IMG-LOGO

2024 පෙබරවාරි මස 29 වන බ්‍රහස්පතින්දා


මගේ ගුරුදේව එල්මෝ

මෙකල මරණය සුලභය. සමීපතමයකුගේ මරණය සම්බන්ධ පුවතක් නොඅසා ගෙවා දැමූ දවසක් නොමැති තරම්ය. මරණය එතරම්ම සුලභ වූ යුගයක වුවද එක්තරා මරණයක් සම්බන්ධව අනුවේදනීය ආරංචියකින් මම බෙහෙවින් සසලවීමි. මරණයක් සම්බන්ධ ආරංචියකින් මා මෙතරම් සසල වූ අවස්ථාවක් මට මතක නැති තරම්ය. මා හද සසල කළ මරණය සම්බන්ධවූ එපුවත එල්මෝ ගුණරත්න මහතා සම්බන්ධයෙනි. එපුවත මට ලැබුණේ සෙනසුරාදා පෙරවරුවේදීය.

මම අද ‘‘ඉරිදා ලංකාදීප’’ පුවත්පතේ ප්‍රධාන කර්තෘවරයා වෙමි. ඒසා දුර බැහැර ගමනක් මට ඒමට හැකිවූයේ එල්මෝ ගුණරත්න මහතා නිසා බව අපමණ කෘතවේදීත්වයෙන් යුතුව පළමුව මෙහි සටහන් කර තබමි. එතුමන්ගේ උපදෙස් හා ආශීර්වාදය නොවන්නට මෙබඳු ගමනක් මට සිහිනයක් පමණක් වන්නට ඉඩ තිබිණි.

මා පුවත්පත් කලාවට සම්බන්ධ වූයේ 1970 දශකයේ අගභාගයේ පමණ ටයිම්ස් ඔෆ් සිලෝන් ආයතනයේ ශ්‍රී ලංකාදීප පුවත්පත හරහාය. පොල්ගහවෙල වැනි කොළඹින් දුර බැහැර පෙදෙසින් පැමිණි අප වැනි පත්තරකාරයන්ට ලැබුණේ කුඩම්මාගේ සැලකිල්ලකි. නිදහස් මාධ්‍යවේදීන් වූ අපට කර්තෘ මණ්ඩලයට ඇතුල්වීමට පවා අවකාශයක් නොවීය. අප ලියාගෙන පැමිණි ප්‍රවෘත්ති විශේෂාංග පිළිගැනීමේ කවුන්ටරයට ලබාදී යාමට අපට සිදුවිය. ගමෙන් පැමිණි තරුණ පත්තරකාරයන්වූ අපට ඉංග්‍රීසි උගත් ටයිකෝට් පළඳින කොළඹ මහත්වරුන්ගේ පිළිගැනුම එපරිදි විය. එල්මෝ ගුණරත්න නම් කර්තෘවරයා අපට සුවිශේෂී වන්නේ එවන් පසුබිමකය.

සම්පූර්ණ යුරෝපීය ඇඳුමකින් සැරසී සිටි ප්‍රධාන කර්තෘවරයා වූ එල්මෝ ගුණරත්න මහතා ගමෙන් පැමිණි අපට සෙනෙහෙබර පියෙක් විය. දයානුකම්පාවෙන් අප දෙස බැලුවේය. ‘‘කොල්ලට හොඳ අනාගතයක් තියෙනවා. හරි විදියට යන්’’ එතුමා නිතරම කීවේය. දක්ෂයාට තැන දීමට එතුමා පැකිළුනේ නැත. එමෙන්ම දක්ෂයා හඳුනා ගැනීමට වැඩි කාලයක් ගත්තේද නැත. අපට මේසා දුරක් ඒමට හැකි වූයේ ඒ නිසාය. එතුමාගේ මරණය සම්බන්ධයෙන් මගේ සිත මෙතරම්ම සසල වී තිබෙන්නේද එහෙයිනි.

මා ශ්‍රී ලංකාදිපයේ කර්තෘ මණ්ඩලයට බඳවා ගැනීමේදී ද අපූරු සිදුවීමක් විය. ඒ වනවිට ටයිම්ස් ආයතනය රජයේ නිසි බලධාරියකු යටතට පත්කර තිබිණි. මා කර්තෘ මණ්‍ඩලයට බඳවා ගැනීමට නම් ඇමැතිවරයකුගේ ලිපියක් අවශ්‍ය බව එල්මෝ ගුණරත්න මහතා මට පැවසීය. එවැනි කිසිදු කෙනෙකු හඳුනන්නේ නැති බව මම කීවෙමි. සත්‍යම තත්ත්වය එය විය. එහෙත් රජයේ ආයතනයක් වූ ටයිම්ස් ආයතනයට බැඳීමට නම් ඇමැතිවරයකුගේ ලිපියක් අවශ්‍යම විය.

එකල කුරුණෑගල දිසා ඇමැති වශයෙන් සිටියේ ගාමිණී ජයවික්‍රම පෙරේරා මහතාය. මම ඒ මහතා හමුවී අවශ්‍යතාව සැළකර සිටියෙමි. ඒ මහතා මට ලිපියක් දුන්නේය. ඒ එක් කොන්දේසියකට යටත්වය. එනම් තමන් මෙසේ ලිපියක් දුන් බව පොල්ගහවෙල පාර්ලිමේන්තු මන්ත්‍රී සුනිල් රංජන් ජයකොඩි මහතාට කිසිම ලෙසකින් ආරංචි වීමට ඉඩ නොතබන ලෙස දැනුම් දෙමින්ය. මා ටයිම්ස් ආයතනයේ ශ්‍රී ලංකාදීප කර්තෘ මණ්ඩලයට එක් වූයේ ඒ අනුවය.

80 දශකයේ මුල් භාගයේදීම ටයිම්ස් ආයතනය වසා දැමුණි. එම ආයතනයෙන් පළකළ ප්‍රකාශනවල අයිතිය විජය පුවත්පත් ආයතනය නිල වශයෙන් හිමි කර ගත්තේය. එම බැරෑරුම් කටයුත්තේදී එල්මෝ ගුණරත්න මහතා සුවිශේෂී කාර්යභාරයක් ඉටු  කළේය. අද ලංකාද්වීපයම දිග් විජය කිරීමට සමත් පුවත්පත් ආයතනයක් බවට ලංකාදීපය පත්වී තිබේ. මෙම අතීත සැමරුම් මේ මොහොතේ හිතට බර වැඩිය.

විජය පුවත්පත් සමාගමට සම්බන්ධවීමේ අවශ්‍යතාව මට ඇති විය. ‘ඉතාම දක්ෂයෙක්. මොහු බඳවා ගන්න’ යනුවෙන් විජය පුවත්පත් සමාගමට ලිපියක් එවීමට තරම් එතුමා කාරුණික විය. මගේ පත්තර කලා ජීවිතයේ මහා රූපකායක්, පෞරුෂයක් වුවද ඇතැම් සන්ධ්‍යාවකදී ‘‘මචං දොඹේ’’ යැයි කීමට තරමට එතුමා අපගේ ජීවිතවලට සමිප විය.

විශේෂයෙන් සඳහන් කිරීමට යමක් තිබේ. එතුමාගේ මරණය සම්බන්ධ ප්‍රවෘත්තිය ඇසීමෙන් දෙටු පුත් දමිත ගුණරත්න ද අභාවප්‍රාප්ත වී තිබේ.  දමිතද අප සමග සෑහෙන කලක් පත්තර රස්සාවෙම නිරත විය. අනෙක් පුතු තුෂාර ගුණරත්නද ඉරිදා ලංකාදීපයේ නියෝජ්‍ය කර්තෘවරයකු වශයෙන් සේවය කළේය.
ජීවිතය යනු හමුවීම් හා වෙන්වීම්ය. හමුවන සියල්ලෝම හදවතේ ලැගුම් නොගනිති. එසේ ලැගුම් ගත් සහෘදයන් වෙන්වීම දරාගත නොහැකිය. එල්මෝ ගුණරත්නයන්ගේ මෙන්ම, දමිත් ගුණරත්නයන්ගේ වෙන්වීම් ඉදිරිපිට අප මෙතරම්ම සසලව සිටින්නේ එහෙයිනි. එහෙත් ජීවිතය මෙයය. අප එයට මුහුණ දිය යුතුය.

සහෘදයෙනි. ඔබලාට නිවන් සුව.

(***)
ආරියනන්ද දොඹගහවත්ත



අදහස් (3)

මගේ ගුරුදේව එල්මෝ

වර්නන් තිසේරා Monday, 30 August 2021 12:31 PM

එල්මෝ ගුණරත්න යනු මහත්මා ගුණයේ “ ගුණ රත්නයකි” අද ශ්‍රී ලංකාව වැනි රටක වර්තමාන මධ්‍යය ලෝකයේ ආත්මයකට සොයාගත් නොහැකි ! මම ද ටයිම්ස් ඔෆ් සිලෝන් ආයතනයේ ශ්‍රී ලංකාදීප පුවත්පතට 1984 සම්බන්ද වුන කාලයේ මෙතුමා අප ප්‍රධාන කතුවරයා විය මගේ රැකියාවට බඳවා ගැනීමේ සහ චිත්‍ර ශිල්පියෙක් ලෙස පත්වීමේ ලිපිය අත්සන් කරමින්, මගේ සහතික සහ මා අධ්‍යාපනය අවසන් කළ අනුරාධපුර ශාන්ත ජෝසප් මහා විදුහලේ විදුහල්පතිතුමා මට දුන් චරිත සහතිකය කියවා ඉතාමත් සුහදව “ඔබ වැනි ලාබාල තරුණයින් තමයි මේ පුවත් පත් කලාවේ අනාගතය. උපරිමය නිහතමානිව ඔබේ කාර්යය කරන්න ඒ වගේම ඔබේ පාසල් මාතාවගේ යුතුකම පළමුව රාජකාරිය පළමුව තේමා පථය තුල ඔබ වැඩකරන බව මම විශ්වාසකරනවා” යනුවෙන් පැවසීය.

:       0       3

Demuni Uduwara Monday, 30 August 2021 05:59 PM

ඔබට අතීතය අමතක නැත. එය හොඳ ගුණාත්මක භාවයකි.

:       0       1

W.liyanage Tuesday, 31 August 2021 10:58 AM

නිවන්සුව

:       0       0

ඔබේ අදහස් එවන්න

විශේෂාංග

හදිසියේ ඉස්මතු වූ ජනපති සටන
2024 පෙබරවාරි මස 28 1812 2

ශ්‍රී ලංකාවේ දේශපාලනයේ විවිධ ස්වරූප නව මානයකින් ප්‍රදර්ශනය වීමට පසුගිය සතියේ සිට පටන්ගෙන ඇති බව පෙනෙන්නට තිබේ. ජනතා විමුක්ති පෙරමුණ ජනාධිපතිවරණය සඳහ


සම්මාන මේනියාවෙන් රෝගී අපේ ප්‍රභූවරු
2024 පෙබරවාරි මස 28 290 0

‘සම්මාන මේනියාව’ අප රටේ බොහෝ දෙනකුට වැළඳෙන රෝගයකි. එය බොහෝ දේශපාලනඥයන්ට වැළඳෙන ‘රථගාය’ බඳු ය. ධනය ලැබූ පසු බොහෝ දෙනෙක් බලය පසුපස හඹායති. ඒ ගමනට සම්මාන ල


රාජ්‍ය ව්‍යාපාර පෞද්ගලීකරණය එකම විසඳුමද?
2024 පෙබරවාරි මස 27 349 6

ශ්‍රී ලංකාවේ රාජ්‍ය ව්‍යවසාය ඉතිහාසය නිදහසින් පසු ආණ්ඩු ආර්ථික සංවර්ධනයේ සහ ජාතිය ගොඩනැගීමේ මාවතකට අවතීර්ණ වූ යුගය දක්වා දිව යයි. 1950 සහ 1960 ගණන්වල ජනසතු


මල්වතු මහ නාහිමි ප්‍රකාශය අගයමු
2024 පෙබරවාරි මස 27 488 1

වර්තමාන පාලකයන් ඡන්දය කල් දැමීමට කටයුතු කළහොත් ඊට ඉඩ නොතබන ලෙස තිබ්බටුවාවේ ශ්‍රී සිද්ධාර්ථ සුමංගල මල්වතු පාර්ශ්වයේ මහ නා හිමියන් පසුගියදා සඳහන් කර ත


​ශක්තිමත් විකල්පයක් අවශ්‍ය ඇයි?
2024 පෙබරවාරි මස 26 374 3

ජනපතිවරණය, හැදෙන නව සන්ධාන සහ රට ගොඩනගන ආකාරය පිළිබඳව එක්සත් ජනරජ පෙරමුණේ නායක පාර්ලිමේන්තු මන්ත්‍රී පාඨලී චම්පික රණවක මහතා සමග කළ සාකච්‍ඡාව මෙවර සඳු


හොර දොස්තරලාගෙන් රෝගීන් බේරාගන්න බැරිද?
2024 පෙබරවාරි මස 26 307 2

අප රටේ ජනයා කවර කලෙක කළ පාපකර්මයක් ගෙවා දමමින් සිටින්නේදැයි සිතා ගත නොහැකි තරම්ය. නයන පිනවන මේ රන් දිවයිනේ ඉපදීම සම්බන්ධයෙන් ප්‍රීති ප්‍රමෝදයට පත් විය


මේවාටත් කැමතිවනු ඇති

හලාල් කවුන්සිලය, ජාතික තත්ත්ව සම්මාන උළෙලේදී සම්මානයට පාත්‍ර වේ 2024 පෙබරවාරි මස 19 393 0
හලාල් කවුන්සිලය, ජාතික තත්ත්ව සම්මාන උළෙලේදී සම්මානයට පාත්‍ර වේ

ශ්‍රී ලංකා ප්‍රමිති ආයතනය (SLSI) විසින් සංවිධානය කරන ලද, ශ්‍රී ලංකා ජාතික තත්ත්ව සම්මාන උළෙල (SLNQA) 2022 හි ඉහළ ගුණාත්මකභාවය වෙනුවෙන් වූ කැපවීම ඇගයෙමින් හලාල් ප්

නීතිමය විභේදනයත් සමඟම ශ‍්‍රී ලංකා ඉන්ෂුවරන්ස් නව ගමනක් අරඹයි 2024 පෙබරවාරි මස 13 338 0
නීතිමය විභේදනයත් සමඟම ශ‍්‍රී ලංකා ඉන්ෂුවරන්ස් නව ගමනක් අරඹයි

දශක 6කට අධික ඉතිහාසයකට උරුමකම් කියන ශ‍්‍රී ලංකාවේ පුරෝගාමී රක්ෂණ සමාගම වන ශ‍්‍රී ලංකා ඉන්ෂුවරන්ස් සිය ජීවිත හා සාමාන්‍ය රක්ෂණ ව්‍යාපාර නීත්‍යානුකූල

හලාල් කවුන්සිලය NCE අපනයන සම්මාන උළෙලේ දී රනින් පිදුම් ලබයි 2024 පෙබරවාරි මස 12 329 0
හලාල් කවුන්සිලය NCE අපනයන සම්මාන උළෙලේ දී රනින් පිදුම් ලබයි

හලාල් ප්‍රතීතන කවුන්සිලය (Halal Accreditation Council), ජාතික අපනයනකරුවන්ගේ මණ්ඩලයේ (NCE) සංවිධානත්වයෙන් 2023 දෙසැම්බර් 8වන දින පැවැත්වුණු 31 වැනි NCE අපනයන සම්මාන උළෙලේ දී අඛණ්

Our Group Site