නිරෝෂා විමලරත්න කියන කාන්තාව ගැන කියන්න දන්නවාද කියා යමෙක් ඇසුවොත්, අනේ එහෙම කෙනෙක් ගැන කියන්න දන්නේ නැහැනේ කියා එක්වරම ඔබ පිළිතුරු දෙනවා නොඅනුමානය.

නයි නළඟන කියන කෙනා ගැන දන්නවාද කියා ඇසුවොත් අපොයි ඔව් අර නාගෙයක් එක්ක ඩාන්ස් කරපු ලස්සන කෙල්ලනේ. එයා ගැන නම් දන්නවා යැයි පිළිතුරු දෙන බව නම් අප හොඳාකාරවම දන්නෙමු.

නයි නළඟන කියන නම පට බැඳී ඇත්තේ වෙන කාටවත් නොව නිරෝෂා විමලරත්

නටය. එහෙත් ගොඩක් දෙනෙක් ඇය හඳුනන්නේ නිරෝෂා විමලරත්න කියන නමට වඩා නයි නළඟන කියන නමින්ය.

නයෙක් සමග කොළඹ රාත‍්‍රී සමාජ ශාලාවක නැටුම් ඉදිරිපත් කිරීම නිසා නයි නළඟන ලෙස ප‍්‍රසිද්ධියට පත්වු නිරෝෂා නාගයාද සම`ග කොල්ලූපිටිය පොලිසිය විසින් මීට වසර දෙකකට පමණ ඉහතදී අත්අඩංගුවට ගනු ලැබීය.

නාගයා නැතිව ජීවත්වීය නොහැකි බව පවසා නාගයා ලබාදෙන ලෙස ඉල්ලා ඇය අධිකරණය හමුවට ගිය අතර දෙහිවල සත්ව උද්‍යානයට භාර දී සිටි එම නාගයා අධිකරණ නියෝගයක් මත නැවත ඇයට භාරදී තිබිණි.

නාගයා හා ඇය අතර පවතින සම්බන්ධය ගැන නිරෝෂා කළ ඇතැම් ප‍්‍රකාශ එම කාලයේ මහත් ආන්දෝලනයකටද තුඩු දී තිබිණි.

නිරෝෂා විමලරත්න එහෙමත් නැත්නම් නයි නළඟන පසුගියදා නැවතත් කරළියට පැමිණියාය.

අවසන් වරට ඇය කරළියට පැමිණියේ නයි නළඟන දරුවෙක් ප‍්‍රසූත කිරීමෙන් පසුවය.

මාස 10ක් පමණ වයසැති පිරිමි දරුවා නයි නළඟන විසින් විකිණීමට උත්සාහ කරන බවට පොලිස් 119 හදිසි ඇමැතුම් අංශයට ලැබුණු තොරතුරක් ගැන සොයා බලන ලෙස යොමු කෙරුණේ කැකිරාව පොලිස් ස්ථානය වෙතය.

කැකිරාව පොලිස් ස්ථානාධිපති ප‍්‍රධාන පොලිස් පරීක්ෂක ජනක පුෂ්පකුමාර මහතා මේ සම්බන්ධව වහා සොයා බලන ලෙස උපදෙස් දුන්නේ කැකිරාව පොලිසියේ ළමා හා කාන්තා කාර්යාංශයේ ස්ථානාධිපතිනි කාන්තා පොලිස් සැරයන් දිලූපා (136) මහත්මියටය.

නයි නළඟන හා ඇයගේ සැමියා වන රුවන් ලක්මාල් (24) නමැත්තා පොලිසියට කැඳවා මේ සම්බන්ධයෙන් ප‍්‍රශ්න කර ප‍්‍රකාශ සටහන් කර ගැණිනි.

කොළඹ ප‍්‍රදේශයේ රැකියාවක් සොයා යෑමට නයි නළඟන තීරණය කර ඇයගේ සැමියාගේ කැමැත්ත ඇතිව සැමියාගේ සහෝදරියකගේ දියණියකට කොළඹ ගොස් එනතුරු දරුවා රැුක බලා ගැනීමට භාරදුන් බව ඇය (නයි නළඟන) ප‍්‍රකාශ කළාය.

සැමියාගෙන් ප‍්‍රශ්න කිරීමේදීද මේ කතාවම පොලිසියට පවසා ඇත.

නයි නළඟනගේ සැමියා කොළඹ පෞද්ගලික ආරක්‍ෂක සමාගමක ආරක්ෂක භටයෙක් ලෙස රැකියාව කරන අයෙකි.

නයි නළඟන හා නැන්දම්මා අතර තිබු විරිසකයක් නිසා දරුවා රැුක බලා ගැනීමට මෙම කාන්තාවට භාරදී ඇති අතර දරුවා විකිණීමට උත්සාහ ගෙන නොතිබූ බව පොලිස් පරීක්ෂණවලින් පෙනී ගියේය.

මෙය ප‍්‍රශ්නගත සිද්ධියක් බවට පත්වූ නිසා නයි නළඟනගේ මාස 10ක් පමණ වයසැති දරු පැටියා තවදුරටත් ඇයගේ භාරයේ තබාගැනීම ප‍්‍රතික්ෂේප කළ බැවින් නිරෝෂාගේ නැන්දනිය (සැමියාගේ මව) දරුවා බාර ගැනීමට පොලිසියේදී කැමැත්ත ප‍්‍රකාශ කළේ මෙතෙක් කල් පැවති නැන්දම්මා ලේලි විරසකය හමාර කරමිනි.

නිරෝෂා හා ඇයගේ සැමියා වන රුවන් ලක්මාල් යළිත් පසුගිය 6 වැනිදා කැකිරාව පොලිසියේ පෙනී සිටියේ ප‍්‍රධාන පොලිස් පරීක්‍ෂක ජනක පුෂ්පකුමාර මහතා කළ දැනුම්දීමක් අනුවය.

පොලිස් ස්ථානාධිපතිවරයා මෙවැනි දැනුම්දීමක් කර තිබුණේ දරුවා සම්බන්ධව ගන්නා ඉදිරි ක‍්‍රියාමාර්ග අඹු සැමි යුවළගෙන් නිශ්චිතව පැහැදිලි කර ගැනීමට අවශ්‍යව තිබූ බව පෙනී ගිය නිසාය.

එය පොලිස් ස්ථානාධිපතිවරයා ගත් ප‍්‍රශංසනීය පියවරක් බව මෙහිලා විශේෂයෙන්ම සඳහන් කළ යුතුව ඇත.

”සර් මගේ දරු පැටියට මගේ පණටත් වැඩිය ආදරෙයි. සැමියත් ඒවගේම තමා. අපි දරු පැටියා විකුණන්න හැදුවෙ නැහැ. සැමියා සිකියුරිටි ජොබ් එකක් කරන්නේ. අපි හරිම අමාරුවෙන් ජීවත් වෙන්නේ. ආර්ථික ප‍්‍රශ්න ගොඩාක් තියෙනවා. ඒ හින්දා මම කොළඹ රස්සාවකට යන්න තීරණය කළා. සැමියාගේ කැමැත්තද එයට ලැබුණා. නැන්දම්මා දරුවා බලාගන්න බැහැ කිව්ව නිසා තමා සැමියාගේ අක්කා කෙනෙකුගේ දුවට රැුකබලා ගන්න කියා දුන්නේ. එහෙම නැතිව අපේ සුරතල් දරු පැටියා විකුණන්න ගියේ නැහැ.

නිරෝෂා විමලරත්න හෙවත් නයි නළඟනගේ රෝස පැහැති දෙකොපුල් අතුරින් ගලා ගිය කඳුළු බිඳු අතරින් පොලිස් ස්ථානාධිපතිවරයා එක්ක කියාගෙන ගියාය.

සැමියාගේ පඩියෙන් විතරක් මටයි දරු පැටියාටයි ජීවත්වෙන්න අමාරු නිසයි මමත් රැකියාවක් කරන්න කොළඹ යන්න තීරණය කළේ යැයිද නයි නළඟන යළිත් වරක් කියා ඇත්තේ හිතේ තිබුණ දුකවැඩිකමට විය යුතු යැයි සිතමි.

නයි නළඟනගේ එකම අපේක්ෂාව, බලාපොරොත්තුව පොඩි එකාට කිසිම අඩුපාඩුවක් නොතබා හදා වඩාගෙන හොඳ අධ්‍යාපනයක් ලබාදීමටය.

කාලයක් නාගයන්ට ආදරය කළ ඔබ අද වනවිට මවක්. මවක් හැටියට වගකීම් සම්භාරය ඔබ සතුව තිබෙනවා. ඒ වගකීම් ඔබ නිරන්තරයෙන් සිතන්න  ඕනෑ. ඒ වගකීම් නිසියාකාරව ඉටු කරන්නත්  ඕනෑ. ඒ හින්දා ඇෙඟ් කොටාගෙන තියන නයි පච්චයක් මකා ගන්නවා නම් ගොඩක් හොඳයි. ඒ ඔබ දැන් මවක් නිසා යැයි ප‍්‍රධාන පොලිස් පරීක්ෂක ජනක පුෂ්පකුමාර මහතා නයි නළඟනට කීවේ වැඩි හොඳට මිස කිසිම අහිතකින් නම් නොවේ.

නයි නළඟන පොලිස් ස්ථානාධිපතිවරයාගේ ඒ අවවාද අනුශාසනා සාවදානව අසා සිටියාය.

නිරෝෂා හා ඇයගේ සැමියා කැකිරාව දිසා විනිසුරු බුද්ධිනී අබේසිංහ මහත්මිය හමුවට පැමිණවීමෙන් පසු රුපියල් ලක්ෂය බැගින් වූ ශරීර ඇපමත මුදා හරිනු ලැබුහයි පොලිසිය කියයි.

උතුරුමැද පළාත බාර ජ්‍යෙෂ්ඨ නියෝජ්‍ය පොලිස්පති රවි විජේගුණවර්ධන සහ උතුරු මැද පළාත බාර නියෝජ්‍ය පොලිස්පති රංජිත් පද්මසිරි යන මහත්වරුන්ගේ අධීක්ෂණය හා උපදෙස් මත මෙම පරීක්ෂණ කටයුතු සිදුවිය.