ජයන්ත සමරකෝන් සහ ශිරාන් රණසිංහ
 
ඒකාබද්ධ විපක්ෂයේ ඊයේ (5) පැවති ජනබල මෙහෙයුමින් කොළඹ නගරය මුළුමනින්ම අපවිත්‍ර වු බව කොළඹ නාගරික කොමසාරිස්  කේ.වී.ඒ අනුර මහතා පැවසීය.


නගරය නැවත යථාතත්වයට පත්කිරිම සඳහා අමතර කසල ලොරි හා සේවකයින් විශාල පිරිසක් යෙදවිමට සිදුවු බව ඒ මහතා කීය.


විශේෂයෙන්ම ලේක්හවුස් වටරවුම, ලෝටස් පාර, චිත්තම්පලම් ගාඩිනර් මාවත, ඩී.ආර්.විජේවර්ධන මාවත, කොම්පඤ්ඤවීදිය, කොටුව හා පිටකොටුව යන ප්‍රදේශ සම්පුර්ණයෙන්ම කැළිකසල වලින් පිරි ගොස්  තිබු බවයි.


කොළඹ ලේක්හවුස් වටරවුම ආශ්‍රිත මාර්ග සියල්ලෙහි ගොඩ ගැසී තිබූ හිස් වතුර බෝතල්, බියර් ටින්, හිස් අරක්කු බෝතල්, සටන් පුවරු මෙන්ම බත් පාර්සල්වල දවටන ආදී සියල්ල අද (6) උදෑසන වනවිට පවිත්‍ර කිරීමට කොළඹ මහනගර සභා කම්කරුවන්ට හැකි වී තිබිණි.


කොළඹ ලේක්හවුස් වට රවුම ආශ්‍රිත ප්‍රදේශයේ අලංකාරයට තබා තිබූ මල් පෝච්චි, මල් ගස් තැලී පොඩි වී ඇත.


ඊයේ(05) රාත්‍රී 11.30 පමණ සිට කොළඹ නගර සභා කම්කරුවන් විසින් මහත් වෙහෙස වී විනාශ කර අපවිත්‍ර කර තිබූ නගරය යළි ශුද්ධ කළ බව කොළඹ නගර සභාව කියා සිටී.