(නිමන්ති රණසිංහ)

කොළඹ රිමාන්ඩ් බන්ධනාගාරයේ සිටින තම සහෝදරයාගේ හෙරොයින් ජාවාරමට ආධාර උපකාර කරමින් විද්‍යුත් ක්‍රමයෙන් රුපියල් කෝටි 4 කට ආසන්න මුදලක් උපයාගත් බව කියන කොළොන්නාව නගර සභාවේ මුරකරුවකු ලබන 24 වැනිදා තෙක් රක්ෂිත බන්ධනාගාර ගත කරන ලෙස කොළඹ අතිරේක මහේස්ත්‍රාත් ප්‍රියන්ත ලියනගේ මහතා නියෝග කළේය.

මේ වන විට කොළඹ රිමාන්ඞ් බන්ධනාගාරගේ “ඒ” වාට්ටුවේ සිර අංක 1840 දරන “දනූෂ රසාංග” නැමැත්තා බන්ධනාගාරය තුළ සිටිමින් “විද්‍යුත් ක්‍රමයෙන්” හෙරොයින් ජාවාරම් කර රුපියල් කෝටි 05 කට අධික මුදලක් උපයාගත් බව කියන සිද්ධියක් සම්බන්ධයෙන් මුදල් විශුද්ධීකරණ පනත ප්‍රකාරව ආරම්භ කළ විමර්ශනයට අදාළව මෙම සැකකරු අත්අඩංගුවට ගෙන ඇතැයි අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කර තිබේ.

ඒ අනුව මෙලෙස රක්ෂිත බන්ධනාගාර ගත කරනු ලැබුවේ “දනූෂ රසාංග” යන අයගේ සහෝදරයා වූ නො. 26, අයි. ඩී. එච්. පාර, සාලමුල්ල, කොළොන්නාව ලිපිනයේ පදිංචි කොළොන්නාව නගර සභාවේ මුරකරුවකු වන කොකු හැන්දිගේ තිසර තරංග නැමැත්තාය.