2023 මාර්තු මස 27 වන සඳුදා
ත්‍රි රෝද රථ අනතුරින් දැරියක මරුට
(යක්කලමුල්ල විශේෂ ජේ.කේ.එල් චාමින්ද උණවටුණ ඩි.ජි සුගතපාල)
දෙවුන්දර දේවාලයේ ඇසළ පෙරහර නරඹා යලි නිවස බලා යමින් සිටි එකම පවුලේ පස්දෙනෙකු ගමන්ගත් ත්‍රි රෝද රථයක් ඊයේ (27) රාත්‍රි 11.30 පමණ දැඩැල්ල ප්‍රදේශයේ දි මාර්ගයෙන් ඉවතට පැන ගල්වැටියක වැදිමෙන් වු අනතුරකින් ත්‍රි රෝද රථයේ ගමන්ගත් දස හැවිරිදි වියේ පසුවු දැරියක් මියගොස් තවත් තිදෙනෙකු තුවාල ලබා කරාපිටිය ශික්ෂණ රෝහලට ඇතුලත්කොට ඇති බැව් ගාල්ල පොලිසිය කියයි.
ගාල්ල කොළඹ ප්‍රධාන මාර්ගයේ දඩැල්ල ප්‍රදේශයේ දි වු මෙම අනතුරෙන් මියගොස් ඇත්තේ දිනිති විදුසාරි දිදුලතා (10) නැමති මෙවර පහවසර ශිෂ්‍යත්ව විභාගයට පෙනීසිටීමට නියමිතව සිටි දැරියකි. මෙකී ත්‍රිරෝද රථය පදවා ඇත්තේ මියගිය දැරියගේ පියාවන අතර ඔහු තම බිරිද හා දරු තිදෙනා සමග ත්‍රි රෝද රථයෙන් දෙවුන්දර දේවාලයේ පැවති ඇසළ පෙරහැර නැරඹිමට ගොස් තිබේ. පෙරහැර නරඹා යලි නිවස බලා එමින් සිටියදි මෙම අනතුරට ලක්ව ඇත. අනතුරෙන් තුවාල ලබා පියා මව හා පස්හැවිරිදි වියේ පසුවන පුතෙකු කරාපිටිය ශික්ෂණ රෝහලේ ප්‍රතිකාර ලබයි. මොවුන් ගොනාපිනුවල ප්‍රදේශයේ පදිංචිකරුවෝ වෙති.
ත්‍රි රෝද රථය පැදවු මියගිය දැරියගේ පියාට නින්දයාම නිසා මෙම අනතුරවි ඇති බැව් පොලිසිය පවසයි. ත්‍රි රෝද රථය මාර්ගයෙන් ඉවතට පැන මිටර් 15ක් පමණ දුරට ඇදි ගොස් ගල්වැටියේ වැදි ඇති බවද පොලිසිය කියයි.ගාල්ල පොලිසිය අනතුර සම්බන්ද පරික්ෂණ පවත්වයි
