( තිළිණි ද සිල්වා සහ රංජන් කටුගම්පොළ )

පින්නවල අලි අනාථාගාරයෙහි සිටි පස් හැවිරිදි  ‘නන්දි ‘ නැමති අලි පැටවා නවසීලන්තයට තෑග්ගක් වශයෙන් යැවීම හෝ ඒ සම්බන්ධ කිසිදු පියවරක්  නොගන්නා බවට නීතිපතිවරයා අධිකරණය හමුවේ පළකළ  එකඟතාවය ලබන මැයි 26  වැනිදා තෙක් ක්‍රියාත්මක වන පරිදි දීර්ඝ කිරීමට අභියාචනාධිකරණය අද (31) තීන්දු කළේය

වඳවී යන සතුන් නම් කොට ඇති රතු දත්ත පොතට ද ඇතුළත් දුර්ලභ ආසියානු අලි පරපුරකට අයත් පස් හැවිරිදි ‘නන්දි ‘ නැමැති අලි පැටවා නවසීලන්තයේ ඕක්ලන්ඩ් සත්ව උද්‍යානයට තෑගි කිරීම තහනම් කරන ලෙස ඉල්ලා ගොනු කළ රිට් පෙත්සම අද  (31 ) අභියාචනාධිකරණය හමුවේ කැඳවූ අවස්ථාවේදී අධිකරණය මෙම නියෝගය නිකුත් කළේය.

ධර්ම විජය පදනම , එහි සභාපතිවරයා , බෝධිරාජ පදනම ,ඕමල්පේ සෝභිත හිමි , බෝවත්තේ ඉන්දරත්න හිමි ඇතුළු 18 කු විසින් මෙම පෙත්සම ගොනු කර තිබිණි. 

පොලිස්පති ,පොලිස් මූලස්ථානයේ අපරාධ අංශයේ අධ්‍යක්ෂ , වනජිවී අධ්‍යක්ෂ ජනරාල්වරයා ඇතුළු 41 දෙනෙකු පෙත්සමේ වගඋත්තරකරුවන් වශයෙන් නම් කරනු ලැබ සිටිති.