(මනෝප‍්‍රිය ගුණසේකර)
 
ඇවන්ට්ගාඩ් සභාපති නිශ්ශංක සේනාධිපති සහ විශ‍්‍රාමික මේජර් ජනරාල් පාලිත ප‍්‍රනාන්දු මහත්වරුන්ට එරෙහි නඩුව ජුනි 26 වැනි දා සිට විභාග කිරීමට කොළඹ මහාධිකරණ විනිසුරු ආර්. ගුරුසිංහ මහතා අද (19) නියම කළේය.

පාවෙන අවි ගබඩාවක් පවත්වාගෙන යෑමට කටයුතු සලසාදීම සඳහා රුපියල් ලක්‍ෂ 355ක මුදලක් පිරිනැමීම හා එම මුදල ලබා ගැනීමෙන් අල්ලස් පනතේ දුෂණය නමැති වරද සිදු කළැයි ඔවුන්ට එරෙහිව ඇති චෝදනාව වේ. 

මෙම නඩුව කැදවනු ලැබු අවස්ථාවේදී ඉදිරිපත් වු කරුණු සැළකිල්ලට ගනිමින් විත්තිකරුවන්ට විදේශ ගතවීමට අවසර දුන් කොළඹ මහාධිකරණ විනිසුරුවරයා නඩුව විභාග කරන දිනවල අධිකරණයේ පෙනී සිටිය යුතු බවට කොන්දේසියක් ද පැනවීය.

මෙම නඩුවේ පළමු විත්තිකාර විශ‍්‍රාමික මේජර් ජනරාල් පාලිත ප‍්‍රනාන්දු මහතාට මළල කී‍්‍රඩා සංගමයේ කටයුතු වලටත් මෙම නඩුවේ දෙවැනි විත්තිකාර ‘‘ඇවන්ට් ගාඩ්’’ සභාපති නිශ්ශංක සේනාධිපති මහතාට ප‍්‍රතිකාර ලබා ගැනීම සඳහාත් විදේශගත වීමට අවසර දෙන්නැයි ඔවුන් වෙනුවෙන් පෙනී සිටි ජනාධිපති නීතීඥ ගාමිණි මාරපන මහතා කළ ඉල්ලීමක් පිළිගත් විනිසුරුවරයා එලෙස නියම කළේය.

මෙම නඩුව සම්බන්ධයෙන් අධිකරණයේ පෙනී සිටි ඇවන්ට් ගාඩ් සභාපති නිශ්ශංක සේනාධිපති සහ විශ‍්‍රාමික මේජර් ජනරාල් පාලිත ප‍්‍රනාන්දු මහත්වරුන් ඇප මත මුදා හැරීමට නියම කළ විනිසුරුවරයා අධිකරණයේ අවසරයකින් තොරව විදේශ ගතවීම තහනම් කරමින් කොන්දේසියක්ද පනවනු ලැබ තිබු අතර එම ඇප කොන්දේසිය ලිහිල් කරමින් විනිසුරුවරයා නියෝගයක් ද පැනවීය.

මෙම නඩුව කැඳවනු ලැබු අවස්ථාවේදී ඇවන්ට්ගාඩ් සභාපති නිශ්ශංක සේනාධිපති සහ විශ‍්‍රාමික මේජර් ජනරාල් පාලිත ප‍්‍රනාන්දු මහත්වරුන් අධිකරණයේ පෙනී සිටියහ.

පැමිණිල්ල වෙනුවෙන් අල්ලස් කොමිසමේ සහකාර නීතී අධ්‍යක්‍ෂ තුෂාරී දයාරත්න මහත්මිය සමඟ නියෝජ්‍ය සොලිසිටර් ජනරාල් ජනක බණ්ඩාර මහතා පෙනී සිටියේය.

විත්තිකරුවන් වෙනුවෙන් නීතීඥ නවීන් මාරපන සහ නීතීඥ අජිත් පතිරණ යන මහත්වරුන් ඇතුළු නීතීඥ මඩුල්ලක් සමඟ ජනාධිපති නීතීඥ ගාමීණි මාරපන මහතා ද පෙනී සිටියේය.