බිඟුන් මේනක ගමගේ
 
දේශපාලන පලිගැනීම්වලට ලක් වූ රාජ්‍ය නිලධාරින් වෙත සහන සැලැසීමේ අරමුණෙන් නිකුත් කළ අමාත්‍ය මණ්ඩල පත්‍රිකා පහ නැවත සමාලෝචනයට ලක්කරන්නැයි සමස්ත ලංකා දුම්රිය සේවකයන්ගේ පොදු සේවක සංගමය රාජ්‍ය පරිපාලන හා කළමනාකරණ අමාත්‍ය රංජිත් මද්දුමබණ්ඩාර මහතාගෙන් ඉල්ලා සිටී.
 
අදාළ අමාත්‍ය මණ්ඩල පත්‍රිකා මගින් සහන සලසා දී ඇති බොහෝ දෙනෙකු දේශපාලන පලිගැනීම්වලට ලක්වූවන් නොවන බවටත් දුම්රිය දෙපාර්තමේන්තුවට අදාළව කර ඇති සහන සැලැසීම්වලින් එහි පරිපාලනය විකෘති වී ඇති බවටත් එම සංගමය චෝදනා කරයි.

සමස්ත ලංකා දුම්රිය සේවකයන්ගේ පොදු සේවක සංගමයේ ලේකම් එස්.පී විතානගේ මහතාගේ අස්සනින් යුතුව නිකුත් කර ඇති ලිපියක් මගින් මෙම ඉල්ලීම කර ඇත.
 
මෙම සහන සැලැසීම නිසා විවිධ දුෂ්කරතා මැද වැඩ කළ සේවකයින්ට අසාධාරණයක් සිදුව ඇති බවට චෝදනා කරන හෙතෙම රටතුල යහපාලනය ගොඩනගන බවට ජනතාවට පොරොන්දු වූ ආණ්ඩුව ආණ්ඩුක්‍රම ව්‍යවස්ථාවේ 55 (1) ව්‍යවස්ථාවෙන් සැලසී ඇති ප්‍රතිපාදනයන් අනිසි ලෙස යොදාගැනීමක් මෙමගින් සිදුව ඇති බව පවසයි.
 
මෙම අමාත්‍ය මණ්ඩල තීරණ ක්‍රියාත්තමක කළහොත් වගකීම් සහිත තනතුරුවලට නුසුදුසු අය පත්වීමෙන් දුම්රිය පරිපාලනය බරපතල ලෙස කඩාවැටෙනු ඇති බව ද එම ලිපියේ වැඩිදුරටත් සඳහන් වේ.