(මනෝප‍්‍රිය ගුණසේකර)

මෛත‍්‍රීපාල සිරිසේන මහතා සහ රනිල් වික‍්‍රමසිංහ මහතා අතර ගිවිසුමක් ඇති බවට කූඨ ලෙස සකස් කළ ලියවිල්ලක් මාධ්‍ය වෙත ඉදිරිපත් කිරීමේ චෝදනා ලැබ සිටින එක්සත් ජාතික පක්‍ෂයේ හිටපු මහලේකම් තිස්ස අත්තනායක මහතාට විදෙස් ගතවීම සඳහා කොළඹ මහාධිකරණ විනිසුරු විකුම් කළුආරච්චි මහතා අද(20) අවසර ලබා දුන්නේය.

ජුනි මස 23 වැනිදා සිට ජුලි මස 12 වැනිදා දක්වා දින 19ක කාලයක් තිස්ස අත්තනායක මහතාට සිය දියණියගේ සුවදුක් බැලීමට ඔස්ටේ‍්‍රලියාවට යෑමට අවසර දුන් විනිසුරුවරයා අධිකරණය බාරයේ ඇති ඔහුගේ විදේශ ගමන් බලපත‍්‍රය මුදාහැරීමටද නියම කළේය.

මෙම නඩුවට අදාළව තිස්ස අත්තනායක මහතාට ඇප නියම කරන අවස්ථාවේදී අධිකරණයේ අවසරයකින් තොරව විදේශගතවීම තහනම් කරමින් නියෝගයක් පනවා තිබු අතර දියණියගේ සුවදුක් බැලීමට අවශ්‍ය වීම නිසා ඔහු මෙම ඉල්ලීම කරන ලදී.