශවල පවුල් 15,000ක් පමණ ජීවත් වන බවට හඳුනාගෙන ඇතැයි ජාතික ගොඩනැගිලි පර්යේෂණ ආයතනයේ අධක්‍ෂ ජනරාල් ආසිරි කරුණාවර්ධන මහතා පැවසීය.

            නුවරඑළිය,  බදුල්ල,  මාතලේ,  කෑගල්ල,  කළුතර,  හම්බන්තොට ආදී දිස්ත‍්‍රික්ක ගණනාවක නායයෑමේ අවදානමක්, අධි අවදානමක් හා අවම අවදානමක් පවතින ප‍්‍රදේශ හඳුනාගෙන තිබෙන බව කී කරුණාවර්ධන මහතා එම ප‍්‍රදේශවලින් ජනතාව ඉවත් කිරීමේ වැඩපිළිවෙලක් ආරම්භ කර ඇති බව ද සඳහන්  කළේය.

            ඒ යටතේ මෙම වසර තුළ පවුල් 6000ක් එම අවදානම් ප‍්‍රදේශවලින් ඉවත් කිරීමට සැලසුම් කර ඇති බව කී අධ්‍යක්‍ෂ ජනරාල්වරයා මේ වන විටත් නිවාස 1200ක් ඉදිකිරීමේ කටයුතු සිදුකෙරන බව කියා සිටියේය.

             කෑගල්ල දිස්ත‍්‍රික්කයේ ඉදිකෙරෙන මෙම නිවාස නායයෑම්, ගංවතුර ආදියට ඔරොත්තු දෙන සුරක්‍ෂිත නිවාස ලෙස ඉදිකරන බව ද හෙතෙම  ප්‍රකාශ  කළේය.

            ආසිරි කරුණාවර්ධන මහතා මේ බව පැවසුවේ ආපදා කළමනාකරණ අමාත්‍යාංශයේදී අද (17)  පැවති මාධ්‍ය හමුවක් අමතමිනි.

            වාරිමාර්ග, ජල කළමනාකරණ හා ආපදා කළමනාකරණ අමාත්‍ය දුමින්ද දිසානායක මහතාගේ ප‍්‍රධානත්වයෙන් පැවති මෙම මාධ්‍ය හමුවේදී අමාත්‍යවරයා පැවසුවේ නායයෑමේ අවදානම් ස්ථානවල ජීවත් වන ජනතාවට ආරක්‍ෂිත ස්ථානයකින් ඉඩමක් මිලදී ගැනීමට ආධාර ලෙස රුපියල් ලක්‍ෂ 4ක්, නිවසක් ඉදිකරගැනීමට ලක්‍ෂ 16ක් වශයෙන් ලබාදෙන වැඩසටහනක් ද ආරම්භ කර ඇති බවයි.