(මනෝප‍්‍රිය ගුණසේකර)
 
වැලිකඩ බන්ධනාගාරයේ රදවා සිටි රැදවියන්  27 දෙනකු  ඝාතන සිද්ධිය හා වනජීවී දෙපාර්තමෙන්තුවේ තිබු අලි ලියාපදංචි කරන පොත කූඨ ලෙස වෙනස් කර  බලපත‍්‍ර නොමැති අලි පස්දෙනෙකු ළඟ තබා ගැනීම සම්බන්ධයෙන් අලි ජාවාරම්කරුවකු බව කියන අලි රෝෂාන්, වනජීවී දෙපාර්තමේන්තුවේ නිලධාරීන් ඇතුළු  අට දෙනෙකුට එරෙහි නඩු විභාග කිරීම සදහා අගනිවිනිසුරු ජයන්ත ජයසුරිය මහතා විසින් විශේෂ ත‍්‍රිපුද්ගල මහාධිකරණ විනිසුරු මඩුලූදෙකක් අද (03)  පත් කරන ලදී.
 
 නීතීපති,  ජනාධිපති නීතීඥ දප්පුල ද ලිවේරා මහතා අගවිනිසුරු ජයන්ත ජයසුරිය මහතාගෙන් ඉල්ලීමකට අනුව මෙම විශේෂ ත‍්‍රිපුද්ගල මහාධිකරණ විනිසුරු මඩුලූ දෙක පත් කොට ඇති බව නීතීපතිවරයාගේ සම්බන්ධීකරණ නිලධාරිණි, ජ්‍යෙෂ්ඨ රජයේ නීතීඥ නිශාරා ජයරත්න මෙනවිය පැවසුවාය.
 වසර හතක කාලයකට පෙර වැලිකඩ බන්ධනාගාරයේ සිදුවු ගැටුමකින් පසු එහි රදවා සිටි රැදවියන්  27 දෙනාට  වෙඩි තබා ඝාතනය කරන ලදැයි කියන සිද්ධිය සම්බන්ධයෙන් කඩිනමින් යුක්තිය ඉෂ්ඨ කිරීම සදහා ත‍්‍රිපුද්ගල මහාධිකරණ විනිසුරු මඩුල්ලක් හමුවේ මෙම නඩුව විභාග කිරීම යෝග්‍ය  බව සඳහන් කරමින් වැලිකඩ රැදවියන් සමුහ ඝාතන සිද්ධියද, රටේ වන අලි සම්පත විනාශයට ලක් කළ මෙම ජාවාරම හේතූවෙන් සාමාජීය වශ්‍යයෙන් කැළබීමක් සිදු වු හෙයින් මෙම නඩුව ත‍්‍රිපුද්ගල මහාධිකරණ විනිසුරු මඩුල්ලක් හමුවේ විභාග කිරීම යෝග්‍ය  බව සදහන් කරමින් අලි නඩුවද විභාග කිරීම සදහා විශේෂ ත‍්‍රිපුද්ගල මහාධිකරණ විනිසුරු මඩුලූ පත් කරන ලෙස නීතීපතිවරයා විසින් අගවිනිසුරුවරයාගෙන් ඉල්ලීම්  කර  තිබිණි.
 
 වැලිකඩ රැදවියන් සමුහ ඝාතන සිද්ධිය සම්බන්ධයෙන් පොලිස් මත්ද්‍රව්‍ය නාශක කාර්යංශයේ පොලිස් පරීක්‍ෂකවරයකු ලෙස සේවය කළ දැනට පොලිස් ක්ෂේත්‍ර බළකා මුලස්ථානයේ රාජකාරි කරන නියෝමාල් රංගජීව සහ එවකට මැගසින් බන්ධනාගාරයේ බන්ධනාගාර අධිකාරීවරයා ලෙස කටයුතු කළ එමිල් රංජන් ළමාහේවා සහ බන්ධනාගාර බුද්ධි ඒකකයේ සේවය කළ ඉන්දික සම්පත් යන මහත්වරුන්ට එරෙහිව මෙම අපරාධයට අදාළව අපරාධ නඩු විධාන සංග‍්‍රහ පනත යටතේ අධි චෝදනා 33ක් යටතේ නඩු පැවරීමට නීතීපතිවරයා තීරණය කොට ඇත.
 
 අලි ජාවාරම්කරුවකු බව කියන සමරප්පුලිගේ නිරාජ් රොෂාන් හෙවත් අලි රෝෂාන් නමැත්තාට අමතරව වනජීවී දෙපාර්තමෙන්තුවේ සහකාර අධ්‍යක්‍ෂ (නීතී)  පැස්කුවල් ෆොන්සේකාලාගේ උපාලි පද්මසිරි, වන ජීවී දෙපාර්තමෙන්තුවේ අලි ඇතුන් ලියාපදිංචි අංශය බාරව සිටි ලිපිකාරිනි එච්. පි‍්‍රයංකා සංජීවනී, සමරප්පුලි හේවගේ උචිත නිශාන් ධම්මික, කඩුපිටියගේ චන්දන කුමාර, සෂික චානුක ගම්ලත්, පලිහපිටිය ගමගේ ජයලත්, රණසිංහලාගේ දමිත් චතුරංග යන වනජීවී දෙපාර්තමෙන්තුවේ නිලධාරීන් ඇතුථ පුද්ගලයින් අට දෙනෙකුට එරෙහිව අපරාධ නඩු විධාන සංග‍්‍රහ පනත යටතේ සහ පොදු දේපළ පනත යටතේ අධි චෝදනා 33ක් යටතේ නඩු පැවරීමට නීතීපතිවරයා තීරණය කොට ඇත.