(සිරංගිකා ලොකුකරවිට)

ගාල්ල මහ නගර සභා භූමියේ දී අද (25) ආරම්භ කෙරුණු දක්ෂිණ අන්තර් ජාතික පොත් ප්‍රදර්ශනයේදී ගීත රචක රත්න ශ්‍රී විජේසිංහ මහතාට දක්ෂිණ සාහිත්‍ය කීර්ති ස්වර්ණ සම්මානය පිරිනැමිණ. විජය පුවත් පත් සමාගමේ කර්තෘ මණ්ඩල අධ්‍යක්ෂ හා ලංකාදීප පුවත්පතේ ප්‍රධාන කර්තෘ සිරි රණසිංහ මහතාට ''දක්ෂිණ පුවත් කතු ශූරී ස්වර්ණ සම්මානය" පිරිනැමිණි.

දකුණු පළාත් සංවර්ධන අධිකාරිය විසින් සංවිධානය කරන ලද ''දක්ෂිණ අන්තර් ජාතික පොත් ප්‍රදර්ශනයේ දී  පසුගිය අධ්‍යාපන පොදු සහතික පත්‍ර සාමාන්‍ය පෙළ විභාගයෙන් සිංහල භාෂාවට දිවයිනේ වැඩිම ලකුණු ගත් සිසු සිසුවියන් හත් දෙනා අතරින් දකුණු පළාතේ පදිංචි සිසුන් තිදෙනා සඳහා දක්ෂිණ සිසු අභිමානී ස්වර්ණ සම්මානයද පිරිනැමිණි.

ඒ.යසමිණි අනුත්තර, සඳමිණි සෙනරත් පරණවිතාන සහ පී.තිවංකා රුවිෂානී යන සිසුවියෝ එම සම්මාන හිමිකර ගත්හ.

දකුණු පළාත් ප්‍රධාන අමාත්‍ය ශාන් විජයලාල් ද සිල්වා මහතාගේ සංකල්පයක් අනුව පැවැත්වෙන මෙම සම්මාන උළෙලේ දී දකුණු පළාතේ ජන්ම ලාභය ලබා දේශයේ කීර්තියට පත් පුද්ගලයන් වෙනුවෙන් හා සමස්ථ ලංකා ජයග්‍රහණ හිමිකරගන්නා දරුවන් වෙනුවෙන් සම්මාන පිරිනමනු ලබයි.

දක්ෂිණ අන්තර් ජාතික පොත් ප්‍රදර්ශනය ඉරිදා (29) දක්වා ගාල්ල මහ නගර සභා භූමියේ දී හා ධර්මපාල උද්‍යාන භූමියේ දී පැවැත්වේ.