ඝාතනය කෙරුණු පොලිස් නිලධාරියා

මෑත කාලයේ සිට දිවයින පුරා අපරාධවල ශීඝ‍්‍ර වර්ධනයක් දක්නට ලැබේ. මංකොල්ල කෑම්, මිනීමැරුම් පැහැරගෙන යාම්, කප්පම් ගැනීම් සොරකම් පසුගිය දිනවල නොකඩවා වාර්තා වන්නට විය. නවීන තාක්‍ෂණයේ සීසීටීවී කැමරා මගින් කොල්ලකෑම් කෙරෙන ආකාරය රටටම වාර්තා වූයේ ජනතාවගේ සිත්සතන්වල සිය, සංත‍්‍රාසය ඇති කරවමින්ය.

පොලිසිය එම අභියෝග පසුපස හඹායද්දී අවසානයට සිදුවූයේ පොලිසියේම නිලධාරීන් දෙදෙනකුම පැහැර ගැනීමට ලක්වීමය. කිසියම් නාඳුනන අවිගත් කල්ලියක් පසුගිය අඟහරුවාදා (6) මෙසේ පැහැරගනු ලැබුවේ කුරුණෑගල මූලස්ථාන පොලිසියේ රථවාහන අංශයේ සේවයේ යෙදී සිටි කොස්තාපල්වරු දෙදෙනෙකි. මෙසේ පැහැරගන ගනු ලැබූ කොස්තාපල්වරුන් දෙදෙනා ඒ වන විට රාජකාරියේ නිරතව තිබුණේ කුරුණෑගල දඹුල්ල ප‍්‍රධාන මාර්ගයේ ගැට්ටුවාන මංසන්ධිය අසලය. ඒ වන විට වේලාව අලූයම දෙක හෝ තුන වන්නට ඇත.

දඹුල්ල මාර්ගයේ මේ මංසන්ධියේ සිට මහනුවර සහ කොළඹ ප‍්‍රධාන මාර්ගවලට පිවිසීමට ප‍්‍රධාන අතුරු මාර්ගයක් පවතින බැවින් මේ ස්ථානයේ පැය විසිහතර පුරාම රථවාහන අංශයේ නිලධාරීන් රාජකාරියෙහි යොදවා තිබේ. ඔවුන්ගේ රාත‍්‍රි වැඩ මුරය රාත‍්‍රි 10.00 සිට උදෑසන 6.00 දක්වා ක‍්‍රියාත්මකය. ඒ අනුව පසුගිය සඳුදා (7) රාත‍්‍රි රාජකාරි ආවරණයට ගිය කොස්තාපල් චන්දන සම්පත් බණ්ඩාර (43)පැහැර ගැනීමෙන් පසුව වෙඩි තබා ඝාතනය කෙරිණි. ඒ කුරුණෑගල බඩගමුව රක්ෂිතය ආශ‍්‍රිතව පිහිටි රණවන ප‍්‍රදේශයේදීය.

එහිදී දිවි බේරාගත් කොස්තාපල් අජිත් වීරසූරිය කුරුණෑගල ශික්ෂණ රෝහලේ ප‍්‍රතිකාර ලබමින් සිටියි.

ඝාතනය සිදුව තිබෙන ස්ථානය කුරුණෑගල සිට බුදනාපිටිය හරහා වැල්ලව දක්වා වූ මාර්ගයේ ජනාකීර්ණ ස්ථානයකි. එහි පිවිසෙන මාර්ගයේ බඩගමුව රක්ෂිතයේ ජනශූන්‍ය ස්ථාන රැුසක් හමුවන අතර ඒවා මගහැර පැමිණ මෙවැනි ජනාකීර්ණ ස්ථානයකට පැමිණ ඝාතනය කිරීම ද පොලිසියට ගැටලූවක්වී තිබේ.
කොස්තාපල්වරුන් දෙදෙනාට පහරදී ඔවුන්ගේ නිල ඇඳුම් සමග යට ඇඳුම් පවා ගලවාගන සම්පූර්ණයෙන්ම ඔවුන් නිරුවත් කොට මේ අපරාධය කර තිබෙන බවද පොලිසිය සඳහන් කරයි.

මෙම පැහැර ගැනීමට හේතුව කුමක්දැයි අනාවරණයවී නැතත් පැහැර ගැනීමට පෙර පොලිස් නිලධාරීන් සිටි ස්ථානයට රාත‍්‍රියේ තනිව පැමිණි තරුණ කාන්තාවක් පිළිබඳව ද පරීක්‍ෂණ මෙහෙවන පොලිස් කණ්ඩායම්වල අවධානය යොමුවී ඇත.

එම තරුණ කාන්තාව තනියෙන් රාත‍්‍රියේ  පාරේ යන්නේ ඇයිදැයි පොලිස් නිලධාරීන් දෙදෙනා විමසූ අවස්ථාවේදී තමන් සැමියා සමග බහින් බස්වී අමනාපව කුරුණෑගල වැව රවුමේ පිහිිටි තම මහගෙදරට යන බව ඇය පවසා ඇත. ඒ අවස්ථාවේදී පැමිණි මෝටර් රථයකට එම කාන්තාව ගොඩවී ඇති අතර මෝටර් රථය පඳවාගෙන පැමිණ ඇත්තේ එම කාන්තාවගේ සැමියා විය හැකි බව පොලිසිය සැක කරයි. පසුව පැහැර ගත් පිරිසද පොලිස් නිලධාරීන් දෙදෙනාට පහර දෙමින් මෙම කාන්තාව පිළිබඳව ද ප‍්‍රශ්න කර ඇත. ‘‘තොපි දෙන්නා අර ලස්සන ගෑනිත් එක්ක ටෝක් එක දාගෙන හිටියා නේද? යනුවෙන් ඔවුන් විමසූ බව වාර්තාවේ.

මෙයින් පෙනී යන්නේ අපරාධකරුවන් පිරිස රාත‍්‍රියේ තනිව මහමග ගිය එම කාන්තාව පිළිබඳව අවධානයෙන් සිට ඇති බවය. ඇතැම් විට එම කාන්තාව පැහැර ගැනීමේ අදහසක් ඔවුන් තුළ තිබෙන්නට ඇති බවටද පොලිසිය සැකකරයි. මේ නිලධාරීන් දෙදෙනා ඊට බාධාවක් වීම ඔවුන්ගේ කෝපයට හේතු වූවා විය හැකිය.

අවිගත් කොල්ලකරුවන්ගෙන් දිවිගලවාගත් කොස්තාපල් අජිත් වීරසූරිය මහතා තමන් මුහුණ දුන් එම බිහිසුණු අත්දැකීම මෙසේ විස්තර කළේය.
”-මමයි සම්පතුයි ගැට්ටුවාන හන්දියේ රාජකාරියට ගියේ රාත‍්‍රි දහයට. අපි පසුවදා පෙරවරු හය වෙනකල් එම ස්ථානයේ රාජකාරියේ යෙදිය යුතුව තිබෙනවා. අපි දෙන්නා රාජකාරියේ යෙදී සිටියදී රාත‍්‍රි දොළහට පමණ අපි ආසන්නයේම සුදු පාට හයිබි‍්‍රඞ් කාර් එකක්් නතර කළා. ඒකෙන් බැහැලා කලබලයෙන් වාගේ ගැහැණු කෙනෙක් අපි දිහාට ආවා. ඇය අපිට පැවසුවා කාරයේ සිිටින්නේ තම සැමියා බවත් ඔහු ඇයට කරදර කරන බවත්. අපි ඒ ගැන විස්තර විමසනකොටම ඇගේ සැමියා නැවත ඇයව මෝටර් රථයට නංවාගන එම ස්ථානයෙන් පිටව ගියා.''
 

දිවි බේරාගත් පොලිස් නිලධාරියා

‘‘ඒ මෝටර් රථය අපි සිටිය ස්ථානයෙන් පිටත්ව යනවාත් සමඟම මා දුටුවා වෑන් රථයක් දඹුල්ල දෙස සිට අපි සිටින දෙසට ඉතාම සෙමින් ධාවනය වෙනවා. එහි ගමන් විලාසය සැක බව මා සම්පත්ට කීවා. සම්පත් කීවා අපි ඒක නවත්තලා පරීක්‍ෂා කරමු කියලා.''

‘‘ඒ අනුව මා අත තිබූ විදුලි පන්දම දල්වලා එම වෑන් රියට නවත්වන ලෙස අණ කළා. වෑන් රිය අපේ නියෝගයට අනුව අපි ඉදිරිපිටින් නැවැත්තුවාම මමයි සම්පතුයි දෙන්නම ගියා ඒ වෑන් රිය අසලට. අපි දෙන්නා වෑන් රථයේ දෙවැනි දොර අසලට ළංවෙනවාත් සමඟම එක්වරම අපි බලාපොරොත්තු නොවූ ආකාරයට වෑන් රියේ ඇතුළේ සිටි පුද්ගලයෙක් ටී පනස්හය :ඔ 56* ගිනි ආවියක් ලෝඞ් කරලා අපි දෙන්නාගේ හිසට එල්ල කරලා නැගපියව් දෙන්නාම කියලා තර්ජනය කළා.

‘‘ගිනි අවියක් එල්ල කරලා තිබුණු නිසා අපිට ඒ වෙලාවේ කිසිම දෙයක් කරගන්න බැරිව ගියා. අපි දෙන්නා වෑන් රියට නැග්ගාම එහි රියැදුරාත් සමග හතර දෙනෙක් සිටින බව දුටුවා. ඔවුන් සියලූදෙනාම කළුපාට රෙදිකඩවලින් ඇස් වසාගෙන හිටියා. අපිට ටී පනස්හය ගිනි අවිය එල්ල කළ කෙනාට අමතරව, වෑන් රියේ සිටි තවත් දෙදෙනකු අත පිස්තෝලයක් සහ කඩුවක් තිබුණා.”

‘‘අපි දෙදෙනාම වෑන් රියේ මැද තිබුණු සීට් එකක වාඩි කරවලා ඔවුන් අපේ විස්තර විමසන්න පටන් ගත්තා. අපේ සේවා කාලය, බැඳලාද නැද්ද, දරුවෝ ඉන්නවාද, පදිංචිය කියලා අහලා ඇයි තොපි පිස්තෝල ගෙනාවේ නැත්තේ කියලත් ඇහුවා.”

‘‘ඊළඟට අපෙන් ඇහුවා පොලිසියේ තොපි ජරාව කනවා නේද කියල. අර කාර් එකෙන් බැස්ස බඩුවත් එක්ක තොපි ටෝක් එක දැම්මා නේද කියලත් ඇහුවා. එතකොට මට තේරුම් ගියා අපි ඊට පෙර හයිබි‍්‍රඞ් කාර් එකෙන් ආව ගෑණු කෙනා සමග කතා කරපු ආකාරය දිහා මේ පිරිස අවධානයෙන් බලා හිටිය බව. මොවුන් සිතාමතාම වෑන් රිය අපි අසලට පදවාගෙන පැමිණ තිබූ බවත් මට තේරුම් ගියා.

‘‘එහෙම ප‍්‍රශ්න කරලා ඔවුන් අපි දෙන්නාටම පහර දෙමින් පරුෂ වචනයෙන් බැණ වැදුණා. ඊළඟට ගිනි අවි අපිට එල්ල කරලා අපේ ඇඳුම් සියල්ල ගලවන්න අණ කළා. අපි කරන්නම දෙයක් නැති නිසා ඇඳුම් ගලවන්න වුණා. යට ඇඳුම් පමණක් නොවෙයි සපත්තු මේස් පවා ගලවන ලෙස ඔවුන් අපිට තර්ජනය කළා. මේ නිසා අපි සම්පූර්ණයෙන්ම නිර්වස්ත‍්‍ර වුණාම ඔවුන් අපි දෙස බලා සිනහාවීමට පටන් ගත්තා.”

‘‘ඒ වෑන් රථය ගැට්ටුවාන හන්දියෙන් යූ ටර්න් ගහලා හරවලා ආපසු දඹුල්ල දෙසට ගමන් කරමිනුයි සිටියේ. වෑන් රථය බඩගමුවේ සම්බෝධී විහාරය අසලින් රණවන පාරට හරවලා කැලය මැද්දෙන් ඉදිරියට යන බව තේරුණා. ඒ යන අතරේ ඉස්සරහා සීට් එකේ හිටිය දෙන්නා රහසින් වාගේ මොනවාදෝ කතා කරනවා ඇසුණා.”

‘‘වෑන් රථය කැලය කොටස පසු කරලා රණවන හන්දියෙනුත් ඉදිරියට ඇවිල්ලා ගෙවල් තියෙන ස්ථානයක නැවැත්තුවා. මා සිතුවා අපි මේ ස්ථානයේ බස්සලා යයි කියලා. අපි දෙන්නාටම වෑන් එකෙන් බහින්න කියලා ටී පනස් හය ගිනි අවිය අතේ තිබුණු කෙනාත් වෑන් එකෙන් බැස්සා. අපි දෙන්නාව ඉස්සරහාට තල්ලූ කරනවාත් එක්කම මට ඇහුණා වෙඩි ශබ්දයක්.”

‘‘සම්පත් අම්මෝ කියාගෙන වැටෙනවා මම දුටුවා. මට තේරුම් ගියා ඒ මිනිහා සම්පත්ට වෙඩි තැබුවා කියලා. ඒ වෙලාවේ මට මරණ බයක් ඇති වුණා. මට සිතුණා ඊළඟ ඉලක්කය මට තමයි කියලා. මේ නිසා කොහොම හරි ජීවිතය බේරාගන්න  ඕනෑ කියලා මම පැනලා ඒ පුද්ගලයා සමඟ පොර බැදුවා. කොහොම හරි තුවක්කුව උදුරාගන්න  ඕනෑ කියලා.”

‘‘පොර බදද්දී ටී පනස් හය ගිනි අවියේ පතරොම් ගැබ කොටස මගේ අතට අහුවුණා. මම ඒ කොටස ගලවලා දමලා එතනින් පැනලා ඉදිරියේ තිබුණු නිවසක ලයිට් එළියක් දෙසට දුවගෙන ගියා. ඒ අතරේ තවත් වෙඩි ශබ්දයක් මට ඇසුණා. මම දුවගෙන ගිිහින් නිවසක් පිටුපස වගේ කොටසක සැඟවුණා. ඒ වෙලාවේ අපි පැහැරගෙන ආ වෑන් රථය ආපසු හරවගෙන වේගයෙන් යනවා දුටුවා.”

තම සැමියාගේ අකල් මරණයෙන් දැඩි කම්පනයට පත්ව සිටින සම්පත් මහතාගේ බිරිඳ වන අනෝමා රත්නායක මහත්මිය පැවසුවේ මෙවැනි දෙයකි.
‘‘මගේ මහත්තයා බෝධි සත්වයෙක් වගෙයි. එයා අරක්කු, සිගරට්වත් බොන කෙනෙක් නෙවෙයි. මටයි දරුවන් දෙන්නටයි වගේම ගමේ අයටත් එයා හරිම ආදරයෙන් කරුණාවෙන් සැලකුවා.”

‘‘මහත්තයාගේ බෝධිසත්ව ගතිගුණ නිසා මම හැම වෙලාවෙම කිව්වෙ ඔයා වගේ කෙනෙක් පොලිසියට ගැලපෙන්නෙ නැහැ කියලා. එහෙම හිටපු මගේ මහත්තයව තමයි මේ වාගේ තිරිසන් විදිහට මරලා දැම්මේ. මේ කරපු අපරාධයට හෙණ හතම වදින්න  ඕනෑ” යැයි ඇය වේදනාවෙන් වැළපෙමින් පැවසුවාය.  
‘‘මෙම අපරාධය අහම්බෙන් සිදුවූවක් නොව එම අවිගත් කල්ලිය විසින් සැලසුම්ගතව සිදු කරන ලද්දක් බවට පොලිස් පරීක්‍ෂණවලින් අනාවරණය කරගෙන තිබේ. මෙම පිරිස ඔවුන්ගේ දෑස් කළු රෙදිකඩවලින් ආවරණය කරගෙන සිටීමෙන්ම ඔවුන් යම්කිසි අපරාධයක් කිරීම සඳහා සංවිධානාත්මකව පැමිණ සිටි පිරිසක් බව පැහැදිලි වේ. එසේම කොස්තාපල් වීරසූරියගේ ප‍්‍රකාශවලට අනුව එම පිරිස යම් වෙලාවක් ගැට්ටුවාන මංසන්ධියේ සිටි කොස්තාපල්වරු දෙදෙනාගේ කටයුතු පිළිබඳව නිරීක්‍ෂණය කරමින් සිට ඇති බවද පෙනී යයි.

රාත‍්‍රී දොළහ පසුවී තිබූ එම වේලාව සාමාන්‍යයෙන් මාර්ගයක රථවාහන බොහෝ අඩුවෙන් ධාවනය වන කාලයකි. කොස්තාපල් වීරසූරිය පවසන ආකාරයට එවැනි අවස්ථාවක වාහනයක් සැකකටයුතු ආකාරයෙන් ධාවනය කෙරෙයි නම් එය පොලිසියේ සැකයට හේතු වන්නක් බැවින් අපරාධකරුවන්ටද පොලිසියේ  අවධානය ඔවුන් වෙත යොමු කර ගැනීමේ අරමුණින් සෙමින් ධාවනය කරවූවා විය හැකිය.

මෙම සිදුවීම පිළිබඳව බැලීමේදී සිද්ධියට ගොඳුරුවූ කොස්තාපල්වරු දෙදෙනාගේ කටයුතුද ගැටළු සහගත බව පෙනී යයි.

විශේෂයෙන්ම මෑත කාලයේ පැනවූ පොලිසියේ නීතිරීතිවලට අනුව පොලිසියෙන් බැහැරව රාජකාරී කටයුතුවලට යාමේදී පොලිස් නිලධාරීන් අනිවාර්්‍යයෙන්ම ගිනි අවියක් රැුගෙන යා යුතු වුවද එදින රාත‍්‍රි රාජකාරියට පවා කිසිදු ගිනි අවියක් රැුගෙන ගොස් නොතිබීමද අවධානයට ලක්විය යුතු වැදගත් කරුණකි. අඩුම තරමින් රථවාහන පොලිස් නිලධාරීන් නිතරම රැුගෙන යන පිස්තෝලය පවා මොවුන් එදින රැුගෙන ගොස් නොතිබුණි. අනතුරක් හේතුවෙන් තම අතක පවතින ආබාධයක් නිසා ටී පනස් හය රැුගෙන නොගිය බවත් දෙදෙනකු යන අවස්ථාවක එක් අයකු පමණක් ගිනි අවියක් රැුගෙන යාම තහනම් බැවින් දෙදෙනාම ගිනි අවි රැුගෙන නොගිය බවත් කොස්තාපල් වීරසූරිය පොලිසියට ලබාදුන් ප‍්‍රකාශයේ සඳහන් වේ.

නමුත් අවම තරමේ ඔවුන් සැහැල්ලූ පිස්තෝලයක් හෝ ගෙන ගියා නම් මෙවැනි විපතකින් බේරීමට එම අවිය ඉවහල් කර ගැනීමට බොහෝ දුරට ඉඩකඩ තිබුණි.

එසේම රාත‍්‍රී රාජකාරියක් සඳහා රථවාහන නිලධාරීන් රැුගෙන යා යුතු -වෝකි ටෝකි” ගමන්කථනද එදින මොවුන් රැුගෙන ගොස් නොතිබුණි. බොහෝ අවස්ථාවල රාත‍්‍රී බාහිර රාජකාරිවල යෙදෙන සමහර නිලධාරීන් රාජකාරිය පසෙක තබා තමන්ගේ පෞද්ගලික අවශ්‍යතාවන් සඳහා යන බව ප‍්‍රසිද්ධ කරුණකි. උසස් පොලිස් නිලධාරීන්ද කිසිඳු අවස්ථාවක රාත‍්‍රී රාජකාරී නිරීක්‍ෂණය නොකිරීම නිසා මෙවැනි දේවල් සිදුවන බව පොලිසිය පවසන කරුණකි. ගිනි අවි සහ ගමන්කථන රැුගෙන නොගිය විට ඒවා නැවත පැමිණ පොලිසියට භාරදීමේ අවශ්‍යතාවක්ද නොමැති බව පෙනී යයි.

සාමාන්‍යයෙන් ආරක්‍ෂක අංශවල සේවය කිරීමේදී පොලිස් නිලධාරීන්ට ආත්මරාක්‍ෂක සටන් පුහුණුව ලබාදීමද අනිවාර්්‍යයෙන්ම සිදු කරන දෙයකි. ඒ අනුව මෙම සිද්ධියට මුහුණ දුන් කොස්තාපල්වරු දෙදෙනාටද තම හැකියාව හා පළපුරුද්ද නිසා අවිගත් පිරිස මෙල්ල කිරීමට ද බොහෝ දුරට ඉඩකඩ තිබුණා විය හැකිය. මෙතනදී එවැන්නක්ද සිදුවී නැත. පොලිස් නිලධාරීන් දෙදෙනා පහසුවෙන්ම අපරාධකරුවන්ට යටත් වී තිබේ. පොලිස් කොස්තාපල්වරියන් පවා පසුගිය කාලයේදී තනිවම අපරාධකරුවන් යටත් කරගත් අවස්ථා බොහෝ සෙයින් වාර්තා වූ බවද පෙන්වා දිය යුතුය.

අපරාධකරුවන්ගේ හැසිරීම් රටාව අනුව ඔවුන් සිතාමතාම මෙම අපරාධය සැළසුම් කර ඇති බව පරීක්‍ෂණ සිදු කරන පොලිස් කණ්ඩායම්වලද අදහස වී තිබේ. ඇතැම් විට පොලිසිය පිළිබඳ වෛරයකින් පසුවන පිරිසක් මේ අපරාධය කරමින් පොලිසියෙන් පළිගැනීමට සිතුවා විය හැකිය. පොලිස් කොස්තාපල්වරුන් දෙදෙනාගේ පොලිස් නිල ඇඳුම් ගලවා නිරුවත් කොට පොලිසියට අවමානයක් කිරීමට ද ඔවුන් අදහස් කළා විය හැකිය.

සිද්ධියට මුහුණ දුන් කොස්තාපල්වරුන් දෙදෙනාගේ පවුල් පසුබිම් හා පෞද්ගලික වාර්තා පිළිබඳව විමර්ශනය කිරීමේදී එම වාර්තා ඉතා යහපත් බව පොලිස් විමර්ශනවලදී අනාවරණය වී තිබේ. එසේ වුවද මොවුන් දෙදෙනාගේ පසුගිය රාජකාරි කටයුතු පිළිබඳවද සොයා බැලිය යුතුය. ඇතැම්විට එවැනි සිදුවීමක් මෙවැනි පළිගැනීමකටද හේතුවක් විය හැකිය. විශේෂයෙන්ම මියගිය කොස්තාපල් සම්පත් දිගු කාලයක් උතුරුxනැගෙනහිර ප‍්‍රදේශවලදී සේවය කිරීමේදී වූවා විය හැකි යම් සිදුවීමක් නිසා මෙවැනි අපරාධයක් සිදුවූවා යැයිද නිගමනය කළ හැකිය. අපරාධකරුවන්ගේ ප‍්‍රශ්න කිරීමද ඊට හේතුවූ සාධකයක් විය හැකි බැවින් ඒ පිළිබඳවද සොයා බැලිය යුතුය.

එසේම මෙම සිදුවීමට සම්බන්ධ ගැට්ටුවාන මංසන්ධියෙහි රාජකාරි කටයුතුවල නිරත ඇතැම් රථවාහන පොලිස් නිලධාරීන් විවිධ රථවාහනවලින් අල්ලස් ලබාගන්නා බව ප‍්‍රකට කරුණකි. ඒ පිළිබඳව බොහෝ පැමිණිලිද පොලිසියට ලැබී ඇත. බස් රථවලින් මෙන්ම ලොරි රථවලින්ද ඔවුන් අල්ලස් ලබා ගන්නා බව පැවසේ. එවැන්නකට මුහුණ පෑ පිරිසක් පොලිසියෙන් පළි ගැනීමට සිතා මෙවැන්නක් කළා විය හැකි බවද උපකල්පනය කළ හැකි කරුණකි.

මෙම අපරාධයට යම්කිසි පාතාල කල්ලියක් හෝ වෙනත් ආරක්‍ෂක අංශයන් සම්බන්ධ යැයිද යන සැකයද පරික්‍ෂණ සිදු කරන පොලිස් කණ්ඩායම්වල අවධානයට යොමුවී තිබේ. ඊට හේතුව මෙවැනි ක‍්‍රියාකාරකම් පසුගිය කාලයේදී මෙවැනි පිරිස් අතින් වාර්තා වීම නිසාය. මොවුන් බොහෝ විට අමනාපයෙන් පසුවන්නේ පොලිසිය සමඟය. එනිසා අහම්බෙන් මෙන් මෙම නිලධාරීන් දෙදෙනාව දැක මෙවැනි ක‍්‍රියාදාමයක් කි‍්‍රියාත්මක කිරීමට ඔවුන් සිතුවාද විය හැක.