නිමන්ති රණසිංහ

ඒකාබද්ධ විපක්ෂය විසින් හෙට (5) දින පැවැත්වීමට නියමිත උද්ඝෝෂණය සහ විරෝධතා පෙළපාළිය කුරුදුවත්ත මළලසේකර මාවතට ඇතුළු වී ජනාධිපති මන්දිරය අවට රැඳී සිටීමෙන් වළකින ලෙස ඉල්ලමින් කුරුදුවත්ත පොලිසිය කළ ඉල්ලීම කොළඹ ප්‍රධාන මහෙස්ත්‍රාත් රංග දිසානායක මහතා විසින් ප්‍රතික්ෂේප කරනු ලැබීය.

බුද්ධි අංශ කළ අනාවරණයකට අනුව මෙම උද්ඝෝෂකයින් පිරිස හෙට (5) රාත්‍රීයේ සිට පසුව දා දක්වා ජනාධිපති නිල නිවස අසල රැදී සිටින බවට ලද තොරතුරු අනුව මෙම ඉල්ලීම සිදු කළ බවට කුරුඳුවත්ත පොලිසිය අධිකරණයට දැනුම් දුන්නේය.

ඒ අනුව රජය පෙරැළීම හෝ රාජ්‍ය විරෝධී ක්‍රියාවක් සිදුවන්නේ නම් පොලිසිය සඳහන් කරන වගඋත්තරකරුවන් 11 දෙනකු අත්අඩංගුවට ගෙන අධිකරණයට ඉදිරිපත් කරන ලෙස නියෝග කළ මහෙස්ත්‍රාත්වරයා කුරුදුවත්ත පොලිසිය කළ ඉල්ලීම  අපරාධ නඩු විධාන සංග්‍රහයේ 106 (1) වගන්තිය අනුව කරන ලද ඉල්ලීම ප්‍රතික්ෂේප කළේය.

කුරුදුවත්ත පොලිසිය විසින් වගඋත්තරකරුවන් ලෙස නාමල් රාජපක්ෂ, රෝහිත අබේගුණවර්ධන,දිලුම් අමුණූගම,විමල් වීරවංස,උදය ගම්මන්පිල,වාසුදේව නානයක්කාර,ඩි.යු.ගුණසේකර,තිස්ස විතාරණ,අසංග නවරත්න,දිනේෂ් ගුණවර්ධන,ප්‍රසන්න රණතුංග යන අය නම්කර තිබිණි.