(අංජුල මහික වීරරත්න,ඡායාරූප හා වීඩියෝ- ශාන්ත රත්නායක)

ආණ්ඩුව ගැන විශ්වාසයක් නැති අය විශ්වාසභංගය පරාජය කරන තුරු නොසිට තනතුරු බිම තබා ගෙදර යන්නැයි ජාතික ප්‍රතිපත්ති සහ ආර්ථික කටයුතු නියෝජ්‍ය අමාත්‍ය ආචාර්ය හර්ෂද සිල්වා මහතා මාධ්‍ය හමුවකදී අද (3) පැවැසීය.

එක්සත් ජාතික පක්ෂය තමන් සිටින ආණ්ඩුව විශ්වාස නැතැයිද අප ගෙදර යවපන් කියන ජාතියේ හරක් සෙට් එකක් නොවන බවද අමාත්‍යවරයා කීය.

පිටකෝට්ටේ සිරිකොත එක්සත් ජාතික පක්‍ෂ මුලස්ථානයේදී අද (3) මාධ්‍ය හමුව පැවැත්විණි.

අගමැතිට එරෙහි විශ්වාසභංගය පරාජය කිරීම සඳහා ජනවාරි 8 වැනි දා බලවේගය ඒ අයුරින්ම ඒකරාශී වී සිටින බවද ආචාර්ය හර්ෂද සිල්වා මහතා වැඩිදුරටත් පැවැසීය.

මෙහිදී අදහස් දක්වමින් පාර්ලිමේන්තු මන්ත්‍රී හෙක්ටර් අප්පුහාමි මහතා පැවසුයේ හෙට දවස වන විට අගමැති පාර්ලිමේන්තුවේ බහුතරය පිළිගන්න අග්‍රාමාත්‍යවරයා බවට පත්වන බවයි.