තුසිත කුමාර

අලුත්ගම දර්ගානගරයේ වැලිපිටියේදී දෙපිරිසක් අතර ඇතිවූ ගැටුමකින් පසු කැපුම් කෙටුම් තුවාල ලැබූ දෙදෙනකු අද (24) රාත්‍රී කළුතර නාගොඩ රෝහලට ඇතුළු කළ බව පොලිසිය කියයි.
 
මත්ද්‍රව්‍ය සම්බන්ධ සිද්ධියක් මෙම ගැටුමට හේතුවී ඇතැයි පොලිසිය පවසයි. 
මත්ද්‍රව්‍ය සම්බන්ධයෙන් චෝදනා එල්ලවූවකුට තවත් පිරිසක් ගොස් නැවත එවැනි වැරදි සිදු නොකරන ලෙස අවවාද කර ඇතැයි ද, ඊට කිපුණු පිරිසක් පසුව පැමිණ එම පිරිසට පහර දී ඇතැයි ද පොලිසිය සඳහන් කරයි.
 
සිද්ධියෙන් තුවාල ලැබූ තරුණයන් දෙදෙනකු දර්ගා නගරයේ රෝහලට ඇතුළත් කිරීමෙන් පසු කළුතර නාගොඩ මහ රෝහලට ඇතුළු කර තිබේ.   එක් පුද්ගලයුකුගේ හිසට තුවාල සිදුවී ඇතැයි ද ඔහු දැඩිසත්කාර ඒකකයට ඇතුළු කර ඇතැයි ද රෝහල් ආරංචි මාර්ග කියයි.
 
ගැටුමකට මූලික වූවකුගේ නිවසකට ද පහර දී ඇති බවත්, ප්‍රදේශයේ ආරක්ෂාව සඳහා අද (24) රාත්‍රී පොලිස් විශේෂ කාර්ය බළකාය යෙදවූ බවත් උසස් පොලිස් නිලධාරියෙක් කීවේය.