බිඟුන් මේනක ගමගේ 
 
රටේ පවතින ආර්ථික අර්බුදයට පිළිතුරු සෙවීමේ අරමුණෙන් භාරකාර ආණ්ඩුවක් පිහිටුවීමට ඒකාබද්ධ විපක්ෂය සූදානම් යැයි එක්සත් ජනතා නිදහස් සන්ධාන කොළඹ දිස්ත්‍රික් පාර්ලිමේන්තු මන්ත්‍රී ගාමිණි ලොකුගේ මහතා පවසයි.
 
ජනාධිපතිවරයා හා ඒකාබද්ධ විපක්ෂය අතර මිත්‍රශීලී දේශපාලන සාකච්ඡාවක් ආරම්භ වී ඇති බවට පළ වන මාධ්‍ය වාර්තා ප්‍රතික්ෂේප කරන්නේ යැයි කී හෙතෙම ජනාධිපතිවරයා භාරකාර ආණ්ඩුවකට ආරාධනා කළහොත් ඒකාබද්ධ විපක්ෂය ඊට සූදානම් යැයි  අවධාරණය කර කීය.
 
ආර්ථික අර්බුදයට ආණ්ඩුවට වැඩපිළිවෙළක් නැති බව එහි ප්‍රධානීන්ම පිළිගන්නේ යැයි ද එවැනි අවස්ථාවක කළයුත්තේ පක්ෂ භේදයෙන් තොරව එක්ව සාකච්ඡා කිරීම යැයි ද මන්ත්‍රීවරයා පැවසීය.
 
ලෝක ආර්ථික අර්බුදයක් පැමිණි අවස්ථාවේ පවා ලංකාවේ ජනතාවට එය නොදැනෙන සේ කළමනාකරණය කරගැනීමට පැවැති රාජපක්ෂ ආණ්ඩුව සමත් වී යැයි කී හෙතෙම අද ඊට වෙනස්ව රටට පැමිණෙන විදෙස් ආයෝජකයන්ගෙන් ද කප්පම් ගන්නා තත්ත්වයට ඇමැතිවරුන් පත්ව ඇතැයි චෝදනා කළේය.
 
ශ්‍රීලනිපයෙන් කැඩී පැමිණි පහළොස් දෙනාගේ කණ්ඩායමේ වැඩ ගැන පැහැදීමක් නැතැයි ද රට බේරාගැනීමේ භාරකාර ආණ්ඩුවක් වෙනුවෙන් ඕනෑම පාර්ශවයක් සමඟ සාකච්ඡා කිරීමට ඒකාබද්ධ විපක්ෂය සූදානම් යැයි ද ලොකුගේ මන්ත්‍රීවරයා වැඩිදුරටත් සඳහන් කළේය.