(හාලිඇල- විජේරත්න රත්නායක )
 

ඇල්ල ප්‍රදේශයේ සංචාරක හෝටලයකදී ඇතිවූ ආරවුලකින් තුවාල ලැබූ විදේශීය සංචාරකයෙක් ප්‍ර‍තිකාර සඳහා බදුල්ල මහ රෝහලට ඇතුළත් කර තිබේ.


පිහි ඇනුමකින් තුවාල ලබා මෙසේ රෝහල් ගතකොට ඇත්තේ චෙක් ජනරජයේ  පුරවැසියෙකු වන මාටින් සෝවා නම් අයෙකු වන අතර සිද්ධිය සම්බන්ධයෙන් සැකපිට එම රටේම අයෙකු වන පීටර් මලීන් නම් පුද්ගලයෙකු ඇල්ල පොලීසිය මඟින් අත්අඩංගුවට ගෙන ඇත.


 චෙක් ජනරජයේ  පුරවැසියන් වන සංචාරක යුවළ දෙකක් ඇල්ල හල්පෙ ප්‍රදේශයේ හෝටලයක නතරවී ඇති අතර එම යුවළ දෙකේ පිරිමින් දෙදෙනා අතර ඇතිවූ ආරවුලකදී මෙසේ සැකකරු විසින් තුවාලකරුට පිහියකින් ඇනීමට උත්සාහ කිරීමේදී ඔහු තුවාල ලබා ඇතැයි වාර්තාවේ.


ඇල්ල පොලිස් ස්ථානාධිපති ප්‍ර‍ධාන පොලිස් පරීක්ෂක අලගියවන්න මහතාගේ උපදෙස් මත සිද්ධිය පිළිබඳව පරීක්ෂණ පැවැත්වෙන අතර සැකකරු බණ්ඩාරවෙල මහේස්ත්‍රාත්වරයා හමුවට ඉදිරිපත් කිරීමට පියවර ගෙන තිබේ.