හෙරොයින් මත්ද්‍රව්‍ය ග්‍රෑම් 5කට ආසන්න ප්‍රමාණයක් සන්තකයේ තබා ගනිමින් ප්‍රවාහනය කළේ යැයි කියන සිද්ධියකට අදාළව පන්නල පොලිසිය මගින් අත්අඩංගුවට ගනු ලැබූ ශ්‍රී ලංකා ක්‍රිකට් කණ්ඩායමේ වේග පන්දු යවන ක්‍රීඩක දේවපුරගේ ෂෙහාන් මධුශංඛ සහ ඔහුගේ මිත්‍රයකු ලබන 2 වැනිදා තෙක් රක්ෂිත බන්ධනාගාරගත කරන ලෙස කුලියාපිටිය වැඩබලන මහේස්ත්‍රාත් මාධව අධිකාරී මහතා නියෝග කළ බව සඳහන් පුවතක් අප පුවත්පත ඉකුත් දා වාර්තා කළේය.

කුඩුවලට කළ හැකි විනාශයේ තරම මෙම පුවතින් ද මනාව නිරූපණය වේ. ගමෙන් පැමිණ කොළඹ ක්‍රිකට් ක්‍රීඩාකර ජාත්‍යන්තරය දිනා පැහැබර අනාගතයකට හිමිකම් කී ජවාධික ක්‍රිකට් ක්‍රීඩකයකුගේ ලෝකය මුළුමනින්ම කුඩු පට්ටම් කර දැමීමට කුඩුවලට හැකිවිය. මෙම ක්‍රිකට් ක්‍රීඩකයා මත්ද්‍රව්‍ය ප්‍රවාහනය කරන්නකු, මත්ද්‍රව්‍ය බෙදාහරින්නකු මෙන්ම තදින්ම මත්ද්‍රව්‍යවලට ඇබ්බැහි වූවකු බවට තොරතුරු වාර්තා වී ඇතැයි පොලිස් ප්‍රකාශකයකු ප්‍රකාශ කළ බව ද අප පුවත්පත අමතර වශයෙන් වාර්තා කර තිබුණි.

රටක ජාතික ක්‍රිකට් කණ්ඩායම නියෝජනය කිරීමට වරම් ලැබීම අතිශයින්ම දුර්ලභ අවස්ථාවකි. දෙකෝටි විසිලක්ෂයක් ඉක්මවා ඇති ජනගහනයක් සහිත රටක ජාතික ක්‍රිකට් කණ්ඩායම නියෝජනය කිරීමේ වරම හිමිවන්නේ ක්‍රීඩකයන් 11 දෙනකුට පමණි. එම වරම හිමි කර ගැනීමට සෙස්සන් පරයා යන තරමේ සුවිශේෂී හැකියා සම්පත්තියක් තිබිය යුතුය. සෙස්සන්ට වඩා දස්කම් විස්කම් ප්‍රදර්ශනය කළ යුතුය. රොද බඳින ක්‍රීඩා ප්‍රේමීන් ආස්වාදයට පත් කරන ඔවුන් වසඟයට ගැනීමට සමත් අපූරු ක්‍රීඩා කෞෂල්‍යයක් තිබිය යුතුය.

තවමත් විසිපස් හැවිරිදි ෂෙහාන් මධුශංඛ ඒ සියලු රුව ගුණ තේජසින් සපිරිව ශ්‍රී ලංකා ජාතික ක්‍රිකට් කණ්ඩායමට එක් වූ ක්‍රීඩකයෙකි. 2018 වසරේදී බංග්ලාදේශයට එරෙහිව පැවැති සීමිත පන්දුවාර ක්‍රිකට් තරගාවලියේ දී ශ්‍රී ලංකා වරම් ලැබූ ෂෙහාන් මධුශංඛ තමන් සහභාගි වූ මංගල එක්දින තරගයේදීම පිට පිටම පන්දු තුනකදී කඩුලු ත්‍රිත්වයක් දවා ගනිමින් එම හපන්කම පෑ ලොව සිව්වැනි ක්‍රිකට් ක්‍රීඩකයා ලෙස ජගත් ක්‍රිකට් වංශ කතාවේ තමන් නමින් වෙනම පරිච්ජේදයක් වෙන් කර ගත්තේය. පහසුකම් අඩු, ගම්බදින් පැමිණ ජගත් ක්‍රිකට් පිටියේ වාර්තා පොත අලුත් කිරීමට සමත් වූ මෙම පැහැබර යෞවනයාට අද සිදු වී තිබෙන්නේ රිමාන්ඩ් බන්ධනාගාර ගත වීමටය. මෙතැනින් එහාට ඔහුගේ ලෝකය කෙසේ සකස්වේදැයි යන්න අපගේ අනුමානයෙන් එපිට පිහිටියකි.

ජාතික ක්‍රිකට් කණ්ඩායම නියෝජනය කරන ක්‍රීඩකයකු මත්කුඩු දැලට හසුකර ගතහොත් තමන්ගේ ජාවාරම් බොහෝ පහසුවෙන් කරගැනීමට හැකිවනු ඇතැයි ජාවාරම්කරුවන්ට සිතෙන්නට ඉඩ තිබේ. රටම දන්නා ක්‍රීඩකයකු වූ කල විශේෂ පරීක්ෂා කිරීම්වලින් තොරව මුර කපොලු පැන යා හැකි යැයි යමකුට සිතීම සාධාරණය. එය ගමින් ගමට පමණක් නොව රටින් රටට ද විය හැකිය. ජාත්‍යන්තර මට්ටමට යන ක්‍රීඩකයන් පරිස්සම් විය යුත්තේ එහෙයිනි.

මෙරට මත්ද්‍රව්‍ය ජාවාරම අතිශයින්ම ශක්තිමත් සේම මත්ද්‍රව්‍ය වැටලීම් ද සාර්ථකය. ඉතා රහසිගතව මහ මුහුදෙන් ප්‍රවාහනය කරන මත්ද්‍රව්‍ය තොග අත්අඩංගුවට ගැනීමට ආරක්ෂක අංශ සමත් වෙති. ලැබෙන කුඩා හෝ තොරතුරක් වූවද ඉවත නොහෙළා ඒවා හඹා යමින් රටම විමතියට පත් කිරීමට සමත් මෙරට ආරක්ෂක අංශ සමත් වූයේ වරක් දෙවරක් නොවේ.

ආරක්ෂක අංශවල උපක්‍රමශීලිත්වයත්, වේගවත් බවත් නිසාම මත්ද්‍රව්‍ය ජාවාරම්කරුවන්ට ද තම සුපුරුදු උපක්‍රම වෙනුවට අලුත් උපක්‍රම සොයා යෑමට සිදු වී තිබේ. ආරක්ෂක අංශවලට සැක නොසිතෙන පුරවැසියන්ගෙන් කෙනකු දෙදෙනකු හෝ කිහිප දෙනකු ඩැහැ ගැනීමට හැකි වුවහොත් එමඟින් විශේෂ බාධාවකින් තොරව තම ජාවාරම කරගෙන යාමට හැකියාවක් ලැබෙනු ඇතැයි ජාවාරම්කරුවෝ සිතති. ෂෙහාන් මධුශංඛ ගොදුරු වූයේ එවැනි දැලකටදැයි අපි නොදනිමු. එහෙත් වගකීම් සහගත ලෙස ක්‍රියා කළේනම්, තමන්ගේ හැකියා සම්පත්තිය කෙරෙහි විශ්‍වාසය තැබුවේනම්, තමන් රට නියෝජනය කරන තානාපතිවරයකු බඳු පුරවැසියකු බව තේරුම් ගත්තේනම් මෙබඳු මර උගුල් පහසුවෙන් මග හැර ගත හැකිව තිබිණි.

ෂෙහාන් මධුශංඛ ගේ ඉරණම සෑම පුරවැසියකුගේම අවධානයට යොමු විය යුත්තේ ඊළඟ ගොදුර තමන් විය හැකි බව තේරුම් ගත යුතු හෙයිනි. ඊළඟ ගොදුර තමන්ගේ ජීවිතයේ සමීපතමයා විය හැකි හෙයිනි. අටවා තිබෙන්නේ මර උගුල්ය. ඒවා පියවි ඇසට නොපෙනෙන්නේය. පියවි සිහියෙන් මෙන්ම හොඳ අවබෝධයකින් කටයුතු කළයුතු වන්නේ එහෙයිනි.