(වයෝනිව්ස් ඇසුරිනි  - 055)
 
එල්.ටී.ටී.ඊ සංවිධානයට එරෙහිව කරන ලද යුද්ධයේදී ඉල්ලීමක් නොකරම ඉන්දියාව ශ්‍රී ලංකාවට උපකාර කළ බව ශ්‍රී ලංකා හිටපු ජනාධිපති මහින්ද රාජපක්ෂ මහතා ප්‍රකාශ කළේය. 

“ඉන්දියාව අපට යුද්ධයේදී උපකාර කළා. අපිට ඔවුන්ගෙන් උදවු ඉල්ලන්න අවශ්‍ය වුණේ නැහැ. මොකද මම කළේ ඔබේ යුද්ධයක්. ඉන්දියාවේ යුද්ධයක්. ඇත්තටම එය මගේ යුද්ධයක් නෙමෙයි” 
 
ඉන්දියාවේ වයෝනිව්ස් පුවත් සේවය සමඟ සම්මුඛ සාකච්ඡාවකට එක්වෙමින් ඒ මහතා මේ බව පැවසීය.   
 
“එල්.ටී.ටී.ඊ ය ඔබේ අගමැති රජිව් ගාන්ධි මහතා ඝාතනය කළා. එල්.ටී.ටී.ඊ ය ඔබේ රටේ බොහෝ දෙනෙක් ඝාතනය කළා. ඒ නිසා එය මගේ යුද්ධයක් විතරක් නෙමෙයි. එය ඉන්දියාවේත් යුද්ධයක්. එය මානුෂීය යුද්ධයක්.චීනය සහ පාකිස්තානය විතරක් නෙමෙයි අපට බ්‍රිතාන්‍ය සහ ඇමෙරිකාවත් උදවු කළා” යැයි ද රාජපක්ෂ මහතා ප්‍රකාශ කළේය.  
 
ඉන්දියාවේ බුද්ධි අංශය වන රෝ ආයතනය ශ්‍රී ලංකාවේ ඉකුත් ජනාධිපතිවරණයට මැදිහත් වූ බවට කළ ප්‍රකාශය සම්බන්ධයෙන් ද මෙම සම්මුඛ සාකච්ඡාවේදී මාධ්‍යවේදිනිය හිටපු ජනාධිපතිවරයාගෙන් විමසූ අතර අතීතය හාර ඇවිස්සිය නැති බව ඔහු එහිදි පැවසීය.
 
“මම ඔබේ අගමැතිවරයා නරේන්ද්‍ර මෝදි මහතාගේ මිත්‍රයෙක් යැයි සලකනවා. ඔහු ඔබේ රටට කර තිබෙන මම අගයනවා. ඔහු රට වෙනුවෙන් විශාල මෙහෙයක් කර තිබෙනවා. ඔහුට ජාත්‍යන්තරයේ තිබෙන පිළිගැනීම ඉතා විශිෂ්ටයි. ඔහු ඉන්දීය ඩයස්පෝරාවේ සහයෝගය ගන්න ආකාරය ජාත්‍යන්තර සමඟ කටයුතු කරන ආකාරය ඉතා ප්‍රශංසනීයයි. එය ඇගයිය යුතුයි. මට ඩයස්පෝරාවේ සහාය ගන්න බැරි වුණා. මම ඔහුගේ දේශප්‍රේමීත්වය, ජාත්‍යාලය අගයනවා. ඒ වගේම ඔහු ඉන්දීයාව නවීකරණය කිරීමේදී විශාල කාර්යභාරයක් කරනවා. අපි ඔහු අගය කරනවා. ඒ ගැන ප්‍රශ්නයක් නැහැ” යැයි රාජපක්ෂ මහතා කීවේය. 
 
ඉකුත් ශ්‍රී ලංකා ජනාධිපතිවරණයේදී ඉන්දීය අගමැති නරේන්ද්‍ර මෝදි මහතාගේ උපදෙස් පරිදි ජාතික ආරක්ෂක උපදේශක අජිත් දෝවාල්ගේ මෙහෙයවීම යටතේ රෝ බුද්ධි අංශය තමා පරාජය කිරීමට කටයුතු කළ බවට හිටපු ජනාධිපතිවරයා ජනාධිපතිවරණයෙන් පසුව ඉන්දියාවට චෝදනා කළේය.
 
ශ්‍රී ලංකාවේ පවතින සිංහල දෙමළ අර්බුදයට හොඳම විසඳුම 13 වැනි ව්‍යවස්ථා සංශෝධනය සම්පූර්ණ ලෙස ක්‍රියාත්මක කිරීම යැයි ඉන්දියාවේ අදහසයි.