තොපි දෙන්නා මැරුම් නොකා මෙතැනින් දුවපියව් නැත්නම් ඔලූ කටු කුඩු වෙන්නම තියනවා.
පුවක්පිටිය - කෙලින්වීදියේ 417 දරණ ස්ථානයේ පිහිටි වෙළඳසැලක් වෙත කඩාවැදුනු කොල්ලකරුවෙක් වෙළඳසැල ඉදිරිපිට සිටි සේවකයින් දෙදෙනකුට තර්ජනය කළේ ඔවුන් දෙසට ටී 56 ස්වයංක‍්‍රීය ගිනි අවියක් එල්ල කරමින්ය.

කොල්ලකරුවෝ ගිනි අවියක් අමෝරාගෙන කළ මේ තර්ජනය හමුවේ බියට පත්වූ සේවකයන් දෙදෙනා දිවගොස් නතරවී ඇත්තේ කඩය තුළය.
මුදලාලි සිටියේ කැෂියර් මේසය ළඟ පුටුවේ වාඩිවීය.

ටී. 56 ගිනි අවිය අතදරාගෙන සිටි කොල්ලකරු වීදුරු ෂෝකේස් එකකට මුවාවී මුදලාලි දෙසට ගිනි අවිය එල්ලකරගෙන සිටි අතරවාරයේ ඔහුගේ සහායට ආ අනෙක් කොල්ලකරු වටෙන් ගොස් නැවතී ඇත්තේ කැෂියර් මේසය ළඟය.

කැෂියර් මේසය ළඟ සිටියේ කඬේ අයිතිකරු වන සෙනරත් මුදලිගේ දොන් දීපාල් රොෂාන් මහතාය.
දීපාල් මහතා ප‍්‍රදේශයේ ලංකාදීප අලෙවි නියෝජිතයාගේ පුතෙකි.

කැෂියර් මේසය ළඟට ගිය කොල්ලකරු ලාච්චුව ඇර එහි තිබූ මුදල් කොල්ලකෑමට උත්සාහ දරා ඇත.
දීපාල් මහතා එක්වරම කැෂියර් මේසයට අත දැමූ කොල්ලකරුගේ අත වැරෙන් අල්ලා අඹරමින් සල්ලි කොල්ලකන්න එපා සී.සී.ටී.ටී කැමරා හයිකරලා තියෙන්නේ යැයි පවසා තිබේ.

ඔහු මෙවැනි ප‍්‍රකාශයක් කරන්නට ඇත්තේ සමහරවිට මේ කතාව අසා බියට පත්ව කොල්ලකරු මුදල් කොල්ලය නවතා පලායාවි යැයි සිතා විය හැකි බවට පොලිසිය සැක කරයි.

ගිනි අවියක් අමෝරාගත් තවත් කොල්ලකරුවෙක් ෂෝකේස් එකට මුවාවී සිටින බව දීපාල් මහතාට දක්නට නොමැති නිසා මුදල් කොල්ලයට එන්නට ඇත්තේ තනි එකෙක් පමණක් යැයි කියා එවැන්නක් සිතන්නට ඇතැයිද පොලිසියට සැක මතුවී තිබේ.

තම සගයා අල්ලාගෙන පහරදෙනු ඇතැයි බියට පත්වීම නිසා කොල්ලකරු දීපාල් මහතා දෙසට වෙඩි පිට වෙඩි තබා ඇත.
පුවක්පිටිය ප‍්‍රදේශයම බියෙන් ඇලලී ගොස් ඇත්තේ මහ? ඇසුණු වෙඩි හඬ නිසාය.

වෙඩි කෑ දීපාල් මහතා පුටුව මතට වැටී ඇති අතර යකෝ සල්ලි ටිකත් අරගෙන වරෙන් ඉක්මනට පැන ගත්තේ නැත්නම් අපිව කොටුවෙයි කල්ලියේ නායකයා සිය සගයාට අණ කළේය.

ලාච්චුවේ තිබූ මුදල් බෑගයක දමාගත් කොල්ලකරු කල්ලියේ නායකයා ද සමඟ දිවගොස් යතුරුපැදියක නැගී පලා යාමට වෙළඳසැල ඉදිරිපිටට පැමිණ ඇත.
දීපාල් මුදලාලිගේ කඩය දෙසින් වෙඩි හඬවල් කිහිපයක් ඇසුණු නිසා යාබද පිහිටි වෑල්ඩිං වැඩපොළක අයිතිකරුවෙක් කඬේ දෙසට පැමිණ ඇත්තේ ඒ ගැන විපරම්කර බැලීමටය.

කඬේ දෙසට දිව ආ පුද්ගලයාටද කොල්ලකරුවෙක් වෙඩි තබා ඇතත් ඔහුට වෙඩි වැදී නොමැත.
වෑල්ඩිං වැඩපොළේ අයිතිකරුගේ ජීවිතය බේරී ඇත්තේ අනූනවයෙනි.

වෙළඳසැල ඉදිරිපිටට නවතා තිබූ ඔවුන් පැමිණි යතුරු පැදියට ගොඩවූ කොල්ලකරුවෝ දෙදෙනා අඳුර කපාගෙන පලාගොස් ඇත්තේ විදුලි වේගයෙනි.
අවට පිරිස්ද කඩයට පැමිණ දීපාල් මහතා රෝහලට ගෙනගොස් ඇති අතර ඒ වනවිටත් ඔහු මියගොස් තිබිණි යැයි වෛද්‍යවරු පරීක්‍ෂාකර බලා පවසා ඇත.
අවිස්සාවේල්ල මූලස්ථාන පොලිස් ස්ථානාධිපති ප‍්‍රධාන පොලිස් පරීක්ෂක දුමිඳු සේනානායක මහතා ප‍්‍රධාන පොලිස් කණ්ඩායමක් සිද්ධිය සැළවූ සැණින් එහිගොස් පරීක්ෂණ ආරම්භකරනු ලැබූහ.

මේ සිද්ධිය වූයේ පසුගිය 24 වැනිදා රාති‍්‍ර කාලයේය.
කොල්ලකරුගේ වෙඩි පහරකින් අනූනවයෙන් ජීවිතය බේරාගත් වෑල්ඩිං වැඩපොළේ අයිතිකරුද පොලිසියට ප‍්‍රකාශයක් ලබාදී තිබේ.
සීතාවකපුර කොට්ඨාසය බාර ජේ්‍යෂ්ඨ පොලිස් අධිකාරි කිත්සිරි ජයලත් මහතාද සිද්ධිය වූ ස්ථානයට පැමිණ පොලිස් නිලධාරීන්ට අවශ්‍ය උපදෙස් හා මග පෙන්වීම ලබාදෙමින් පරීක්ෂණ මෙහෙවනු ලැබීය.

අවිස්සාවේල්ල මූලස්ථාන පොලිසියේ නිල සුනඛ හිලරි ද අපරාධය සිදුවූ ස්ථානයට කැඳවාගෙන පැමිණියේ පරීක්‍ෂණවලට සහායක් කර ගැනීමටය.
ටී 56 හිස් උණ්ඩ 03ක් පමණ අපරාධය සිදුවූ ස්ථානයේ වැටී තිබියදී සොයාගෙන ඇත්තේ අපරාධ ස්ථාන පරීක්‍ෂා කිරීමේ (සොකෝ* නිලධාරීන් විසිනි.
කොල්ලකරුවන් විසින් රුපියල් 70,000 ක පමණ මුදලක් කොල්ලකාගෙන පලාගොස් ඇති බවත් කොල්ලකරුවන් අල්වා ගැනීමට විශේෂ පොලිස් කණ්ඩායම් තුනක් යොදවා පුළුල් පරීක්ෂණ ආරම්භකර ඇති බවත් පොලිස් මාධ්‍ය ප‍්‍රකාශක ජ්‍යෙෂ්ඨ පොලිස් අධිකාරි නීතිඥ අජිත් රෝහණ මහතා පවසයි.
කොල්ලකරුවන් ගැන තවම කිසිදු හෝඩුවාවක් පොලිසියට ලැබී නොමැත.

සීතාවකපුර කොට්ඨාසය බාර ජ්‍යෙෂ්ඨ පොලිස් අධිකාරි කිත්සිරි ජයලත් මහතාගේ විශේෂ උපදෙස් මත අවිස්සාවේල්ල සහකාර පොලිස් අධිකාරි සරත් කුමාර මහතාගේ මෙහෙයවීම යටතේ අවිස්සාවේල්ල මූලස්ථාන පොලිස් ස්ථානාධිපති ප‍්‍රධාන පොලිස් පරීක්ෂක දුමිඳු සේනානායක මහතාගේ ප‍්‍රධානත්වයෙන් අපරාධ විමර්ශන අංශයේ ස්ථානාධිපති ප‍්‍රධාන පොලිස් පරීක්‍ෂක වීරසිංහ සහ උප පොලිස් පරීක්‍ෂක එල්.කේ.එම්.එම්.බී. අලවල යන මහත්වරුන් ඇතුළු පොලිස් කණ්ඩායමක් මේ සම්බන්ධව පරීක්ෂණ පවත්වාගෙන යයි.