ඩයනා උදයංගනී
 
වත්මන් රජය ගෙන යන වැඩපිළිවෙළ හරහා ඉදිරියේදී රට තුළ විශාල මූල්‍ය අර්බුදයක් හා ජනතා කැළඹීමක් ඇතිවිය හැකි බවත්, ආණ්ඩුවට එය වැළැක්විය නොහැකි නම් කළ හැකි කෙනෙකුට භාර දී ගෙදර යන්නැයි බලකිරීම 5 වැනිදා පවත්වන උද්ඝෝෂණයේ අරමුණ බවත් හිටපු අමාත්‍ය, කොළඹ දිස්ත‍්‍රික් එක්සත් ජනතා නිදහස් සන්ධාන මන්ත‍්‍රී සුසිල් ප්‍රෙමජයන්ත මහතා පැවසීය.
 
මැතිවරණ කල් දමමින් බලය ආරක්‍ෂා කරගැනීමට උත්සාහ ගන්නා වත්මන් රජයට එරෙහි ජනතා විරෝධතාව දැක්වීමේ වෙනත් ක‍්‍රමයක් නැතැයි ද ප්‍රේමජයන්ත මහතා කීවේය.
 
මෙරටට ඇනවුම් කර තිබූ ගුවන් යානා හතරක ඇනවුම් අවලංගු කිරීමෙන්, බැඳුම්කර වංචාවෙන් ආදී වශයෙන් රටට විශාල පාඩුවක් කර ඇති රජය වසර තුන හමාරක් තුළ වංචාව හා දූෂණය නැවැත්වූ බව කීම විහිළුවක් බව ද සුසිල් ප්‍රේමජයන්ත මහතා සඳහන් කළේය.
 
ඒ සියල්ල සලකා බලා විරෝධතාවට සාර්ථක කරගැනීමට ආණ්ඩුවෙන් ඉවත් වූ ශ්‍රී ලංකා නිදහස් පක්‍ෂ කණ්ඩායම ද සහය ලබාදෙන බව හෙතෙම වැඩිදුරටත් කියා සිටියේය.
 
හිටපු අමාත්‍ය සුසිල් ප්‍රේමජයන්ත මහතා මේ බව පැවසුවේ බොරැල්ලේ පිහිටි ඇන්. ඇම් පෙරේරා කේන්ද්‍රයේදී අද (3) පැවති මාධ්‍ය හමුවක් අමතමිනි.
ආණ්ඩුවෙන් ඉවත් වූ ශ්‍රී.ල.නි.ප කණ්ඩායම නියෝජනය කරන ලක්‍ෂ්මන් යාපා අබේවර්ධන, ඩිලාන් පෙරේරා යන මන්ත්‍රීවරු හා සුදර්ශනී ප‍්‍රනාන්දුපුල්ලේ මන්ත‍්‍රීවරියද මෙම මාධ්‍ය හමුවට සහභාගී වූහ.

ඡායාරූප - ගයාන් අමරසේකර