(සිරංගිකා ලොකුකරවිට)

කැබිනට් මණ්ඩලය තීන්දු තීරණ ගන්නේ රටේ අනාගතය ගැන දශක ගණනාවක් ඉදිරියට සිතා බලා බවත් එහි සිටින්නේ තොත්ත බබාලා නොවන බවත් ස්වදේශ කටයුතු අමාත්‍ය වජිර අබේවර්ධන මහතා අද(30) ගාල්ලේ දී පැවසීය.

“රජය ප්‍රතිපත්තිමය තීන්දු තීරණ ගන්නේ එක එක පක්ෂවලට ඕන විදියට නෙවෙයි, රටේ ජනතාව ගැන සහ රටේ අනාගතය ගැන දශක ගණනාවක් ඉදිරියට හිතලා.  කැබිනට් මණ්ඩලය විසින් සාකච්ඡා කරලායි මේ ප්‍රතිපත්තිමය තීන්දු තීරණ ගන්නේ සහ ක්‍රියාත්මක කරන්නේ. මම අද උදේ පත්තරේ දැක්කා විපක්ෂයේ මන්ත්‍රීවරු කියලා තියෙනවා කැබිනට් මණ්ඩලය දන්නෙත් නැතුව රටේ සමහර තීන්දු තීරණ ගන්නවා කියලා. කැබිනට් මණ්ඩලය හොඳට දැනුවත්, කැබිනට් එකේ ඉන්නේ තොත්ත බබාලා නෙවෙයි. මහජන ඡන්දයෙන් තේරී පත්වුණු ඇමතිවරුන්. ජනතාව තමයි ඔවුන් පත්කළේ රටේ ප්‍රතිපත්තිමය තීරණ ගන්න“

“කොග්ගල නිදහස් වෙළඳ කලාපය හදන්න යනකොට හබරාදුව ජනතාව විරුද්ධ වුණා, බෝර්ඩ් අල්ලගෙන හිටියා. දැන් හම්බන්තොට වරායට ආයෝජකයන් ගේන්න ගිවිසුම් අත්සන් කරනකොට තවත් පිරිසක් විරුද්ධ වෙනවා.  එයාලා පටු දේශපාලන වාසි ගැන විතරයි හිතන්නේ, අපි රජයක් විධියට මේ රටේ අනාගතය ගැන හිතනවා. හම්බන්තොට රැකියා දස දහස් ගණනක් බිහි කරන්න අපි සැලසුම් හදලා තියෙනවා. ඒවා ක්‍රියාත්මක වෙනවා. සුළුතරයකගේ විරුද්ධවීම් නොසලකා බහුතරයකගේ යහපත වෙනුවෙන් අපි වැඩ කරනවා“.

අමාත්‍යවරයා මේ බව පැවසුවේ ගාල්ල කඩවත් සතර ප්‍රාදේශීය ලේකම් කාර්යාලයේ දී අද (30) පැවති ගංවතුරෙන් විපතටපත් පවුල් 445කට රුපියල් ලක්ෂ36ක චෙක්පත් ප්‍රදානය කිරීමේ අවස්ථාවට සහභාගි වෙමිනි.