ඊසාන දින මෝසම් වැසි ඇරඹීමට පෙර උමා ඔය විනාශය හේතුවෙන් ඉවත් කිරීමට සුදානම් විය හැකි 1600 කට වැඩි පවුල් සඳහා අවම වශයෙන් රුපියල් 30,000 ක නිවාස කුලියක් ලබා දෙන ලෙස ශ්‍රී ලංකා මානව හිමිකම් කේන්ද්‍ර‍ය පරිසර සහ මහවැලි සංවර්ධන අමාත්‍යාංශයේ සහ බදුල්ල දිස්ත්‍රික්කයේ ලේකම්වරුන්ගෙන් ඉල්ලා සිටී.

මේ වන විට බණ්ඩාරවෙල ඇල්ල, වැලිමඩ ප්‍රදේශයන්හි නිවාස 4500 ක් හානි වී හෝ  ගිලා බැස හෝ ඇතැයි පවසන ශ්‍රී ලංකා මානව හිමිකම් කේන්ද්‍ර‍ය අද රජය විසින් ලබාදෙන රුපියල් 15,000 ක මුදලින් ගිලා නොබසින, ආරක්ෂිත නිවසක් නොව ‘හරක් මඩුවක්‘ හෝ කුලියට ගත නොහැකි බව එම කේන්ද්‍රයේ ප්‍ර‍ධානී කීර්ති තේන්නකෝන් මහතා පෙන්වා දෙයි.

2000කට වැඩි නේවාසික පාසල් දරුවන් ගිලා නොබසින, නගරයේ පාසල්වලට  ආසන්න නිවෙස් වෙත මාරු කිරීමට දෙමාපියන් දරණ උත්සාහය නිසා කුලී නිවාස මිල දෛනිකව ඉහළ යමින් ඇති බවත් ඔහු කියයි.

තෙන්නකෝන් මහතා පවසන්නේ රජය විසින් ස්වෙච්ඡාවෙන් උමා ඔය පීඩිත ජනතාවට ලබා දී ඇත්තේ ‘නිවාස කුලී‘ පමණක් බවයි. එබැවින් බණ්ඩාරවෙල, ඇල්ල, වැලිමඩ, හාලිඇල සහ උමා ඔය ව්‍යසනයේ බලපෑමට යටත් වී ඇති අනෙකුත් ප්‍රදේශයන් හි නිවාසවලින් ඉවත් කරනු ලබන පවුල් සඳහා අවම වශයෙන් රුපියල් 30,000 ක උපරිමයකට යටත්ව නිවාස කුලී ලබාදීමේ වැඩසටහනක් සකස් කරන ලෙස මානව හිමිකම් හිමිකම් සංවිධානයේ ප්‍ර‍ධානී කීර්ති තේන්නකෝන් මහතා ඉල්ලා සිටී.